Ang Pagtamod sang Biblia

Mga Kalamidad—Mga Silot Bala Gikan sa Dios?

SA Pilipinas, ang duta nga sulitsulit nga gin-igo sang kinaugali nga mga kalamidad, madamo nga tawo ang nagapalibog, ‘Ginatilawan bala sang Dios ang mga tawo paagi sa sina nga mga kalamidad?’ Sang 1991, pagkatapos sang labing makahalapay nga paglupok sang bulkan sa sining siglo, ang pangulong dinalan sang isa ka pamantalaan sa Pilipinas namangkot: “Ang Paglupok: Silot Bala sang Dios?”

Ang kolumnista nga si Nelly Favis-Villafuerte nagpabutyag sang amo nga pagtamod sang sia magsulat: “Walay sapayan, sa mga mapinatihon sa Biblia nga mga Cristiano​—may isa lamang ka rason: Ang paglupok sang bulkan sa Mount Pinatubo isa liwat ka langitnon nga pagduaw agod pahanumdumon kita nga may yara makapulunaw kag soberano nga Dios nga may nagapangibabaw nga gahom sa pagpanghikot kag palaabuton sang katawhan kag mga pungsod.” Bangod sining pagpangangkon, mamangkot kita:

Ginahukman Bala sang Dios nga Labing Gamhanan ang mga Kumunidad sa Karon?

Indi mapanghiwala nga ginhimo ini sang Dios sang nagligad. Ang mga halimbawa nga narekord sa Kasulatan subong sang Anaw sang adlaw ni Noe, sang pagkalaglag sang Sodoma kag Gomora, kag sa duha ka okasyon sang pagkahapay sang Jerusalem, ang siudad nga naangot sa iya halangdon nga ngalan, nagapakita nga ang Dios sarang makahukom sing hungod sa sadtong sulitsulit nga napaslawan sa pagsunod sa iya mga talaksan.​—Genesis 7:​11, 17-24; 19:​24, 25; 2 Cronica 36:​17-21; Mateo 24:​1, 2.

Apang kumusta sa karon? Gintagna ni Jesucristo sa Mateo kapitulo 24, Marcos kapitulo 13, kag Lucas kapitulo 21 nga magaabot ang tion sang bug-os kalibutan nga kalamidad. Sa sining mga kapitulo, naghatag sia sing matagnaon nga paandam tuhoy sa mga hitabo kag mga kahimtangan nga palatandaan sang katapusan sining sistema sang mga butang agod nga ang makatarunganon nga mga tawo makahangop nga sia dikitaon nga nagagahom na sa langit. Ining mga tagna nagakatuman karon. Dapat tandaan, walay sapayan, nga sa tagsa ka ginsambit nga mga paghukom, si Jehova nga Dios naghatag sing maathag, sulitsulit nga mga paandam antes mag-abot ang kalaglagan. (Amos 3:7) Walay sapayan, sa bahin sang kinaugali nga mga kalamidad nga nagakatabo sa aton tion, ang mga paandam masami nagahalin sa sekular nga mga awtoridad, pasad sa siyentipiko nga mga obserbasyon.

Dugang pa, ginapahibalo kita ni disipulo Santiago sa una nga kapitulo sang iya sulat, sa bersikulo 13: ‘Kay ang Dios indi masulay sang malaut kag sia gid wala nagasulay sa kay bisan sin-o nga tawo.’ Upod sa nagauswag nga populasyon sa bug-os nga kalibutan, ang tawo nagakabuhi sa madamo nga katalagman. Ang kakulang sing duog nga mapuy-an kag matamnan nagresulta sa pagkalbo sa madabong anay nga kagulangan, nga kon kaisa ginbangdan sang paglala sang pila ka kinaugali nga mga kalamidad halin sa mabunok nga ulan kag mabaskog nga baha.

Busa, sayop ang magsiling nga ang kinaugali nga mga kalamidad direkta nga ginapadala sang Dios subong silot sa mga tawo nga nagakabuhi sa mga duog nga naapektuhan. Ang matuod, sa tion sang kasisit-an makita nga madamo sang mga inosente, subong sang kabataan, ang labi nga nagaantos. Walay sapayan, bisan indi ang Dios ang ginatunaan sina nga mga kalamidad, makapamangkot gihapon kita:

May mga Leksion Bala Kita nga Matun-an sa Sini?

