Isa ka Kalibutan sang Sugal

ANG mga slot machine masami nga ginatawag nga isa sing kamot nga tulisan. Apang indi kaangay sang matuod nga mga tulisan, wala nila ginakuha sing pilit ang kuwarta gikan kay bisan sin-o; ang mga tawo nagalinya kaangay sang mga karnero agod kuwartahan nila.

May yara mga 420,000 sini nga makina sa Republika Pederal sang Alemanya, nga masako sa pagkuha sing mga $900,000,000 gikan sa mga Aleman kada tuig. Lima ka milyon ka tawo didto ang nagahinguyang sing isa ka oras kada semana nga nagabubo sing kuwarta sa mga makina; 80,000 ka tawo ang nagahinguyang sing kapin sa lima ka oras kada semana sa sini.

Ang Espanya karon nagapabugal sing 750,000 ka slot machine. Ang sugal ginlegalisar didto sang 1977. Sang 1988, ang mga Espanyol nagagasto na sing $25,000,000,000 kada tuig sa tanan nga sahi sang sugal. Suno sa report, 200,000 ka Espanyol ang masupog nga mga sugarol. Ang mga Italyano nagsugal sing mga $12,000,000,000 sang 1989​—ukon mga $210 ang kada tawo, lakip ang kabataan. Sa isa lamang ka semana sang maaga nga bahin sang 1990, ang mga Italyano naggasto sing $70 milyones sa soccer nga hampang.

Ang mga sugarol sa Estados Unidos nagagasto sing kapin sa $200,000,000,000 kada tuig sa legal lamang nga porma sang sugal! Ang presidente sang isa ka kadena sang mga casino didto nagpabugal kasan-o lang: “Ang sugal amo ang pinakamadasig magtubo nga industriya sang pungsod, subong kadaku sa tuigan nga badyet sang [militar sang E.U.].” Ginpabangod niya ang gugma sang mga Amerikano sa sugal sa amo man nga “pilosopiko nga sugyot” kag kahanda sa pag-atubang sang mga katalagman nga nagtiklod sa mga manugtukib kag mga manuglagulad sa nagligad sang pungsod. Apang ang damgo sang sugarol nga magmanggaranon sa gilayon malayo gid sa tinuig nga pagpabalhas kag pagpakabudlay nga ginhugod sang mga manuglagulad kag mga manugpanguna sa ila pagpasimpalad.

Ang sosyologo nga si Vicki Abt nagsiling: “Ang mga loterya nagapanghikot sa ideya nga ang mga premyo wala sing kaangtanan sa imo mga panikasog.” Ina nga panghunahuna makahimo sing daku nga halit sa kalidad sang kabuhi. Utang, kaimulon, napierdi nga batasan sa pagtrabaho, nabungkag nga mga pamilya​—amo ini ang makapasubo nga mga resulta sang sugal. Para sa minilyon, nga ang nagadaku nga bahin sini mga tin-edyer, ang sugal nagadangat sa isa ka indi makontrol nga pagkasupog. Sa pagkamatuod, husto ang Biblia sa pagsiling nga “ang gugma sa kuwarta gamot sang tanan nga sahi sang makahalalit nga mga butang.”​—1 Timoteo 6:10.