Kapin ka Mapuslanon sang sa Manggad nga Wala Ginpangabudlayan

ANG ginadangatan sang halos tanan nga sugarol amo nga mas imol pa sila sang sa antes sila nagsugod sa pagsugal. Sa masami, bisan ang pila lamang nga nakadaug sing daku nga kantidad nakasapo nga ang ila nadaug indi pasaporte sa kalipay.

Ang 36-anyos nga soltero sa Hapon nagdaug sing $45,000 sa isa ka loterya. Plano niya nga ibakal sing balay ang iya nadag-an, apang bangod ginkahisaan sia kag ginlibak, namat-od sia nga indi ini takus. Sa kakibot sang iya mga kaupod sa trabaho, ginsunog niya ang iya nagdaug nga tiket samtang nagatan-aw sila.

Sa Florida, gindakop sang mga pulis ang isa ka babayi nga, walay sapayan nga nakadaug sia sing $5 milyones sa isa ka loterya, nagplano sa pagpatay sa iya umagad nga babayi. Ang iya anak nga lalaki nagsiling nga daw naglain ang iya ulo kay ang iya manggad naubos bangod ginpuhunan niya ini sa sayop nga butang kag sobra ang iya paggasto.

Ang Napierdi nga Nagdaug

Si Domingo isa ka giyan nga sugarol kag may lima ka kabataan. Sia nagapaathag: “Kon nagdaug ako, mas nagalain ako. Pagdumdom ko isa ako ka henyo, kag daw indi ako makahulat sa pagbalik sa sugalan agod pamatud-an nga indi yadto isa ka aksidente lamang.

“Sang mahugakom ako sining sobra nga handum, daw subong bala nga nadroga ako. Handa ako nga biyaan ang akon asawa kag kabataan agod lamang makapadayon ako sa pagsugal. Bisan pa makapila na ako nanumpa sa akon asawa nga indi na ako magsugal liwat, nahibaluan ko sa akon tagipusuon nga ining mga panaad wala sing pulos. Madumduman ko pa nga kis-a ginpasalig ko ang akon asawa nga indi na gid ako magsugal liwat, samtang sa amo gid nga tinion, nagplano ako kon diin ako mangita sing kuwarta nga inugsugal.

“Napierdi ko ang tanan ko nga kuwarta, ang kuwarta sang akon asawa, kag ang akon negosyo, kag nalubong ako sa daku nga utang. Wala sing adlaw nga nagaligad nga wala ako nagapatad, tubtob may butang nga natabo nga nagpilit sa akon nga timbangtimbangon ang akon kaugalingon. Nagsugod ako sa pagtuon sang Biblia upod sa mga Saksi ni Jehova. Nahamuot ako sa akon natun-an, apang wala ko sa gilayon gin-untatan ang akon pagsugal. Nagapasalamat ako nga ang Saksi nga nagtuon upod sa akon tuman ka mapailubon.

“Apang wala magdugay ang mensahe sang Biblia nagsugod sa pag-epekto sa akon. Nakabulig ini sa akon nga biyaan ang akon ginadamgo nga kalibutan kag tamdon ang akon kaugalingon subong sang pagtamod sang Dios sa akon. Daw indi ako makapati. Nahuya gid ako, kaangay sadtong ginsulatan ni apostol Pablo sang unang siglo: ‘Ano, nian, ang mga bunga ninyo sadto anay? Mga butang nga inyo karon ginakahuya. Kay ang katapusan sadtong mga butang amo ang kamatayon.’​—Roma 6:21.

“Napahulag ako nga bag-uhon ang akon mga dalanon, nga hunahunaon ang iban sa baylo sang akon kaugalingon sang makilala ko ang Dios, ang iya ngalan, ang iya personalidad, kag labi na ang iya kaluoy. Sang ulihi nabugto ko sing bug-os ang akon bisyo sa pagsugal, kag ang akon asawa kag ako nabawtismuhan.

“Si Jesus nagsiling nga ang kamatuoran magahilway sa aton. (Juan 8:32) Matuod gid ina sa akon bahin. Ang kamatuoran sang Pulong sang Dios amo ang naghatag sa akon sing butang nga takus ikabuhi, nagpanumbalik sang akon pagtahod sa kaugalingon, kag naghatag sa akon sing daku nga kaayawan. Nabuligan ko pa gani ang isa sang akon mga abyan anay sa sugal nga bag-uhon ang iya kabuhi subong sang nahimo ko. Sang sia kag ang iya asawa ginbawtismuhan, nakahatag ini sa akon sing kakunyag nga labaw sa nahatag sang bisan ano nga nadaug ko sa sugal.

“Sa sulod sang nagligad nga 20 ka tuig, wala ako makapatad sing bisan ano, wala bisan sing diutay nga kantidad. Indi ko masiling nga nangin mahapos ini, apang indi man ini mabudlay. Kag ang mga kinahanglanon nga gintinguhaan ko nga matigayon paagi sa pagsugal ginhatag sa akon sang Dios sing labaw pa.”a

Importante gid ang Makasulatanhon nga pagtamod para sa mga nagahandum sa paghimo sang kabubut-on sang Dios. Kag indi lamang malikawan sang mga nagasunod sa laygay sang Dios ang kasubo nga ginadala sang pagsugal kundi masapwan man nila nga nagatanyag sia sing butang nga labaw pa sa bisan ano nga madaug sa sugal.

Manggad nga May Daku Pa nga Bili

Si Pablo, sang magsulat kay Timoteo sang unang siglo, nagsiling: “Tulini [sila] nga indi magbutang sang ila paglaum sa dimasaligan nga mga manggad, kundi sa Dios, nga nagahatag sa aton sing bugana sang tanan nga butang nga pagkalipayan. Sugiri sila nga maghimo sing maayo . . . , magmaalwan kag magmahinatagon, kag gani matigayon nila ang bahandi nga mangin maayong sadsaran sa palaabuton. Sa amo makapanguyat sila sa kabuhi nga amo ang kabuhi nga totoo.”​—1 Timoteo 6:​17-19, The New English Bible.

Ang isa ka bahandi nga dapat tigayunon amo ang maayo nga ngalan sa Dios. Magadul-ong ini sa “kabuhi nga totoo”​—kabuhi nga walay katapusan, ang labing daku nga padya nga natanyag. Si Jesus nagsiling sa pangamuyo sa Dios: “Ini nagakahulugan sing kabuhi nga walay katapusan, nga pagkilalahon ka nila, nga ikaw lamang ang matuod nga Dios, kag ang imo ginpadala nga si Jesucristo.”​—Juan 17:3.

Indi kaangay sang kuwarta nga mga padya nga indi masaligan, ang padya nga ginatanyag sang Dios sarang madaug sang bisan sin-o kag sang tanan nga nagahimo sang kabubut-on sang Dios. Dugang pa, ang paghimo sang kabubut-on sang Dios nagaaman sang tanan nga kakunyag nga ginahandum sang bisan sin-o, kag nagahatag ini sa isa ka tawo sing pagtahod sa kaugalingon kag sing makahulugan nga kabuhi. Samtang, bangod sang mapait nga bunga sang pagsugal, dumduma ang laygay sang isa ka dumaan nga Ingles nga hulubaton: “Ang labing maayo nga paghaboy sa dais amo nga ihaboy ini.”

[Mga footnote]

[Piktyur sa pahina 10]

Ang kabuhi nga walay katapusan sa paraiso nga duta isa ka daku gid nga padya sang sa bisan ano nga natigayon paagi sa pagsugal