Ang Pagtamod sang Biblia

Kalautan​—Sin-o ang Balasulon?

SANG nagapasulod sia sa iya balay, namutikan niya dayon nga may indi maayo nga natabo. Ang maabtik nga pagpanghulonghulong sa palibot sang balay nagpamatuod sa iya daku nga suspetsa​—ang telebisyon, ang stereo, ang pila ka bayo, kag iban pa nga mga butang wala na. Nian, naglabad sa iya pensar ang makahaladlok nga panghunahuna, ‘Ano kon ang mga kawatan yara pa sa sulod sang balay?’ Nagdangop sia sa balay sang iya kaingod agod tawgan ang pulisiya. Huo, isa pa sia ka biktima sang krimen.

Kon wala pa ikaw makaeksperiensia sing krimen, mahimo may kilala ka nga nakaeksperiensia na sini. Isa ini ka eksena nga pirme ginaarte sa bug-os nga kalibutan sang nagapang-alag-ag nga mga artista. Suno sa surbe sang Committee on Crime Prevention and Control sang NU, ang kadamuon sang krimen nga ginareport mas madasig nga nagasaka sang sa mga ekonomiya kag populasyon sang pungsod.

Ang sinsero, bunayag nga mga tawo bisan diin nagakabalaka sa krimen, makahaladlok nga mga pagpatay, inhustisya, kag kagarukan nga nagakatabo sa kalibutan kag indi makagiho bangod sa kahadlok sa kasingki nga mahimo matabo. Madamo ang nagapamangkot, ‘Ngaa wala ini ginapunggan sang Dios?’

Maayo ina nga pamangkot, kag may sabat sa sina ang Biblia. Apang, agod maapresyar ang sabat, importante nga makilala naton ang ginahalinan, ang gamut nga kabangdanan, sang kalautan.

Indi Mabasol ang Dios

“May pagkadimatarong bala sa Dios?” pamangkot sang manunulat sang Biblia nga si Pablo. “Malayo ina!” sabat niya. (Roma 9:14) Apang mahimo ginabatyag sang iban nga sanglit ang Dios labing gamhanan, sia ang may salabton sa tanan nga nagakatabo. Indi subong sini. Binagbinaga: Ang isa ka arkitekto nagadesinyo sing isa ka matahom apang mapuslanon nga tinukod. Ang kalidad sang pagpatindog sini amo ang pinakamaayo, kag ang materyales nga gingamit amo ang pinakamaayo. Apang, ginguba kag gin-abusuhan sang mga umalagsa ang tinukod. Indi madugay daku nga kalay-uhon ang kinahanglan sini. Sa pagkamatuod magaugyon ka nga ang mga umalagsa, indi ang desinyador ukon ang manunukod, ang may salabton sa makapasubo nga kahimtangan sang tinukod! Amo man sa katawhan kag sa duta karon. Subong ginapaathag sang Deuteronomio 32:​4, 5, ang binuhatan ni Jehova himpit. “Ang tanan niya nga dalanon katarungan. Dios sang katutom, kag walay kalautan sa iya.” Sin-o, nian, ang balasulon sa daku nga kagamo sa duta karon?

Ang kasulatan nagapadayon: “Naghimo sila sing malaut . . . Sila ang may depekto.” Sa pagkamatuod, ang daku nga kagamo sa kalibutan karon amo ang direkta nga resulta sang kaluyahon, ukon ayhan, pagkabatinggilan sang katawhan. Apang, may isa pa, mas daku nga ginahalinan kag kabangdanan sang kalautan.

Ang Matuod nga Kabangdanan Ginbuyagyag

Sa Bugna 12:​9, aton mabasa nga si Satanas nga Yawa, “nga nagadaya sa bug-os napuy-an nga duta,” gintagbong sa palibot sang duta. Ang resulta? Ang bersikulo 12 sang amo gihapon nga kapitulo nagapadayon: “Kailo sa duta kag sa dagat, kay ang yawa nagpanaug sa inyo, sa dakung kasingkal, kay nahibaluan niya nga malip-ot na lamang ang iya tion.” Gani sia, ang daku nga Kaaway, ang nagasulsol sang mga inhustisya nga nagalapnag sa duta. Matuod, may mga indibiduwal nga nagakooperar sa iya mga panikasog; apang sia ang ginalaragway subong “manugpatay kutob sa ginsuguran.” (Juan 8:44) Ginapakita sang Kasulatan nga si Satanas nga Yawa amo ang gamut nga kabangdanan sang mga problema sang tawo. Indi lamang sia ang kabangdanan kundi sia ang padayon nga nagahimo sing kalautan, nagapabaskog sang iya mga panikasog sa sining “katapusan nga mga adlaw.” (2 Timoteo 3:​1-5, 13) Gani si Jehova nga Dios indi ang kabangdanan sang kalautan. Apang may pag-ulikid bala sia agod pauntaton ang pag-antos sang katawhan?

