Ngaa May Subong Sina ka Malangkagon nga Pagpaabot sa Bag-ong Kalibutan?

Ang Katapusan sang Kalibutan​—Daw Ano Kalapit?

ANO ang buot silingon sang katapusan sining kalibutan? Kalaglagan sang duta paagi sa kalayo, subong sang ginatudlo sang iban nga mga relihion? Indi; paano ina matabo, samtang ang Salmo 104:5 nagasiling: “Indi ini mationg tubtob sa tion nga walay pat-od, ukon tubtob sa walay katubtuban?”

Ang sabat ginapahayag kon magbalikid kita sing madamo nga siglo sa isa ka kalibutan nga nauna sa sining isa. Nangin malaut ini kag nagrebelde sa Dios, gani “ang kalibutan sadto anay nalaglag sang ginlapawan ini sang tubig.” Apang sang ang sadto nga kalibutan, nga ginhuman sang mga langit kag duta, ginlaglag sang Anaw sang adlaw ni Noe, ang literal nga mga langit kag duta wala magtaliwan. Sa amo ang katapusan sining kalibutan wala man nagakahulugan sing malaglagon nga kalaglagan para sa mabituon nga mga langit kag sa planeta nga Duta.​—2 Pedro 3:​5, 6; Genesis 6:​1-8.

Kon kaisa ginagamit sang Biblia ang mga termino nga “mga langit” kag “duta” sa malaragwayon nga mga paagi. Ang “mga langit” mahimo gamiton sa pagpatuhoy kay Satanas, ang dios sining kalibutan; sa mga manuggahom sang kalibutan nga iya ginakontrol; kag sa malaut nga mga espiritu sa langitnon nga mga duog​—tanan ini may demonyohanon nga impluwensia sa katawhan. (2 Corinto 4:4; Efeso 6:12) Ang “duta” masami ginagamit sa pagpatuhoy sa katawhan sa duta. (Genesis 11:1; 1 Hari 2:​1, 2; 1 Cronica 16:31; Salmo 96:1) Amo ining simbuliko nga mga langit kag duta sining karon nga malaut nga kalibutan ang ginasiling sang 2 Pedro 3:7 nga laglagon paagi sa “kalayo.”​—Galacia 1:4.

Nian ginahatag ni Pedro ang makalilipay nga balita nga ining daan nga kalibutan pagaislan sing bag-o: “May yara bag-ong mga langit kag bag-ong duta nga ginahulat naton suno sa iya saad, kag sa sini magapuyo ang pagkamatarong.”​—2 Pedro 3:13.

Isa ka Bag-ong Kalibutan nga Wala sing mga Luha Ukon Kamatayon

Ang ginsiling ni Pedro nga ang pagkamatarong magapuyo sa sinang bag-ong kalibutan isa ka makalilipay nga balita, apang ang ginadugang ni Juan tuhoy sini nagahimo sini nga makapaudyak gid! Tuhoy sini sia nagasiling sa Bugna 21:​3, 4: “Sa sina nabatian ko ang isa ka mabaskog nga tingog gikan sa trono nga nagasiling: ‘Yari karon! Ang kayangkayang sang Dios upod sa mga tawo, kag magapuyo sia kaupod nila, kag sila mangin iya katawhan. Kag ang Dios gid magaupod sa ila. Kag pahiran niya ang tagsa ka luha sa mga mata nila, kag wala na sing kamatayon, ukon kalisod ukon paghibi ukon kasakit pa. Ang nahaunang mga butang nagtaliwan.’ ”

Sa baylo nga laglagon ang duta paagi sa kalayo, katuyuan ni Jehova nga puy-an ini sing dayon: “Amo ini ang ginasiling ni Jehova, ang Manunuga sang mga langit, Sia nga matuod nga Dios, ang Taghuman sang duta kag ang Tagbuhat sini, Sia ang Isa nga nagpalig-on sini, nga wala magtuga sini sa walay pulos, kundi agod puy-an ini.”​—Isaias 45:18.

