Holocaust Museum kag mga Saksi ni Jehova
ANG makakulugmat nga paggahom sang mga Nazi makasiligni nga nagpamatay sing minilyon ka biktima, labi na mga Judiyo kag mga Slav. Apang, ang isa ka relihioso nga grupo—ang mga Saksi ni Jehova—may paghiusa nga nagdumili sa pagpasakop sa paggahom sang mga Nazi, indi bangod sang rasa ukon nasyonalidad, kundi bangod sang ila bug-os nga pagsunod sa mga prinsipio sang Biblia.—Juan 17:14, 16.
Mabaskog nga ginhingabot sang Estado sang mga Nazi ang mga Saksi ni Jehova—isa ka pagsalakay nga indi proporsion sa ila kadamuon. Ngaa? Ang mga Saksi, bangod sang relihioso nga mga rason, nagdumili sa pagbuylog kag sa pag-alagad sa German Labor Front kag sa pagpanumpa kay Hitler subong Führer. Gani gindumilian sila sang mga Nazi subong isa ka organisasyon sang Abril 1933. Gin-akusar sing sibil kag relihioso nga paglalis, lakip sila sa una nga mga grupo nga ginlupot sa mga kampo konsentrasyon. “Sang ulihi, kapin sa 30,000 ka Saksi ang ginhingabot sang mga Nazi,” siling sang isa ka sulat sang balita sa museo.
Ang Holocaust Memorial Museum sang Estados Unidos, nga nahamtang sa Washington, D.C., gindedikar sa pagpresentar sang sugilanon sang tanan nga grupo nga ginhingabot sang mga Nazi, lakip ang mga Saksi ni Jehova. Ang isa ka awtoridad nagasiling nga ang museo “dapat mangin interesante ilabi na para sa mga Amerikano kag sa tagaluwas nga mga bisita sang Judiyo kag mga Saksi ni Jehova nga mga relihion nga gintinguhaan nga papason sang paggahom ni Hitler.” Paagi sa mga artifact, mga dokumento, mga testimonya sang mga Saksi nga nakuhaan sing video, maragtason nga mga retrato, kag mga pelikula sini, ang mga eksperiensia sa inaway sang nanuhaytuhay nga mga grupo nga nabiktima nalakip sa eksibisyon, librarya, kag mga archive sang museo. Ang museo may videotape nga interbyu sa 74 ka Saksi ni Jehova nga biktima sang paggahom sang mga Nazi. Ang museu ginbuksan sa publiko sang Abril 1993.
[Piktyur Credit Line sa pahina 31]
Sa maayong kabubut-on sang Holocaust Memorial Museum sang Estados Unidos