Pamangkot sang mga Pamatan-on . . .

Ano ang Sekreto sa Pagpili sing Husto nga mga Panapton?

SI MIKE makahibalo magpili sing de-kalidad nga mga panapton—kon paano ini baklon sa manubo nga presyo. Kon kaisa sia ang ginapabakal sang mga katapo sang iya pamilya para sa ila! Sa iya pagpamalaklon isa ka bes, ginbaklan niya sing bayo ang iya iloy, ang iya may bana na nga utod, kag ang iya otso-anyos nga hinablos—ang husto nga kadakuon kag estilo nga luyag nila! Samtang nagapamalaklon sia sini, nakabakal sia sing bag-o nga bata-de-banyo para sa iya kaugalingon sa presyo nga un-kuwarto sang regular nga presyo sini. Para kay Mike, indi ini mabudlay kundi makalilipay gid.

Mahimo nga indi ka maluyagon mamalaklon kaangay ni Mike. Apang kaangay sang kalabanan nga pamatan-on, mahimo nga luyag mo nga maayo gid ang hitsura mo sa eskwelahan, sa trabaho kag sa hampang. Ang problema amo, ang kamatuoran nga ang isa ka estilo ginakabig nga uso sa tunga sang mga pamatan-on wala nagakahulugan nga amo ini ang husto nga butang nga isuksok, ukon ang pagbakal sang “butang nga uso” amo ang labing maayo nga paggamit sa kuwarta mo. Gani, ibutang ta nga ginahatagan ka sang imo mga ginikanan sing kahilwayan sa pagpili sang imo kaugalingon nga mga panapton, yari ang pila ka ideya kon paano magpili kag magbakal sing husto nga mga panapton.

Pagpili sing Husto nga “Panapton”

Nahauna, kalimtan naton ang ideya nga ang tanan puwede kon tuhoy sa panapton. Nagadaku ka na, kag ang paglaum nga ikaw makatrabaho kag ayhan magasakdag sing pamilya yara sa imo palaabuton. Ang imo pagpanapot magaapestar indi lamang sang posibilidad nga makatrabaho ka kundi sang pagtamod man kag pagtratar sa imo sang iban. Kapin ka importante, kita nga mga Cristiano indi dapat “magpahamuot sa aton kaugalingon,” kundi dapat kita mabalaka kon paano ang ginahimo naton—ukon ginasuksok—makaapektar sa iban.—Roma 15:1.

Ang Hulubaton 25:20 nagahambal tuhoy sa “isa nga nagauba sang panapton sa dag-on sang tugnaw.” Daw ano ka indi nagakaigo! Indi man nagakaigo nga magsuksok sing estilo nga panapton nga indi bagay sa okasyon. Ang isa ka artista sa drama sa entablado mahalungon nga nagapili sing panapton nga bagay sa iya papel. Kag sa matuod nga kabuhi, ang papel nga aton ginatungdan masami nga nagakinahanglan sing nanuhaytuhay nga “mga panapton.” Halimbawa, ikaw bala ilinterbyuhon para sa trabaho? Nian ang amerikana para sa trabaho mahimo nga amo ang nagakabagay nga panapton. Makadto ka bala sa eskwelahan? Nian mahimo nga kaswal lamang ang luyag mo ipanapot apang mahipid.

Si Millie nga isa ka Saksi ni Jehova nagaeskwela sa isa ka eskwelahan nga sa diin lapnag ang kasingki. Kon magpanapot sia nga subong daw matambong sa Cristianong miting, madali sia nga matalupangdan. Gani nagadelargo sia sa tion sang klase, kay ginabaton ina sa iya eskwelahan. Apang sanglit nagapakigbahin sia sa hilikuton sa pagtudlo sing Biblia sa tapos sang klase, nagabalon sia sing panapton. Bangod nagbaylo ang papel, ginabayluhan niya ang panapton.

Ang mga pamatan-on sa tunga sang mga Saksi ni Jehova labi na nga nagabinagbinag kon ano ang ila isuksok sa Cristianong mga miting kag sa ila pagbantala sa publiko. Halimbawa, ang jeans kag sneak­ers, nga mahimo bagay gid sa eskwelahan, indi nagakaigo sa tion sang pormal nga pagsimba; makabuhin ini sa pangangkon sang isa subong isa ka ministro sang Dios.—Ipaanggid ang 2 Corinto 6:3.

