Ang Pagtamod sang Biblia

Dapat Ka Bala Mahadlok sa Malaut nga Mata?

HINAY-HINAY nga ginbutang sang babayi sa isa ka minuro sa Amazona ang iya bata sa duyan. Nian, sa tapos sini ginhigtan niya sing pula nga higot ang iya bulutkunan, kag sing isa pa ka higot sa tunga sini. Sang matapos ang rito, nag-isol sia kag nagpanghayhay sa pagbatyag sing kaumpaw: “Karon, naamligan na ang akon bata batok sa malaut nga mata.”

Ang kahadlok sa malaut nga mata indi limitado lamang sa mga tawo sang mga tribo sa Bagatnan nga Amerika. Ang mga abogado sa Italya kag ang mga mangunguma sa India, subong man ang mga negosyante sa Aminhan nga Amerika, nagakurog man sa malaut nga mata.

Ano ang malaut nga mata? Amo ini ang pagpati nga ang iban nga tawo may gahom sa paghalit kag sa pagpatay pa gani sa imo paagi lamang sa pagtulok sa imo. Mahimo nga gamiton nila ining malaut nga pasiplat kon mahisa sila sa imo kauswagan. Dugang pa, ginapatihan nga madamo sing maayo sing katuyuan nga tawo ang may malaut nga mata kag nga ang iya pagtulok mahimo nga makahalit sa iban sing dihungod.

Nahadlok man bala ikaw? Kag kon nahadlok ka, ini bala nga kahadlok nagabulig ukon nagahalit sa imo?

Matuod Ukon Indi?

Ang kalabanan nga libro tuhoy sa sini nga tema nagalaragway sang kahadlok sa malaut nga mata subong disparatis. Sanglit ang disparatis ginapaathag subong isa ka pagtuo nga “wala napasad sa rason ukon sa kamatuoran,” ang iban nga tawo nagapati nga ang kahadlok sa malaut nga mata isa lamang ka bunga sang maluya nga mga panghunahuna.

Ginabaton nga indi matuod ang madamo nga sugilanon nahanungod sa malaut nga mata. Ang pagkahadlok, halimbawa, nga ang mga tawo nga libat, may katarata, ukon may alimpulos posible nga nagapanag-iya sing malaut nga mata isa ka bahin sang imahinasyon. Ukon ang pagpati nga ang makamamatay nga pasiplat may gahom kon ang imo bata magmasakit, ang imo baka mapatay, ukon ang imo mga manok indi mangitlog wala sing sadsaran.

Apang, subong nga ang bunga sang lubi natago sa madamol nga panit, may yara man malig-on nga mga kamatuoran nga natago sa idalom sang madamol nga hapin sang mga sugilanon nahanungod sa malaut nga mata. Gani sision naton ang piksion kag tukibon ang pila ka kamatuoran.

Ang Ginsuguran sang Malaut nga Mata

Ang Encyclopædia of Religion and Ethics nagasabat nga ang dumaan nga mga Babilonianhon nahadlok anay sa impluwensia sang malaut nga mata. Sin-o ang nagsakdag sadto nga kahadlok? Amo ang Babilonianhon nga mga diwatahan ukon mga manughiwit. Kilala sila sa pagtuga sing daku nga mga pag-antos paagi sa pagpasiplat sang ila mga mata. Apang, ining mga diwatahan wala maghimo sini sa ila kaugalingon nga kabubut-on. Sin-o ang naghatag sa ila sing gahom? Amo ang mga espiritu nga tinuga nga ginatawag mga demonyo. Ang libro nga The Religion of Babylonia and Assyria nagapaathag: “Ang mga manughiwit sarang makatawag sa mga demonyo kon luyag nila kag madala ina nga mga tawo nga mapilian nila sa sulod sang gahom sang mga demonyo.”

Ang Biblia nagatudlo man sa mga anghel nga naghimo sang ila kaugalingon nga mga demonyo subong amo ang ginahalinan sang “makahaladlok nga gahom.” (1 Samuel 15:23; 1 Timoteo 4:1; Judas 6) Dugang pa, ang Pulong sang Dios nagapalig-on nga ang mga demonyo nagapaambit sang ila malaut nga gahom sa mga espiritista kag nakontrol sang demonyo nga mga tawo. (Binuhatan 16:16-18; Bugna 22:15) Subong resulta, ina nga mga tawo may gahom sa ‘paghiwit sa iban,’ kon kaisa paagi sa ila mga mata. (Deuteronomio 18:10-12) Sa amo, ang malaut nga mata napasad sa pila ka kamatuoran.

