Ang Pagtamod sang Biblia

Isa Bala ka Misteryo ang Dios?

“Ano ang misteryo? Sa kabilugan nga paghambal, ang misteryo isa ka kamatuoran nga sa kinaugali imposible nga mahangpan ukon mapamatud-an. . . . Ano ang relihioso nga misteryo? Isa ini sa mga kamatuoran tuhoy sa Dios nga obligado kita sa pagpati, bisan nga indi naton mahangpan ukon mapamatud-an. Ano ang mga pangunang relihiosong misteryo? Amo ini sila ang misteryo sang labing Balaan nga Trinidad, ang Pagpakatawo, kag ang Pagtubos.”​—Abrégé de l’exposition de la doctrine chrétienne, 1901 (Ginbag-o nga Pagpaathag sang Cristianong Doktrina)

ANG yara sa ibabaw amo ang pagsumaryo sang isa ka libro nga ginsulat sang pagsugod sang ika-20 nga siglo tuhoy sa pagtamod sang Iglesia Katolika Romana sa mga misteryo. Dugang pa, ginapakita sang kasan-o lang ginbalhag nga Guide des difficultés de la foi catholique (Tuytoy sa mga Kabudlayan sang Katolikong Pagtuo, 1989) nga makapainteres sa gihapon ini nga mga panudlo sa pagsiling: “Indi lamang bangod sang personal nga pagkaganyat sa indi maathag nga mga kamatuoran nga ginabaton sang Cristiano ang pagluntad sang pila ka misteryo sa iya relihioso nga Kredo. Kon ginapatihan niya sila, dapat nga napasad ini sing himpit sa Pulong sang Dios.” Apang ano ang ginasiling sang “Pulong sang Dios?” Isa bala ka misteryo ang Dios?

Mahibaluan Bala Naton ang Tanan Tuhoy sa Dios?

Ang Biblia nagahatag sa aton sing madamo nga detalye tuhoy sa Dios subong isa ka Persona, tuhoy sa iya mga kinaiya kag kon paano niya ginapakig-angutan ang mga tawo. Apang ginapaathag man sini nga ang iya kaalam kag ihibalo labaw sa kon ano ang mahangpan sang tawo. Gani, ang manalagna nga si Isaias nagsiling nga ang dalanon kag hunahuna sang Dios tuman kataas sang sa iya sang mga tawo.​—Isaias 55:​8, 9.

Ang pagkaimposible sa paghibalo sang tanan nga butang tuhoy sa Dios indi dapat magpakibot sa aton. Halimbawa, bisan pa ang aton ihibalo sa uniberso padayon nga nagauswag, ginabaton sang mga sientipiko nga indi gid nila matungkad ang mga misteryo sang pinakagamay ukon pinakadaku nga mga butang. Gani paano mahibaluan sing bug-os sang isa ka tinuga ang kadalumon sang kaalam sang Dios, sia nga amo ang Manunuga? Si Job nagsiling kay Jehova: “Mga butang nga tama ka makatilingala sa akon, nga wala ko mahibaluan.” (Job 42:​3; ipaanggid ang Roma 11:33.) Gani, sa pila ka paagi, ang bug-os nga ihibalo tuhoy sa Dios nagalabaw sa aton limitado nga paghangop. Walay sapayan, ang mga panudlo sang madamo nga iglesia nagalabaw sa mga latid sining simple nga mga pinanilagan.

Labaw ka Misteryoso sang sa Ginakinahanglan

Ang Katoliko nga insiklopedia nga Théo nga ginbalhag kasan-o lang nagasiling: “Sa mga panudlo sang iglesia, ang tinaga nga misteryo maaplikar man sa kon ano ang ginasugid sang Dios tuhoy sa iya kaugalingon, halimbawa, tuhoy sa iya pagluntad subong trinidad.” Subong sang sa iban pa madamo nga teolohikal nga libro, ang pagpati nga nagabangon diri amo nga ‘sanglit ang ihibalo tuhoy sa Dios misteryoso, indi magapakibot sa aton nga ang Dios isa ka Trinidad kag nga ining Trinidad isa ka misteryo.’ May basihan bala ini nga sahi sang pangatarungan?

