Isa ka Safari Sakay sa Bus Padulong sa Sentro sang Australia
Sang koresponsal sang Magmata! sa Australia
NAKAPANAKAYON ka na bala sa isa ka suba nga madamo sing buaya? Natilawan mo na bala ang pagkinanta sa idalom sang kasanag sang bulan ginatos ka milya ang kalayuon gikan sa sibilisasyon? Nakatambong ka na bala sa Cristianong mga miting samtang nagabiyahe sa highway sa kadasigon nga 100 kilometros kada oras? Ina nga mga eksperiensia isa lamang ka halimbawa sang inagihan sang ginatos ka delegado gikan sa nanuhaytuhay nga mga lokalidad nga nagsakay sa bus subong safari padulong sa isa ka distrito nga kombension sang mga Saksi ni Jehova sa Alice Springs sa mainit nga sentro sang Australia.
“Ang tinaga nga ‘safari’ nagakaigo,” siling sang isa ka delegado, “kay nagatulog kami sa wayang sa mga tolda nga igo para sa duha ka tawo. Sang makalab-ot kami sa Alice Springs, napatindog namon ang amon mga tolda sing kubos sa tatlo ka minutos! Daw subong ini sang pagtan-aw sing video nga ginpaabante sing madasig: Ang mga bus nagdulog, kag sa hinali nag-inulhot sa mahawan nga parke ang dinosena ka diutay nga mga tolda.”
Malipayon nga Pag-abot sa “Alice”
Ang Alice Springs isa ka mauyahon nga duog sa tunga sang mapula nga desyerto. May populasyon ini nga 23,000 kag nahamtang sa bagatnan lamang sang geograpiko nga sentro sang kontinente sang Australia. Isa ini karon ka sentro sang mga turista nga ginagamit ang tumandok nga katawhan sang Australia kag ang ila tumalagsahon nga taliambong subong amo ang pinakatema sini.
Apang, para sa mga Saksi, ang pinakadaku nga butang sang ila bug-os nga safari amo ang tatlo ka adlaw nga kombension. Para sa iban sa ila, nangin isa ini ka kahigayunan sang madamong makalilipay nga reunyon. Ang isa ka tasa sang mainit nga tsa amo ang isa sang mga simbulo sang pagkamaabiabihon sa nabaw-ing nga bahin sang Australia, kag ginpadayon sang kombension ining kinabatasan paagi sa pagpatindog sing tolda para sa billy tea kag damper nga pamahaw. Ang billy tea isa lamang ka tsa nga ginapabukalan sa kalayo nga gindabok sa wayang kag nasulod sa nag-itom sa aso nga lata nga ginatawag billy. Kon kaisa ang nagabukal nga tubig ginalugay sing sanga sang kahoy nga eucalipto, ukon gum, samtang ang mga dahon sang tsa ginasulod sa billy. Ang sanga sang eucalipto ginapabalabag sa ibabaw sang billy agod indi maasuhan ang tsa.
Ang damper isa ka simple nga sahi sang tinapay. Ang lamang nga mga ingrediente nga kinahanglanon amo ang nagaalsa sa kaugalingon nga harina kag tubig kag asin. Samtang mainit pa, ang damper ginakihadkihad sing madamol kag dayon ginapalhitan sing madamo nga mantikilya kag molases. Ang tolda nga palamahawan sing billy tea kag damper amo ang isa sang pirme ginatipunan nga mga duog sa palibot sang kombension.
Matutom nga Nagaalagad Bisan Napain
Ang Alice Springs Congregation ginahuman sang 72 ka Saksi kag nagaatipan sang mga 200,000 kilometros kuwadrados. Ang Darwin mga 1,800 kilometros sa aminhan, kag ang Adelaide halos 1,600 kilometros sa bagatnan. Nakibot ang nagaduaw nga mga delegado nga makita kon daw ano ka makahalangkat ang magpuyo sa nabaw-ing nga duog bangod sang daku nga kalayuon, wala nagakanay nga init, yab-ok, kag napain.