Gani kon nagapuyo ka sa isa ka komunidad nga sa diin ang mga pagpanghiwit bahin sang adlaw-adlaw nga pagkabuhi, indi katingalahan nga mahadlok ka sa malaut nga mata. Apang, walay sapayan kon daw ano ka makahaladlok ina nga mga hiwit, indi ka dapat mahadlok kaangay sang imo mga kaingod. Ngaa indi? Una sa tanan, ang pagkahadlok sa malaut nga mata mahapos nga makadul-ong sa imo sa pagpaulipon sa mga demonyo—butang nga ginadumilian sang Biblia. (Tan-awa ang 1 Corinto 10:20, 21.) Ikaduha, makakuha ka sing isa ka porma sang pangamlig nga makapugong sa mga epekto sang malaut nga mata kag indi mahadlok. Ano nga pangamlig? Pagsuksok bala sing mga anting-anting?

Pangamlig nga Epektibo

Sa pagsabat, binagbinaga ining halimbawa: Ano ang imo himuon kon nahadlok ka nga ang daku nga kahoy matumba kag magadugmok sang imo balay? Lig-unon mo bala ang atop, nagalaum nga makaagwanta ini sa kusog sang matumba nga kahoy? Ukon mangayo ka sing bulig sa manugpulod ukon sa doktor sa kahoy nga may rekord sa pagpulod sang mga kahoy nga wala sing peligro? Ang pagpulod sa kahoy nagadula sang kabangdanan sang katalagman kag sa amo madula ang imo kahadlok.

Sing kaanggid, ano ang magadula sang imo kahadlok kon ang espiritista nagapamahog sa paggamit sang iya malaut nga mata batok sa imo? Lig-unon mo bala ang imo kaugalingon paagi sa paghigot sing mga anting-anting sa imo liog? Ukon mangayo ka bala sing bulig sa isa ka persona nga may rekord sa paghimo sa mga demonyo nga wala sing gahom? Sing maathag, ang naulihi amo ang maalamon nga dalanon, kay ginakuha sina nga persona ang kabangdanan sang katalagman kag sa amo ginadula ang imo kahadlok.

Apang kaangay sang salmista, mahimo mamangkot ka: “Sa diin magagikan ang akon bulig?” Gin-inspirar sang Dios, sia nagasabat: “Ang akon bulig nagagikan kay Jehova, ang Magbubuhat sang langit kag duta.” Ang bulig bala sang Manunuga nagalakip sang pangamlig batok sa malaut nga mata? Huo, kay ang salmista nagapasalig sa aton sing dugang pa: “Si Jehova magabantay sa imo gikan sa tanan nga malaut.” (Salmo 121) Sa pagpalig-on sang imo pagsalig sa ikasarang ni Jehova sa pag-amlig, binagbinaga ang makapapagsik sing pagsalig nga rekord sang mga pagpakig-angot sa mga demonyo.

‘Nagakurog ang mga Demonyo’—Ngaa?

Sang adlaw ni Noe, gintabog ni Jehova ang malalison nga mga anghel gikan sa ila nahamut-an nga mga posisyon paagi sa pagpugong sa ila ‘sa isa ka bilangguan’ sang espirituwal nga kadudulman. (1 Pedro 3:19; Genesis 6:1-4) Nian, sang nahaunang siglo, si Jesus, nga naghikot subong tiglawas sang Dios, nagpaguwa sa gamhanan nga mga demonyo. (Mateo 8:31, 32; Marcos 1:39) Kag sa liwat, sa tion sining ika-20 nga siglo, gingamit ni Jesus ang gahom gikan sa Dios sa pagtabog kay Satanas kag sa iya mga demonyo gikan sa langit. (Bugna 12:7-9) Busa, naton-an sang mga demonyo sa mabudlay nga paagi nga ang ila gahom wala kon ipaanggid sa gahom sang Dios. Apang, buot na nga dugangan ni Jehova sing isa pa ka pahina ining rekord. Sa dili madugay, si Satanas kag ining ginsikway nga mga rebelde itagbong sa kadadalman sa isa ka libo ka tuig.—Bugna 20:1-3.

Paano ining ihibalo nagaapektar sa ila? Ang Biblia nagapahayag: “Ang mga demonyo nagatuo kag nagakurog.” (Santiago 2:19) Nian, paano ining ihibalo nagaapektar sa imo? Mahadlok ka pa bala sa ‘nagakurog’ nga mga demonyo kag sa ila sakop nga mga tawo? Ukon ‘kahadlukan [mo] lamang bala si Jehova’ paagi sa pagsalig sing bug-os sa iya dimakita nga pag-amlig batok sa malaut nga mata?—1 Samuel 12:24.

Sa pagkamatuod, kon ang pagtuo nagapahulag sa imo nga hukason ang imo mga anting-anting kag palig-unon ang imo wagkus sa mga Saksi ni Jehova sa inyo komunidad, sa dili madugay magabuylog ikaw sa ila sa pagpalanog sang mga pulong sang dumaan nga mga anak ni Core. Sila nagtuaw: “Ang Dios aton dalangpan kag kusog, handa gid nga kabulig sa kalisod. Busa dili kita mahadlok.”—Salmo 46:1, 2; ipaanggid ang Roma 8:31.