Una, madamo nga libro ang nagabaton, subong sang The New Encyclopædia Britannica, nga “ang tinaga nga Trinidad, ukon ang masibod nga panudlo kaangay sini, indi makit-an sa Bag-o nga Testamento.” Dugang pa, ginapakita sang maragtas sini nga panudlo nga ginsimpon sini ang madamo nga mga ideya nga ginkuha sa pagano nga mga pilosopiya kag gin-angot sa mga kredo sang iglesia mga pila ka dekada pagkatapos sang kamatayon sang mga apostoles. Busa, wala sing mapag-on nga basihan nga ang misteryo sang Trinidad napasad sa Biblia.a

Hunahunaa ini: Sanglit nga imposible ang paghibalo sang tanan tuhoy sa Dios, makatarunganon bala para kay Jehova nga taguon ang iya identidad? Indi, luyag niya nga makilala sia sang tanan. (Juan 17:3; ipaanggid ang Hebreo 8:11.) Kag rasonable bala para sa sadtong luyag magpahamuot sa iya nga taguon ang iya identidad? Sa paglaragway: Kon ang lamang nga paagi sang isa sa pagtulok sang matahom nga talan-awon sang isa ka duog amo ang bintana, maalamon bala nga palubugon ang bintana, nga nagasiling: ‘Maayo pa nga palubugon naton ang bintana kay indi man naton makita sing maathag?’ Indi gid! Ginapakita sang Biblia kag sang maayong pangatarungan nga ang aton ihibalo tuhoy sa Dios kinahanglanon nga limitado lamang. Apang wala ginapakamatarong sini nga limitasyon nga lisuon naton ang aton ihibalo sa isa ka misteryoso nga panudlo, kaangay sang Trinidad, nga nagapagumon lamang sang aton pagkilala sa iya.

Mga Misteryo—Pagano kag Cristiano

Dugang pa, bisan ang tinaga nga “misteryo” makit-an sa Kasulatan, wala ini nagakahulugan sang “tinago nga ihibalo,” subong sang kinaandan nga paghangop. Subong husto nga ginapahanumdom sa aton sang Théo: “Ang tinaga nga misteryo wala sang kasubong sina nga kahulugan diri. Para sa mga Cristiano nagapahangop ini sing isa ka butang nga kinaandan nga natago, apang luyag sang Dios nga isugid ini sa ila . . . kag maeksperiensiahan nila.”

Ang Griegong tinaga nga my·steʹri·on (“misteryo,” ukon “balaan nga tinago”) gingamit sing 20 ka beses ni apostol Pablo sa isa ka pinasahi nga kahulugan. Gingamit niya ini sa pagpatuhoy sa isa ka balaan nga tinago nga madugay nga gintago apang ginbuyagyag sang Dios sang Iya ginpadala si Jesus sa duta. Si Jesucristo, ang Manunubos sang katawhan, amo ang panguna nga bahin sang ginsaad nga “binhi” nga gingamit sang Dios sa pagtubos sa katawhan, ang Isa nga ‘paagi sa iya ang tanan nga pungsod sa duta pakamaayuhon’ kag makatigayon sing mga kaupod nga manunubli sa langit. (Genesis 3:​15; 22:​18; Roma 8:17) Ining natago, ukon misteryoso, nga mga kamatuoran natago sa mga alagad sang Dios sa wala pa ang Cristianong panahon apang ginpahibalo ni Jehova sa nagakaigo nga tion. (Efeso 1:​9; Colosas 1:26) Sing makalilipay, ini nga kaalam wala ginhuptan para lamang sa pila ka mga pinili​—subong sa kaso sang relihiosong mga misteryo sa pila ka relihion​—kundi dapat ipahibalo nga wala sing pili sa pinakamadamo nga tawo nga malab-utan.​—Efeso 6:​19, 20.

Pagsimba sa Dios sa Kamatuoran

Ang Biblia nagaunod sing nagakaigo nga impormasyon agod nga masimba naton ang Dios sa paagi nga kalahamut-an sa iya. Malayo sa panudlo sang Trinidad, maathag kaayo nga ginapakita sini ang pagkasupremo ni Jehova kag ang manubo nga posisyon ni Jesus. Halimbawa, si Jesus nagsiling: “Ang Amay daku pa sa akon.” (Juan 14:​28; 1 Corinto 15:28) Ginapakita man sang Biblia nga ang balaan nga espiritu amo ang aktibo nga puwersa sang Dios, nga amo ang nagatuytoy sa iya matutom nga mga alagad.​—Binuhatan 2:​1-4.

Sang nagapakigsugilanon sa babaying Samariahanon, ginpakita ni Jesus nga agod mapahamut-an sang isa ang Dios, dapat nga magasimba sia sa Iya sa “espiritu kag kamatuoran.” Nagdugang sia nga “ang Amay nagapangita sang amo nga sahi sang nagasimba sa iya.” (Juan 4:​21-24) Salabton sang tagsatagsa sa aton ang magpangita sining sibu nga ihibalo nga magadala sa aton sing mga pagpakamaayo kon magsandig kita sa Pulong sang Dios sa baylo nga batunon ang hinimo-sang-tawo, misteryoso nga mga tradisyon nga nagadaya sa aton.

[Mga footnote]

[Picture Credit Line sa pahina 16]

Reserbado ang tanan nga kinamatarong