Ang Bayad sang Pagkadibunayag

ANG mga batobato ni Casey Lunsford wala na nagapanghikot. Ginbanabana sang mga doktor nga ang bata nga lalaki nga nagaedad sing tatlo ka tuig kag tunga mabuhi sing tatlo ukon apat ka bulan lamang kon indi pag-islan ang iya mga batobato. Nagsugot ang iya mga ginikanan, nga mga Saksi ni Jehova, sa operasyon; sa kamatuoran, ihatag sang amay ni Casey ang isa sang iya kaugalingon nga mga batobato sa iya anak.a Ang ila lamang kondisyon amo nga wala sing dugo nga gamiton—ang mga Saksi ni Jehova nagadumili sa pagpatughong sing dugo bangod sang Makasulatanhon nga mga kabangdanan.—Tan-awa ang Binuhatan 15:20.

Nagplano ang mga Lunsford nga magpaopera sa isa ka ospital sa Texas nga may kilala nga rekord sa madinalag-on nga pag-ilis sang batobato nga wala sing dugo nga ginatughong. Apang ang isa ka ospital nga mga kilometro lamang ang kalayuon gikan sa balay sang mga Lunsford sa California handa sa pag-opera nga wala sing dugo nga itughong. Ginpili sang mga Lunsford ining malapit nga ospital.

Sa sulod sang semana antes sang operasyon, ang mga mamumugon sa ospital kag ang manugbusbos makapila nga nagpasalig sa mga ginikanan nga indi kinahanglanon ang pagtughong sing dugo ukon wala sing mando sang korte nga kuhaon batok sa luyag sang mga ginikanan. Apang, sa gilayon nga nagsugot ang mga ginikanan sa operasyon, ang manugbusbos naghimos sing kahimusan sa pagkuha sing mando sang korte agod ipilit ang dugo kay Casey. Gin-islan pa gani niya ang isa ka social worker nga may kahilabtanan sa sini sang mag-insister ini sia nga ang mga ginikanan may kinamatarong nga mahibal-an ang tuhoy sa mando sang korte. Sang aga sang operasyon, ang ospital nag-file sing sertipikasyon nga nagapangabay sing mando sang korte sa pagtughong sing dugo kay Casey. Ginpalutaw sang sertipikasyon nga si Casey nagahigda sa lamesa nga uluperahan nga ginadugo samtang, ang matuod, wala pa magsugod ang operasyon! Isa ka oras sa tapos sang operasyon, nga nahimo sing madinalag-on nga wala sing dugo, si Casey gintughungan sing dugo.

Gin-akusar sang mga Lunsford ang manugbusbos kag ang ospital sing paglalis sa ila mga kinamatarong sibil kag sing pangdaya, battery, hungod nga pagtuga sing emosyonal nga kahuol, kag sing paglapas sa pagsalig. Sa tapos sang apat-ka-semana nga vista, ang korte nagbinagbinag sing duha ka adlaw kag tunga kag nagbalik nga may desisyon batok sa manugbusbos kag sa ospital. Ginmanduan sila nga bayaran ang mga Lunsford sing kabilugan nga $500,000.

Bisan pa ginbawi na karon sang hukom sang vista ang desisyon tuhoy sa paglalis sa mga kinamatarong sibil kag nagmando sing bag-o nga vista para sa pangdaya kag iban pa nga mga akusasyon, ang 12 ka katapo sang korte kombinsido nga ang pagdaya sang ospital kag sang doktor nagpakamatarong sa premyo nga $500,000. Nagsiling ang mga abogado sang pamilya nga sakdagon nila ang desisyon sang mga katapo sang korte paagi sa apelasyon.

[Mga footnote]