Ang Kapuslanan sang Kinaraan nga Pagpanapot

Mahimo nga makibot ka sa pilosopiya sang pamatan-on nga si Rudy tuhoy sa pagpanapot. Sia nagsiling: “Luyag ko ang sahi sang panapton nga ginasuksok anay sang nagligad nga 50 ka tuig.” Kinaraan bala? Indi gid. Natun-an ni Rudy nga bisan pa ‘ang danyag sang kalibutan nagabalhin,’ ang sadsaran nga mga estilo talagsa lang nagabalhin. (1 Corinto 7:31) Ang iya talaksan amo: Indi magsuksok sing uso gid kay madali ini madula! “Sa sining paagi, pirme ka sunod sa estilo,” laygay ni Rudy.

Ang mga eksperto nagaugyon. Ang consultant nga si Amelia Fatt, halimbawa, nagasiling nga ang konserbatibo nga tabas “mas maayo nga puhunan.” Indi ini madali malipasan sang uso bangod indi tuman ka espisipiko ang hitsura sini. Subong bonus, ang konserbatibo nga mga estilo mas madali iparis sa iban mo nga mga panapton.

Ang iban sang modernong mga estilo indi nagakaigo sa mga Cristiano. Ang iban matahom. Ibutang ta nga sugot ang imo mga ginikanan, kon sa banta mo ang isa ka uso nga panapton indi lamang matahom para sa imo kundi bagay pa sa iban mo nga mga panapton, mahimo luyag mo isuksok ini. Apang andami nga basi mangin ulipon ka sang uso! Ang consultant sa uso nga si Carole Jackson nagasiling: “Kon sundon mo ang uso, bisan pa indi ini bagay sa imo, ginadaya mo lamang ang imo kaugalingon.”

May iban pa nga mga bentaha ang konserbatibo nga panapot. Natukiban sang iban nga mga pamatan-on nga babayi nga bangod sini, nalikawan nila ang seksuwal nga pagpamentaha sa eskwelahan kag sa trabaho. Dugang pa, ang pamatan-on nga nagapabilin sa tradisyonal nga mga estilo kapin nga tamdon sang iban subong hamtong, malig-on, indi subong isa nga ginapalidpalid sang tagsa ka hangin sang uso.

Si Tammy, halimbawa, isa ka pamatan-on nga babayi nga nagaalagad subong bug-os tion nga ebanghelisador. Bisan pa ang uso sa iya ginaistaran amo ang malip-ot nga panapton, sia nagasiling, “Para sa akon, ang lampas diutay sa tuhod amo ang komportable nga kalabaon.” Nahisanto ini sa Cristianong pagkaugdang. (1 Timoteo 2:9) Sa pagkamatuod, ang talaksan sang pagkaugdang wala nagapalareho sa bug-os nga kalibutan. Kag kon nagaduhaduha ka sa kon bala ang isa ka estilo nagakaigo ukon indi, hambali ini upod sa isa ka ginikanan ukon sa isa ka mas may edad sa imo nga abyan.

Maalam nga Pagpamalaklon

“Paagi sa lantip nga pagtuytoy himua ang imo pagpakig-away,” laygay sang Biblia sa Hulubaton 20:18. Kinahanglan ang lantip nga pagtuytoy bisan sa kalibutanon nga mga butang subong sang pagpamalaklon. Halimbawa, nabudlayan ka bala sa pagpangita sing panapton nga bagay sa imo? Makatigayon ka sing lantip nga tuytoy paagi lamang sa pagkadto sa publiko nga librarya kag magpanalawsaw! May yara mga libro kag mga artikulo nga makabulig sa imo sa paggamit sang nanuhaytuhay nga tabas, kolor, kag estilo sang mga panapton sa pagtumbas sa mga problema sa korte sang nawong, kalabaon sang liog, pigura, kag iban pa.

Kamusta ang kalidad sang mga panapton nga ginabakal mo? Bisan pa imol si Jesus sang yari sia sa duta, mahimo nga nagsuksok sia sing mataas sing kalidad nga panapton kay nagpapalad ang mga manugpatay sa iya kon sin-o ang magakuha sini! (Juan 19:23, 24) Sing kaanggid, dapat ka magtinguha sa pagpabilin sa de-kalidad nga mga panapton, bisan pa kon limitado ang imo pundo kag dapat ka magsupot anay antes makabakal. Sa ulihi, ang mas mahal nga de-kalidad nga panapton nga nagamit mo sing tinuig mahimo nga mas barato sa “baratilyo” nga wala nagadugay.

