“Ngaa Ginkuha sang Dios ang Akon Anak?”

ANG kamatayon sang isa ka anak makapasubo gid para sa bisan sin-o nga ginikanan. Isa ini ka mapait gid nga eksperiensia nga indi mapanas sang mga pulong lamang. Apang kon naeksperiensiahan mo na ina kag nagapalibog ka kon ngaa ginkuha sang Dios ang imo anak, nian nagaantos ka bangod sang sayop nga paghangop nga mahimo magadugang lamang sa imo pagkalisang. Dapat mo mahibaluan ang kamatuoran: wala ginkuha sang Dios ang imo anak.

Apang, baliskad ang ginapatihan sang madamo. Halimbawa, masubo nga ginhimutaran sang isa ka babayi ang bukas nga lungon; sa sulod sini amo ang iya 17-anyos nga anak nga lalaki, nga ang iya buhok ginpanipis sang bulong nga wala makapaayo sang iya kanser. Gin-atubang niya ang isa ka bisita kag nagsiling: “Luyag sang Dios nga makaupod Niya si Tommy sa langit.” Subong isa ka Romano Katoliko, amo ini ang gintudlo sa iya sang iya pagsimba sa sulod sang mga tinuig. Ginabasol man sang mga Protestante ang Dios sa kamatayon sang mga kabataan. Ang kilala nga Protestante nga repormador nga si John Calvin nanganduhoy sang mapatay ang iya duha-ka-semana nga anak: “Masakit gid nga pilas ang gintuga sang Ginuo sa pagkapatay sang amon bata.”

Suno sa isa ka dumaan nga sugilanon sang mga Judiyo, ang kapid nga mga anak nga lalaki sang isa ka rabbi napatay samtang wala sia. Sang magpauli sia kag ginpangita ang iya mga anak, ang iya asawa nagsiling: “Kon ginpahulam ka sing duha ka malahalon nga hiyas kag ginsilingan ka nga gamiton mo ini samtang yari ini sa imo, mareklamo ka bala kon bawion na ini sang tag-iya?” Nagsabat sia, “Sa pagkamatuod indi!” Nian ginpakita niya sa iya ang iya duha ka patay nga mga anak kag nagsiling: “Ginbawi na sang Dios ang iya mga hiyas.”

Indi Makapaumpaw kag indi Biblikanhon

Tuman gid bala kapintas ang Dios nga pahanabuon niya ang kamatayon sa mga kabataan, samtang nahibaluan niya nga ini magapasubo gid sa ila mga ginikanan? Indi, indi ang Dios sang Biblia; suno sa 1 Juan 4:8, “Ang Dios gugma.” Talupangda nga wala ini nagasiling nga ang Dios may gugma ukon nga ang Dios mahigugmaon kundi nga ang Dios gugma. Tuman kainit, tuman ka putli, tuman ka himpit ang gugma sang Dios, tuman ka bug-os nga ini nagalatom sang iya personalidad kag mga buhat, amo kon ngaa nagakaigo nga ilaragway sia subong amo gid ang personipikasyon sang gugma. Indi ini ang Dios nga nagapatay sang kabataan ‘bangod ginabawi niya ang iya mga hiyas.’

Sa kabaliskaran, ginahigugma sang Dios ang kabataan sing mabaskog kag dimakagod. Si Jesucristo, nga ang iya tagsa ka pulong kag buhat nagpabanaag sang personalidad sang iya langitnon nga Amay, nagpakita sing personal nga interes sa kabataan. Gin-agbayan niya ang isa ka gamay nga bata kag gintudluan ang iya mga disipulo nga dapat sila magpakita sing kaanggid nga tulad-bata nga pagkainosente kag pagkamapainubuson. (Mateo 18:1-4; Marcos 9:36) Mga siglo antes sini, gintudluan ni Jehova ang iya katawhan nga tamdon ang ila mga anak subong hamili kag hanason sila, tudluan kag atipanon. (Deuteronomio 6:6, 7; Salmo 127:3-5) Luyag niya nga magkaupod ang mga pamilya, wala ginapain sang kamatayon.

“Nian Ngaa Napatay ang Akon Anak?”

Madamo ang nagapati nga bangod ang Dios labing gamhanan, ginakontrol niya ang tanan nga nagakatabo sa sining kalibutan, lakip ang kamatayon sang kabataan. Apang indi amo sina ang buot silingon. Sang madula ni Job ang iya tanan napulo ka anak sa isa lamang ka kalamidad, nagdumdom sia nga si Jehova ang nagpahanabo sining daku nga kalamidad sa iya. Wala niya nahibaluan ang ginapahayag sa aton sang Biblia nga ang labaw sa tawo nga kaaway sang Dios nga si Satanas amo ang aktuwal nga yara sa likod sang nagakatabo, nga nagatinguha sa pagpaantos kay Job agod biyaan niya ang iya pagtuo sa iya Manunuga.​—Job 1:​6-12.

