Dapat Bala Magsugal ang mga Cristiano?

DAPAT bala magsugal ang isa ka Cristiano sa pagtinguha nga makatigayon sing kuwarta nga wala ginpangabudlayan? Indi, kay ang Pulong sang Dios nagapalig-on sa iya nga magtrabaho agod maamanan ang iya kaugalingon kag ang iya pamilya: “ ‘Kon sin-o ang indi magpangabudlay, indi sia pagpakan-a.’ . . . Sa pagpangabudlay sa kalinong dapat sila magkaon sing kalan-on nga ila ginpangabudlayan.”​—2 Tesalonica 3:​10, 12.

Gintawag sang isa ka sosyologo ang loterya nga ‘isa ka paagi nga ginapamanggaranon sang madamo nga imol ang pila ka tawo,’ kag matuod ini sa sugal sa kabilugan. Luyag bala sang isa ka Cristiano nga magmanggaranon sa kahalitan sang iban nga indi makasarang sini? Ang Cristiano dapat ‘maghigugma sa ila mga isigkatawo subong sang ila kaugalingon.’ (Marcos 12:31) Apang ang sugal nagapukaw sang kakagud sa baylo sang gugma, indi pagsapak sa baylo sang kaluoy.

Ang masami nga motibo sang pagsugal amo ang pagkamahamkunon​—kakagud—​isa ka espiritu nga batok sa Cristianismo. Sa Roma 7:​7, si Pablo nagsiling: “Dili ka maghamkon.” Ang tinaga nga “paghamkon” nagakahulugan sing “pagkalangkag, paghandum.” Wala bala ina nagalaragway sang daku nga handum sang sugarol nga madaug ang kuwarta sang iya isigkatawo? Ina nga handum wala nagahisanto sa Cristianong talaksan nga magpaambitay kag maghinatagay.

Ang Biblia nagasiling: “Ang gugma sa kuwarta amo ang gamut sang tanan nga sahi sang makahalalit nga mga butang, kag sa pagtinguha sa sining gugma ang iban . . . nagbuno sang ila kaugalingon sing madamo nga kasakitan.” (1 Timoteo 6:10) Ginalaragway sini ang kahimtangan sang isa ka giyan nga sugarol, naulipon sang isa ka bisyo nga nagabuno sa iya sing masakit, sa liwat kag liwat.

Si Jesus nagsiling nga ang mga tawo makilala paagi sa “ila mga bunga.” (Mateo 7:20) Luwas sa kabudlayan nga gin-antos sang giyan nga mga sugarol kag sang ila mga pamilya, ang pagsugal madugay na ginaangot sa pagkadibunayag kag sa krimen. Ang The New Encyclopædia Britannica nagasiling: “Ang daku nga bahin sang kahuy-anan sang pagsugal naghalin sa pagkadibunayag sang mga sumalakdag sini.” Ang organisado nga krimen gin-angot sa legal kag dilegal nga pagsugal. Luyag bala sang isa ka Cristiano nga sakdagon ini nga industriya, bisan sing indi direkta?

Subong ginpaathag sa ikaduha nga artikulo sining mga serye, ang pagsugal masami nga nagadalahig sing disparatis nga pagtinguha sa swerte nga mga numero, swerte nga mga adlaw, ukon swerte nga mga pagdaug sing pasunod. Si Lady Luck ginapahamut-an sa sulod sang mga siglo sang mga sugarol agod matigayon ang iya pabor. Gintawag sia nga Fortuna sang mga Romano, kag sa siudad sang Roma sang ulihi may 26 ka templo nga ginpatindog sa iya kadungganan.

Si manalagna Isaias nagpatuhoy sa kaanggid man nga diosa, nga gintawag gadh, nga ginsimba sang apostata nga mga Israelinhon. Sia nagsulat: “Nagabiya kamo kay Jehova, . . . nga nagaaman sing latok para sa dios sang Maayong Swerte [Hebreo, gadh].” (Isaias 65:11) Sa katapusan nga adlaw sang tuig, isa ka kinabatasan nga mag-aman para sa dios sang Maayong Swerte sing latok nga puno sing nanuhaytuhay nga sari sang kalan-on. Sa sining paagi ang mga tawo sang dumaan nga panahon naglaum nga makatigayon sing maayong swerte sa tuig nga magasunod.

Ang Dios wala mahamuot sa mga tawo nga sing walay hinalung-ong nagsalig kay gadh, ukon kay Lady Luck, sa paglubad sang ila mga problema. Ang pagsandig sa swerte pareho lang sa pagbiya sa matuod nga Dios, nga si Jehova. Sa baylo nga magsandig sa indi masaligan nga kapritso ni Fortuna, ang mga Cristiano dapat magsalig sa matuod nga Dios, si Jehova, ang Isa nga nagasaad sa aton sing kamanggaran nga may daku pa nga bili, ang Isa nga indi gid magapaslaw sa aton.