Paano mo mahanas ang mata sa pagpili sang de-kalidad nga panapton? Tilawi nga magtan-awtan-aw sa malahalon nga mga balaligyaan nga nagaespesyalisar sa de-kalidad nga mga panapton. Hibalua ang hitsura kag tela sang maayong mga panapton. Ang libro nga Elegance nagasiling: “Indi magpadala sa ngalan; ang panapton dapat magtindog sa iya kaugalingon nga mga tiil . . . Ang indi maayo nga klase, walay sapayan sang etikita, indi baratilyo.” Tan-awa ang tela. Usisaa ang kuwelyo, lining, kag ang ohales. Pangitaa ang doble nga tahi.

Si Mike (nga ginsambit kaina) nangin hanas sa pagkilala sang de-kalidad nga panapton. Sa amo, nakilala niya nga ang ginabaratilyo nga bata-de-banyo matuod gid nga baratilyo! Apang, “indi mahaylo sa ‘mga baratilyo,’” paandam ni Amelia Fatt. Ang isa ka ­sweater nga bug-os ang presyo nga sarang masuksok upod sa pila ka panapton mahimo nga magahatag sa imo sing kapin nga serbisyo sang sa “baratilyo” nga ­sweater nga wala sing kabagay. Ang Hulubaton 21:5 nagasiling: “Ang tagsatagsa nga nagadali nagapadulong sa kinawad-on.” Likawi ang pagbakal kon nagadali ka. Magpamalaklon kon indi gutok ang balaligyaan. Hibalua sing abanse kon ano ang ginapangita mo. Kon nahuman na sa imo hunahuna ang tela, estilo, kolor, kag presyo nga luyag mo, kubos ang posibilidad nga mabuyo ka sa pagbakal sang butang nga wala gid nimo ginakinahanglan.

Ang iban nga tindera makabulig sing daku kon isugid mo ang espisipiko nga ginakinahanglan mo. (Sa pagkamatuod, nakabakal si Mike sing mga panapton para sa babayi nga mga katapo sang iya pamilya sa bulig sang isa ka tindera.) Apang indi pagtuguti ang mga tindera nga hayluhon ka sa indi mo luyag. “Ang wala sing eksperiensia nagapati sa tagsa ka pulong, apang ang maalamon nagabinagbinag sang iya mga tikang.”—Hulubaton 14:15.

Gamita ang nagakaigo nga panapton kag pagpamustura kon nagapamalaklon ka. Paano mo mahibaluan kon bala ang jacket matahom tulukon kon isampaw ini sa T-shirt? Ukon paano ka makapamat-od kon bala ang malaba nga panapton ukon kinaandan kalaba nga panapton matahom kon magsuksok ka sing ­sneakers? Ang isa ka manunulat nagsiling nga kon malaw-ay ang imo pagpanapot, may huyog ang mga tindera sa paghunahuna nga “ikaw isa ka tawo nga may limitado nga luyag ­kag/ukon wala ka sing kuwarta,” kag magakonsentrar sila sa iban nga bumalakal.

Bilang katapusan, masapwan mo nga sa masami “mas maayo ang duha sa isa” kon nagapamalaklon. (Manugwali 4:9) Mahimo masugid sang isa ka abyan ukon ginikanan kon ano ang hitsura sang panapton sa likod, kon bala tuman sini ka halog, tuman ka gutok, ukon indi maugdang.

Ang Kapin ka Importante nga mga Butang

Sa Filipos 1:10, ang mga Cristiano ginalaygayan nga ‘pat-uron ang kapin ka importante nga mga butang.’ Ang importante gid nga mga butang sa kabuhi nasentro sa paghupot sing ihibalo tuhoy sa Dios—indi sa panapton. Masubo hambalon, ang iban nga mga pamatan-on mahimo nga maayo gid mamayo apang maluya sa ila ikasarang sa pagpahayag sa publiko sang ila pagtuo.

Gani samtang maayo nga mangin maalamon nga bumalakal kag presentable kon tulukon suno sa ginatugot sang imo pinansial nga ikasarang, magkonsentrar sa pagtinguha nga mangin hamtong nga Cristiano. Tun-i ina nga papel, kag ang pagpanapot para sa sini magaabot sing kinaugali.

[Laragway sa pahina 13]

Ang uso nga mga panapton madali maglipas. Ang konserbatibo nga mga estilo para sa nanuhaytuhay nga katuyuan nagadugay