Ang Pagtamod sang Biblia

Ang Dapat Mo Mahibaluan Tuhoy sa mga Anghel

“Mga 3,000 ka eskolar sa relihion ang nagtipon sing apat ka adlaw sa Nueva York sang nagligad nga semana agod pamatian ang kapin sa 500 ka report tuhoy sa tema nga halin sa papel sang pagpakadlaw sa mga sermon tubtob sa pagkaimportante sang rito sa mga Pentecostal. Wala sing bisan isa nga nagsambit sa mga anghel.”—Daily News, Disiembre 26, 1982.

SA KARON, pagligad sang walo ka tuig, diutay lamang gihapon ang ginahambal sang klero tuhoy sa mga anghel. Ngaa? Mahimo ayhan nga ining langitnon nga mga mensahero ginatamod subong bahin lamang sang isa ka dumaan nga mito? Ukon nagaluntad gid bala sila? Kon nagaluntad, ano ang dapat mo mahibaluan tuhoy sa ila?

Nagaluntad Bala Sila?

Ang mga anghel indi “mga gahom” lamang ukon “mga kahublagan sang uniberso,” subong amo ang ginapangangkon sang pila ka pilosopo. Matuod gid sila amo kon ngaa ginatos ka beses nga ginasambit sila sa Pulong sang Dios, ang Biblia. Sa orihinal nga mga hambal sang Biblia, ang mga tinaga nga ginbadbad “anghel” (Hebreo, mal·’akhʹ; Griego, agʹge·los) literal nga nagakahulugan sing “isa nga nagadala sing mensahe” ukon “mensahero” lamang. Ining mga tinaga halos 400 ka beses nga ginsambit sa bug-os nga Biblia, kon kaisa nagapatuhoy sa tawo, apang sa masami sa espiritu nga mga mensahero.

Ang anghel nga nagpakita sa baog nga asawa ni Manoa nga nagpahibalo sa iya nga ipanamkon niya ang iya anak nga lalaki, nga si Samson, matuod gid sa iya. Amo man ang tatlo ka anghel nga nagpakita kay Abraham kag sa iya asawa nga si Sara, kag ang duha nga nagpangita kay Lot, kag ang isa nga nagpungko sa idalom sang isa ka daku nga kahoy kag nagpakighambal kay Gideon. (Genesis 18:1-15; 19:1-5; Hukom 6:11-22; 13:3-21) Sa tion sang pagkatawo ni Jesus, ang isa ka anghel hinali nga nagpakita sa isa ka grupo sang mga manugbantay sing karnero sa tunga sang masanag kag makasililaw nga kapawa.—Lucas 2:8, 9.

Yadto nga mga anghel matuod gid. Indi sila bahin lamang sang imahinasyon ukon sang wala sing persona nga kusog. May katuyuan sila nga gintuman subong mga mensahero gikan sa Dios, kag ang mga kasaysayan nagakaigo nga ginrekord sa Biblia para sa aton kaayuhan karon. (2 Timoteo 3:16) Sa amo ang Biblia nagapahayag sing importante nga mga detalye tuhoy sa mga anghel nga dapat mo mahibal-an, ang iban sini nagasumpakil sa kinaandan nga mga ideya.

Ngaa Palareho ang Dagway Nila?

Ayhan ginalaragway mo ang mga anghel subong matahom nga mga babayi ukon subong matambok kag tulad-bata nga mga tinuga nga may mga pakpak, nga nagayuhom sing matam-is kag nagasul-ob sing maputi nga mga panapton, nga nagakutingkuting sing diutay nga mga arpa, kag nagalupadlupad sa kahawaan. Kon amo, dapat mo mahibaluan nga sala ini nga mga ideya nga ginkuha sa pagano nga mga ideya, subong sang Griegong mitolohiya. Ukon ining mga ideya ginhimo sang matapos ang pagsulat sa Biblia. Sa simbuliko nga mga palanan-awon sa Biblia, ang espiritu nga mga tinuga subong sang mga serafin kag mga querubin may mga pakpak.—Isaias 6:2; Ezequiel 10:5; Bugna 14:6.

Ginalaragway sang Pulong sang Dios ang mga anghel subong tuman ka gamhanan nga mga espiritu, kag ang espiritu indi makita. (1 Hari 22:21; Salmo 34:7; 91:11) Isa ka “anghel ni Jehova” ang nagpatay sa 185,000 ka Asirianhon sa kampo sang kaaway sang Israel sa isa ka gab-i lamang! (Isaias 37:36) Sang magpakita ang mga anghel sa mga tawo, nagpakita sila pirme subong nakapanapot nga mga lalaki, indi subong mga babayi ukon mga bata kag indi gid sa porma nga manubo sa tawo.