Sing kaanggid, ang kalabanan nga tawo karon wala sing ideya sa kasangkaron sang impluwensia ni Satanas sa kalibutan. Ginapahayag sang Biblia nga si Satanas, indi si Jehova, ang manuggahom sining malaut nga sistema sang mga butang. Subong ginasiling sang 1 Juan 5:​19: “Ang bug-os nga kalibutan yara sa gahom sang isa nga malauton.” Si Jehova indi ang balasulon sa tanan nga makapasubo nga mga nagakatabo sa sining kalibutan. Wala niya ginkuha ang imo anak.

Nagakahulugan bala, nian, nga ginkuha ni Satanas ang imo anak? Indi sing direkta. Sa Eden anay, ginpaidalom sang tawo ang iya kaugalingon sa paggahom ni Satanas sang magrebelde sia sa Dios. Sa amo nadula niya ang regalo nga dayon kag mapagros nga kabuhi para sa iya kaugalingon kag sa tanan niya nga mga anak. (Roma 5:12) Subong resulta, nagakabuhi kita sa isa ka sistema sang kalibutan nga napain sa Dios, isa ka kalibutan nga dapat naton landason ang ginatawag sang Biblia nga “tion kag dimakita nga mga kahigayunan,” ang wala ginapaabot kag masami nga makapasubo nga hitabo sang kabuhi. (Manugwali 9:11) ‘Ginapatalang [ni Satanas] ang bug-os napuy-an nga duta.’ (Bugna 12:9) Ang iya una nga katuyuan amo nga patalikuron ang mga tawo gikan sa Dios. Sa amo nagapalapta sia sing malaw-ay nga kabutigan nahanungod sa Dios. Ang isa sina nga butig amo nga ginagamit sang Dios ang kamatayon agod kuhaon ang kabataan gikan sa ila mga ginikanan.

“Ano ang Paglaum Para sa Akon Anak?”

Sa baylo nga basulon ang Dios, dapat talupangdon sang namatyan nga mga ginikanan ang paumpaw nga ginatanyag sang Dios sa Biblia. Ginbilin sang butig nga relihion ang madamo nga nagumon sa kon diin kag kon ano ang kahimtangan sang ila napatay nga mga anak. Langit, impierno, purgatoryo, Limbo​—ining nanuhaytuhay nga mga destinasyon indi mahangpan kag makahaladlok. Sa pihak nga bahin, ginasugiran kita sang Biblia nga ang mga patay wala sing pangalibutan, sa isa ka kahimtangan nga mapaanggid sa pagtulog. (Manugwali 9:​5, 10; Juan 11:​11-14) Sa amo, indi dapat magkabalaka ang mga ginikanan sa kon ano ang matabo sa ila mga anak sa tapos sang kamatayon, subong nga wala sila nagakabalaka kon makita nila ang ila mga anak nga nagakatulog sing hamuok. Nagpamulong si Jesus tuhoy sa tion nga ang “tanan sa handumanan nga mga lulubngan” “magaguwa” sa isa ka napasag-uli nga kabuhi sa paraiso nga duta.​—Juan 5:​28, 29; Lucas 23:43.

Matuod, wala ginadula sang masanag nga paglaum ang tanan nga trahedya sang kamatayon. Si Jesus mismo naghibi sang mapatay ang iya abyan nga si Lazaro​—kag mga minuto lamang yadto antes niya ginbanhaw sia! Sa dimagkubos, ang kamatayon indi katapusan. Si Jesus kag ang iya Amay, si Jehova, lunsay nagadumot sa kamatayon. Ginatawag sang Biblia ang kamatayon “ang katapusan nga kaaway” kag nagasiling nga ini “laglagon.” (1 Corinto 15:26) Sa nagapakari nga Paraiso, kon ang paggahom ni Satanas mangin butang sang nagligad, ang kamatayon madula na sing dayon. Ang inosente nga mga biktima sini ibalik sang pagkabanhaw. Nian, kon ang mga ginikanan mahiusa liwat upod sa ila mga anak nga nadula nila sa kamatayon, sila sa katapusan makasiling, ‘Kamatayon, diin bala ang imo mga kalalat-an?”​—Oseas 13:14.