Pagbantay sa Kalibutan

Daku nga Kakulang sing Pagkaon

Sang talipuspusan sang nagligad nga tuig, ang baha kag tigpalamangag sa bug-os nga China nagdul-ong sa mga 20 milyones ka pumuluyo sang pungsod sa pag-atubang sa daku nga kakulang sing pagkaon, report sang China Daily sang Beijing. Suno sa opisyal sang Min­is­try of Civ­il ­Affairs, ang daku nga kalamidad sang kinaugali nga naghalit sa daku nga bahin sang pananom nagabutang man sa peligro sa 80 milyones pa nga katawhan sa mga uma. Ginabanta nga mga 46 milyones ektaryas sang ginataliuma nga duta ang napierdi sang siam ka bulan nga tigpalamangag, matugnaw nga mga temperatura, kag masangkad nga pagbaha sang Suba sang Yangtze.

Pag-usmod sang Relihion

“Mga isa sa lima sang 5.14 bilyones ka katawhan sang kalibutan ang wala nagapati sa Dios—ukon sa bisan ano nga dios ukon mga dios,” siling sang magasin nga Asiaweek. “Ina ukon ang pagtuo sa ila mga katigulangan wala sing bahin sa ila kabuhi.” Ginabanta “nga mga 840 milyones ka katawhan ang wala nagabantay sang bisan anong relihioso nga mga okasyon kag 230 milyones pa ang wala nagakabig sang ila kaugalingon nga mga tumuluo.” Madamo ang natungod sa isa ka iglesia sa ngalan lamang, kag dugang ang nagalikaw karon sa organisado nga mga relihion. “Suno sa surbe sang Gal­lup kasan-o lang, 78 milyones sang mga Amerikano ang wala natungod sa isa ka iglesia ukon sinagoga ukon nagatambong lamang sa malaka nga pinasahi nga mga okasyon, pagdugang ini halin sa 61 milyones sang 1978,” siling sang Psychology Today. “Apang bisan sa tunga sang regular nga mga nagasimba, ginatudlo sang surbe ang nagadugang nga indi pagtuman sa mga buhat sang iglesia.” Ginabatyag sang kalabanan nga daku gid nga tion ang ginahinguyang sa mga butang subong sang pagpangita sing kuwarta. Mga 25 porsiento ang nagsiling nga nagtalikod sila sa mga iglesia sa pagpangita sing “madalom pa nga espirituwal nga kahulugan.”

Ang Paglaum sa Paghidait Nagabaskog

“Sa hinali, ang tion sang paghidait daw nagapahalipay sa kalibutan,” siling sang editoryal sang New York Times. Sa pagkamatuod, bag-o kag tumalagsahon nga mga paglaum para sa paghidait sa kalibutan ang nagpamanagbanag sining nagligad nga tuig. Lima ka mainit kag malawig nga mga inaway sa ulot sang mga rehiyon ang nagkanay kag mahidaiton nga natapos sang 1988. Ang mga inaway sa Natung-an nga Sidlangan, Asia, Aprika, kag Sentral nga Amerika nga mainit gid sa umpisa sang tuig nagbugnaw sa talipuspusan sang tuig agod umpisahan ang mga tikang para sa paghidait. Ang Times nagkomento: “Talagsa lang nga ang subong sina kadamo nga inaway dulungan nga nahusay.”

Kahuol Bangod sa Kakulang sing Trabaho

Ang kahuol nga ginatuga sang kataka kag kakulang sing trabaho nagadul-ong sa balatian, pagkadisangkol, kag personal nga mga problema siling sang BUPA, pribado nga grupo para sa siguro sa panglawas sang Britanya. Ang grupo nagasiling nga ang pila ka sobra sing trabaho nga mga empleyado indi luyag magpaambit sang ila trabaho, samtang, sa amo man nga tion, ang ila kulang sing trabaho nga mga empleyado wala sing huyog sa pagpangayo sing dugang nga trabaho. Ang balatian kag pagpalya amo ang kabangdanan sang tuigan nga 360 milyones ka adlaw sang pagtrabaho nga nagakadula, siling sang The Times sang London, kag ang iban nga kompanya nagagasto sing halin sa 7 tubtob 10 porsiento sang ila suweldo sa balatian.

Pinakamalapad nga Kagulangan

“Ano ang pungsod sa kalibutan nga may pinakamalapad nga kagulangan?” pamangkot sang Asiaweek. “Can­ada? Nor­way? Brazil? Indi, kundi amo ang Hapon.” “Sa proporsion sang kagulangan sa kabilugan nga duta, wala sing iban nga daku ukon kasarangan nga pungsod ang malapit sa sini.” Sisentay siete porsiento sang Hapon—377,727 kilometros kuwadrado—ang kagulangan, kalabanan berde nga mga kahoy nga nagatubo sa bakulod sang mga kabukiran. Ang mga balay kag mga apart­ment para sa 38.9 milyones ka panimalay nagaokupar sang 2.5 porsiento lamang sang duta, kag ang mga pabrika kag iban pa nga tinukod sang industriya 0.4 porsiento lamang.