Pauntaton Bala sang Dios ang Kalautan?

Huo, may pag-ulikid sia, kag tapuson niya ang kalautan kag pag-antos. Dios sia sang gugma, kag subong isa ka mahigugmaon nga Amay, nahibaluan niya kag luyag niya nga ihatag ang mga kinahanglanon kag mga handum sang iya mga anak. (Salmo 145:​16; 1 Juan 4:​8-10) Nga ini wala pa mahimo sang Dios wala nagapakita nga indi sia interesado. Sa baylo, ang iya pagpugong kag pagpailob pamatuod nga sia labing gamhanan kag labing maalam. Nahibaluan niya ang labing maayo nga tion sa paglaglag sining malaut nga sistema sang mga butang, kag sa husto gid nga tion, himuon niya ini.

Ang kahimtangan sarang mapaanggid sa iya sang manugbata nga iloy. Samtang nalangkag sia sa pag-abot sang iya lapsag, nahibaluan niya nga indi sia dapat magkabalaka sing dinagakaigo. Nahangpan niya nga kinahanglan ang pila ka panahon agod magtubo sing bug-os ang bata sa sulod sang iya tiyan. Wala sing duhaduha, may kabalaka kag kabudlayan nga maeksperiensiahan samtang nagahulat, apang ang pag-abot sang isa ka mapagros, nagtubo sing bug-os kag kompleto sing pamulanon nga bata magahimo sang tanan nga pagkabalaka kag paghulat nga takus.

Gani, amo man sa mahimayaon nga bag-ong kalibutan sang paghidait nga ginlaragway sa Biblia. Magaabot ini dayon sa tapos mahilabtan sang Ginharian sang Dios ang ginahimo sang mga tawo, kag dulaon ang dimatarong nga kalibutan karon. Nian, ang tanan nga kalautan mangin butang sang nagligad. Ang pag-antos, kasakit, balatian, kag kamatayon​—ini tanan nga butang madula na. (Bugna 21:​3, 4) Ang isa nga may salabton sa tanan nga pag-antos dulaon man. Si Satanas kag ang iya mga demonyo, subong man ang mga indibiduwal nga nangin bahin sang iya sistema sang mga butang, indi makalikaw.​—Malaquias 4:​1; Bugna 20:​1-4.

Wala na sing dapat nerbioson sa pagpauli nga isahanon kaangay sang babayi nga ginsambit sa pamuno sining artikulo. Subong ginsiling niya kag sang iya bana: “Sa tapos makawatan ang amon balay, nagpatakod kami sing sistema sang alarma. Mga pila ka tuig na karon ang nagligad sugod sang makawatan kami, gani wala na kami nagakabalaka tanto. Apang nahibaluan namon nga sa palaabuton lamang, sa idalom sang Ginharian nga kahimusan sang Dios, maagom naton ang matuod nga paghidait kag kalig-unan.”

Tubtob wala pa nagapamanagbanag inang malapit na makita nga adlaw, dapat naton gamiton ang aton tion karon sing maalamon. Ginapangabay kita ni Pedro nga kabigon “ang pagpailob sang aton Ginuo subong kaluwasan.” (2 Pedro 3:15) Kag kaluwasan para sa iban man, kay samtang ginasugiran naton ang katawhan nahanungod sining matahom nga paglaum, ‘maluwas naton ang aton kaugalingon kag ang mga nagapamati sa aton.’ (1 Timoteo 4:16) Karon na ang tion nga pauswagon naton ang mga kinaiya nga magahimo sa aton nga mangin sahi sang katawhan nga magapuyo sa amo nga bag-ong kalibutan, nga sa diin ang kalautan mangin isa ka butang sang nagligad. (Salmo 37:​9-11) Dapat naton tun-an ang Biblia indi lamang agod pangitaon ang mga sabat sa aton mga pamangkot kundi matigayon man ang panuytoy nga kinahanglan naton agod ipahisanto ang aton kabuhi sa kabubut-on sang Dios.

[Piktyur sa pahina 14]

Paglaragway ni Doré kay Lucifer para sa Divine Comedy ni Dante