Huo. Sa mga duog nga naapektuhan, yara ang pagtilaw kon daw ano nga bili ang ginahatag nila sa materyal nga mga pagkabutang kon ipaanggid sa kabuhi mismo. Pila ka beses nga ang mga tawo naghimo sing makatalagam, dikinahanglanon nga mga tikang agod lamang hingagawon nga masalbar ang pila sang ila mga pagkabutang. Dapat naton dumdumon nga si Jesus nagsiling: ‘Bisan pa ang isa ka tawo may kabuganaan ang iya kabuhi indi resulta sang mga butang nga iya ginapanag-iyahan.’ (Lucas 12:​15) Sarang mailisan ang materyal nga mga butang, apang walay tawo nga makailis sang iya kabuhi.​—Mateo 6:​19, 20, 25-34.

Ginapahulag man sang kinaugali nga mga kalamidad ang mga indibiduwal sa pagbinagbinag kon paano sila nagakabuhi. Ginpalig-on ni apostol Pablo ang mga Cristiano nga mangin mahalungon sa ila pagkabuhi: “Nian tan-awa sing mainandamon kon paano kamo nagakabuhi indi subong nga indi maalam, kundi subong nga maalam, nga nagahimo sing labing maayo gikan sa krisis bangod nga ang mga adlaw malaut.” (Efeso 5:​15, 16, Byington) Ang tagsa ka pagtilaw nga masugata sang isa sa iya pagkabuhi isa ka pahanumdom kon daw ano ka importante ang pagtigayon sing malig-on nga pagtuo.

Ang ikatlo nga leksion nga matun-an naton gikan sa kinaugali nga mga kalamidad amo nga kinahanglan kita nga magpatubo sing daku nga kahanuklog, ukon empatiya, sa iban. Sa duog sang kalamidad, ang mahigugmaon nga pag-ulikid kinahanglan nga ipakita sa isa ka isigkatawo nga naapektuhan man sa baylo nga maghunahuna nga ang tagsa dapat mag-atipan sang iya kaugalingon. Amo gid sini ilabi na sa sadtong ginhatagan sing responsabilidad sa pag-atipan sa iban. Ginalaragway ni manalagna Isaias sila nga gintawag niya nga mga “prinsipe” subong ‘kaangay sang palalipdan nga duog sa hangin, palanaguan sa unos, subong sang mga ilig sang tubig sa duog nga kigas, subong sang landong sang daku nga igang sa duog nga makalalapyo.’​—Isaias 32:​1, 2.

Sa pagpakita sing kahanuklog sa tion sang mga kalamidad, may madamo nga okasyon nga makapaambit ang isa sang yara sa iya sa iban, sa pulong man ukon sa buhat. Halimbawa, ang paglupok sang bulkan nga Mount Pinatubo kag ang kaupod nga kahalitan sini naghatag sing dimaisip nga kahigayunan sa pagpakigbahin sa pagbulig sa sadtong mga nagpalalagyo sa kalamidad. Madamo ang wala sing makuhaan sang ila makaon sa adlaw-adlaw. Sa amo, ang tagsa ka indibiduwal sarang makapakita sang ila pagkaalwan paagi sa pagbulig sa iban. Apang madamo sa gihapon ang nagapalibog:

May Yara Bala Katapusan nga Paghukom sang Katawhan?

Huo, may yara, subong maathag nga ginapakita sa Pulong sang Dios. (Mateo 24:​37-42; 2 Pedro 3:​5-7) Antes mag-abot ina nga paghukom, isa ka bug-os kalibutan nga hilikuton sang pagpaandam ang dapat nga himuon, subong dugang nga gintagna ni Jesus: “Kag ang maayong balita kinahanglan nga ibantala anay sa tanan nga kapungsuran.”​—Marcos 13:10.

Gani, ang tagsa sa aton kinahanglan nga magpamangkot sa iya kaugalingon, ‘Ano ang himuon ko?’ Ginapalig-on namon kamo nga maghatag sang tion nga usisaon ang ginapalig-on sang Biblia nga himuon sang tagsatagsa sa aton agod nga makalampuwas sa sinang bug-os globo nga kalamidad.