Ang pagkamatarong magapuyo didto bangod wala sing dimatarong nga mga tawo ang mangin didto: “Ang matadlong magapuyo sa duta, kag ang himpit magapabilin sa sini. Apang ang malauton utdon gikan sa duta; kag ang maluib gabuton sa sini.”​—Hulubaton 2:​21, 22.

Sa idalom sang inspirasyon, si salmista David nagapamatuod man sa sini: “Kay sa diutay pa nga tion, kag ang malauton wala na; kag talupangdon mo sa pagkamatuod ang iya duog, kag wala na sia didto. Apang ang mga mahagop magapanag-iya sang duta, kag sila sa pagkamatuod makasapo sing daku nga kalipay sa kabuganaan sang paghidait.”​—Salmo 37:​10, 11.

Ginapalig-on ini mismo ni Jesus, nga nagasiling sa iya Wali sa Bukid: “Malipayon ang mga malum-ok sing hunahuna, kay panublion nila ang duta.” Tuhoy sa ila panguluhan, ining mga mahagop pagahatagan subong pagpakamaayo sing matarong nga bag-ong mga langit nga ila ginapangamuyo: “Magkari ang imo ginharian. Paghimuon ang imo kabubut-on, subong sang sa langit, amo man sa duta.”​—Mateo 5:5; 6:10.

Ang himpit nga paghidait nga maagom sang mga pumuluyo sinang bag-ong kalibutan magaluntad man sa duog sang mga sapat: “Ang lobo magapuyo kaupod sang kordero, kag ang leopardo magaluko kaupod sang kanding nga tinday, kag ang tinday nga baka kag ang leon nga totoy kag ang pinatambok magatingob; kag ang bata magatuytoy sa ila. . . . Indi sila maghalit ukon maglaglag sa bug-os ko nga bukid nga balaan; kay ang duta matugob sang pagkilala kay Jehova subong nga ang mga tubig nagatabon sang dagat.”​—Isaias 11:​6-9.

Daw Ano Kalapit?

Kon may huyog ikaw sa pagkabig sini subong isa ka paglaum nga indi matigayon, tuman kaayo nga indi mapatihan, magdulog liwat kag magbinagbinag. Dugang sa mga bahin sang kabilugan nga tanda sang presensia ni Cristo Jesus, yara ang kronolohiya sang Biblia nga nagtudlo sa 1914 subong amo ang pamuno sang iya presensia. Ginbantala sang mga Saksi ni Jehova ang petsa nga 1914 subong isa ka importante nga tuig sa pagsugod sang paggahom sang Ginharian ni Jehova sa duta, paagi sa Watch Tower nga magasin sang Hulyo 1879. Madamo nga mga istoryador kag mga manugpanilag sa mga nagakatabo sa kalibutan ang nakatalupangod nga ang tuig 1914 nagpasulod sing isa ka bag-o gid kag importante nga panahon sa maragtas sang tawo, subong ginapakita sang kaupod nga kahon.

Ang isa pa ka hitabo nga ginhatag ni Jesus masapwan sa Mateo 24:​21, 22: “Nian magaabot ang dakung kapipit-an nga wala pa sing subong nga nahanabo kutob sa ginsuguran sang kalibutan tubtob karon, wala, kag indi na gid mahanabo. Sa pagkamatuod, kon wala mapalip-ot yadtong mga adlaw, wala kuntani sing tawo nga maluwas; apang bangod sa mga pinili palip-uton yadtong mga adlaw.”

Ginpakita man ni Jesus nga ining kabilugan nga tanda makompleto sa sulod sang pagkabuhi sang kaliwatan nga nakakita sini nga nagsugod sang 1914. Sa Mateo 24:​32-34, sia nagsiling: “Karon gikan sa higuera subong paanggid tun-i ninyo ini: Kon ang iya sanga manglumbay, kag manghumlad ang iya mga dahon, mahibaluan ninyo nga malapit ang tingadlaw. Amo man, kon makita ninyo tanan ining butang, mahibaluan ninyo nga sia malapit, sa mga gawang na. Sa pagkamatuod nagasiling ako sa inyo nga ining kaliwatan indi magtaliwan tubtob nga tanan ining butang matuman.”