Sa diin maghalin ining gamhanan nga espiritu nga mga tinuga? Ang Biblia nagasiling nga “paagi sa iya [Jesus] gintuga ang tanan nga butang sa mga langit kag sa duta, ang makita kag ang dimakita.” (Colosas 1:16) Paagi sa iya panganay nga Anak, wala lamang gintuga ni Jehova nga Dios ang mga anghel sing una sa tawo kundi ginhimo man niya sila nga mas mataas sa tawo.—Job 38:4, 7; 2 Pedro 2:11.

May Personalidad Bala Sila?

Ang mga anghel, kaangay sang mga tawo, may balatyagon. Sa tapos masaksihan ang pagpanuga sa duta, ginasugiran kita nga ang mga anghel “nag-ambahan sing tingob,” kag “naghinugyaw sa kalipay.” (Job 38:7) Ginapahayag man sang Biblia nga “may kalipay sa atubangan sang mga anghel sang Dios tungod sa isa ka makasasala nga nagahinulsol.” (Lucas 15:10) Sa pagkamatuod, ang “gahom” lamang indi makaeksperiensia sing daku nga kalipay nga ginlaragway sa sinang mga bersikulo.

Ang mga anghel may limitasyon man. May pila ka kamatuoran tuhoy kay Cristo kag sa palaabuton nga ginpahayag sa tawhanon nga mga manalagna apang indi sa mga anghel. Ang Pulong sang Dios nagasugid sa aton nga “sa sining mga butang ang mga anghel nagahandum sa pagtan-aw.” (1 Pedro 1:10-12) Tuhoy sa eksakto nga petsa nga ginpili sang Dios para sa pagkari sang Ginuo, si Jesus nagsiling: “Nahanungod sa sadto nga adlaw kag oras wala sing nakahibalo, bisan pa ang mga anghel sang langit, ukon ang Anak, kundi ang Amay lamang.”—Mateo 24:36.

Subong man, ang ngalan sang duha ka anghel, sanday Miguel kag Gabriel, naglutaw sa Biblia. (Daniel 12:1; Lucas 1:26) Wala bala ini nagadugang sing pamatuod sa ila pagkaindibiduwal? Subong mga indibiduwal, wala sila ginprograma, kaangay sang kompyuter ukon robot, sa paghikot sa isa ka pat-od nga paagi. Sa baylo, ang mga anghel ginregalohan sing ikasarang sa pagpangatarungan kag may kahilwayan sila sa paghimo sing personal nga mga desisyon sa moral. Sa amo, subong mga tinuga nga may kahilwayan sa pagdesisyon, ang iban nga mga anghel nagrebelde batok sa Dios kag nangin si Satanas kag ang iya mga demonyo.—Genesis 6:1-4; Judas 6; Bugna 12:7-9.

Dapat Bala Sila Simbahon?

Bisan pa mahimo ginakilala naton ang pagluntad sang mga anghel subong kamatuoran, indi leyenda lamang, dapat naton likawan ang mga pagpasobra. Ang iban nga relihioso nga mga organisasyon naghatag sing indi nagakaigo nga pagkilala sa mga anghel, bisan pa ang pagsimba sa anghel ginakondenar sa Biblia. (Colosas 2:18; Bugna 22:8, 9) Ginhimo sang Iglesia Katolika sanday Miguel kag Gabriel subong mga persona nga ginapatuhuyan sing debosyon. Kag sa mga iglesia sang Eastern Orthodox, ang mga anghel importante gid sa mga pangadi. Daw ano ini ka tuhay sa paandam nga ginhatag sang anghel ni Jehova sang magyaub si apostol Juan sa iya tiilan: “Maghalong ka! Dili ka maghimo sina! Pareho mo lang ako nga ulipon.”—Bugna 19:10.

Ngaa may kagumon gid nahanungod sa mga anghel? Si Satanas, nga nagapakunokuno subong “anghel sang kapawa,” “nagbulag sa painoino sang mga ditumuluo.” (2 Corinto 4:4; 11:14) Sa amo, indi bala makatarunganon nga paabuton nga madamo karon ang magapabilin sa ila kaugalingon nga opinyon tuhoy sa pagluntad kag kinaugali sang mga anghel sa baylo nga batunon ang ginasiling sang Pulong sang Dios? Huo, bisan pa diutay lamang ang ginasiling karon sang mga klerigo nahanungod sa mga anghel, may garantiya kita sang Dios paagi sa rekord sang Biblia nga sila nagaluntad kag nagahimo sing isa ka dungganon nga pag-alagad subong mga mensahero ni Jehova.—Hebreo 1:7, 14; 6:18.

[Laragway sa pahina 16]

Ang mga anghel nga ginlaragway subong mga tinuga nga kaangay sang mga bata nga may mga pakpak ginkuha sa pagano nga mga ideya

[Ginkuhaan]

Cupid a Captive ni François Boucher, c. 1754