Ang makita ining daan nga kalibutan​—upod ang tanan nga inaway sini, mga tiggulutom, mga balatian, kag mga kamatayon—​nga wala na tanan mangin isa ka kabangdanan sang pagkasadya. Ang makita ini nga naislan na sang bag-ong kalibutan sang pagkamatarong ni Jehova nga Dios​—wala na sing kalisod, mga paghibi, balatian kag kamatayon—​mangin kabangdanan sang walay katapusan nga pagkasadya kag pagkalipay kag sang walay katapusan nga pagdayaw kay Jehova nga Dios, ang Dungganon nga Manunuga kag Bug-os Uniberso nga Soberano.

Bangod sining palaabuton, indi katingalahan nga madamo ang malangkagon gid nga nagapadali sang bag-ong kalibutan sang pagkamatarong ni Jehova kag islan ining daan nga puno sing kasubo, krimen, balatian, kag kamatayon! Indi katingalahan nga ang ila kalangkag tuman kadaku nga nahuyog sila sa pagtalana sing maaga nga mga petsa para sa pag-abot sang bag-ong kalibutan! Apang, sa karon ang tanda sang pagkari sini indi pila lamang ka bahin nga masulay kita sa pagpalanog sing sayop nga mga alarma. Makita naton sa karon ang kabilugan nga tanda nga nagapahayag agod maghatag sing malig-on nga sadsaran para sa aton malangkagon nga pagpaabot sa katapusan sining malaut nga kalibutan kag agod magbulos ang bag-ong kalibutan ni Jehova.

[Kahon sa pahina 11]

1914—Isa ka Daku nga Pagbag-o sa Maragtas

BISAN sa tapos sang ikaduha nga inaway kalibutanon, madamo ang nagapatuhoy sa 1914 subong ang daku nga pagbag-o sa modernong maragtas:

“Sa pagkamatuod ang tuig 1914 sa baylo sang Hiroshima ang nagatanda sang daku nga pagbag-o sa aton tion.”​—René Albrecht-Carrié, The Scientific Monthly, Hulyo 1951.

“Kutob sang 1914, ang tanan nga nagabantay sang mga huyog sa kalibutan natublag gid sang daw isa ka gintalana kag ginpat-od nga pagpakadto sa daku pa nga kalamidad. Madamo sang serioso nga mga tawo ang nagbatyag nga wala na sing mahimo agod punggan ang pagtugdang padulong sa kalaglagan.”​—Bertrand Russell, The New York Times Magazine, Septiembre 27, 1953.

“Ang modernong dag-on . . . nagsugod sang 1914, kag wala sing bisan sin-o ang nakahibalo kon san-o ukon kon paano ini matapos. . . . Mahimo ini matapos sa tingob nga kalaglagan.”​—The Seattle Times, Enero 1, 1959.

“Ang bug-os nga kalibutan naglupok sang Inaway Kalibutanon I kag wala gihapon kita makahibalo kon ngaa. . . . Ginapanan-aw na sadto ang makalilipay nga panahon. May paghidait kag kabuganaan. Nian ang tanan naglupok. Sugod sadto yara kita sa isa ka kahimtangan sang paghawathawat.”​—Dr. Walker Percy, American Medical News, Nobiembre 21, 1977.

“Sang 1914 nadula sang kalibutan ang paghiusa nga wala na sini mabawi kutob sadto. . . . Natabo ang isa ka tion sang tumalagsahon nga kagamo kag kasingki, sa tabok sang pungsudnon nga mga dulunan kag sa sulod sini.“​—The Economist, London, Agosto 4, 1979.

“Ang tanan magaayo kag magaayo pa. Amo ini ang kalibutan nga akon natawhan. . . . Sa hinali, sa wala ginapaabot, sang isa ka aga sang 1914 ang bug-os nga butang natapos.”​—Britaniko nga manghimanwa nga si Harold Macmillan, The New York Times, Nobiembre 23, 1980.

[Retrato sa Pahina 10]

Bug-os nga paghidait para sa tanan sa ginsaad nga bag-ong kalibutan