Ang isa ka talalupangdon nga halimbawa amo ang minahan sing uranium nga banwa sang Jabiru. Isa lamang ka Saksi ang nagapuyo diri, kag 260 kilometros ang kalayuon niya gikan sa pinakamalapit nga kongregasyon. Apang, ang iya kalayuon wala magpaluya sang iya espirituwalidad. Ang iya pagtambong sa kombension nangin makapalig-on sa madamo nga iban pa. Subong man, gikan sa nabaw-ing nga komunidad sang mga Tumandok sa Jilkmingan, sa punta sang Arnhem Land sa Naaminhan nga Teritoryo, apat ka estudyante sang Biblia ang naglakbay agod malakip sa 26 nga ginbawtismuhan sa sining kombension.
Ginapasiga sang mga Delegado ang Ila Kapawa
Sang matapos ang kombension, ang tanan nga bus nagpadulong sa aminhan sa ibabaw nga punta sang kontinente sang Australia. Ang daku nga butang sini nga bahin sang safari amo ang pagpanakayon sa matab-ang, matin-aw nga katubigan sang Katherine Gorge pakadto sa bantog nga Kakadu National Park. Naghatag ini sa mga manuglakbay sing kahigayunan nga makita sa una nga tion ang mga buaya sa ila kinaugali nga palibot. Makawiwili, apang makahaladlok diutay! Nian, sa tapos magpaligad sing matahom nga gab-i sa kapital nga siudad sang Naaminhan nga Teritoryo, ang Darwin, ang masunod nga gindulugan sang safari amo ang Mataranka Station, kilala sa mainit sing tubig kag matin-aw nga mga tuburan kag mga pool nga napalibutan sa higad sing mga palma.
Apang, wala nawasi ang espirituwal nga mga hilikuton bangod sang pagduaw sa matahom nga mga duog. Ang mga bus ginhimo nga nagalakat nga mga Kingdom Hall. Ang isa ka teksto sang Kasulatan kag ang naimprinta nga mga komento ginahambalan kada adlaw, kag ang kinaandan nga mga miting sang kongregasyon kada semana ginahiwat samtang yara sa dalanon. Ang isa sang mga tsuper sang bus nga indi Saksi nahamuot gid sa bagay nga, sa iya kaugalingon nga inisyatibo, nagbakal sia sing extension cord, mikropono, kag plug agod ikonektar sa ispeker sang bus agod ang mga nagakomento sa tion sining mga paghambalanay mabatian sing kapin kaathag.
Sa tion sang tour, nagmasakit sing grabe ang isa ka tigulang nga manuglakbay amo kon ngaa kinahanglan nga dalhon sia sa isa ka lokal nga ospital. Gin-updan sia sang isa ka abyan, apang ang mga bus nagpadayon. Duha ka adlaw sang ulihi, sang mag-ayo na sia, sia kag ang iya kaupod nangasubo gid kag nalugaw-an kay nawasi nila ang nabilin nga bahin sang safari. Apang bangod sang Cristianong gugma, wala magdugay ang ila kasubo.
Nabatian sang duha ka lokal nga Saksi nga mga piloto ang kahimtangan. Nian madasig nga natabo ang mga butang. Wala madugay sila nga apat nagasakay na sa isa ka gamay nga eroplano, padulong sa banwa sang Port August agod hingabutan ang mga bus. Ang isa sang mga manuglakbay nga natandog ang balatyagon nagtuaw: “Puno kami sing gugma kag apresasyon sa amon dalayawon nga paghiliutod!” Apang indi lamang amo sini tanan. Pag-abot sang eroplano, ang pila ka delegado boluntaryo nga nag-amot agod maulian ang nagasto sang mga piloto! Ang tsuper sang bus natandog sining utudnon nga gugma, kag nagsiling nga wala pa sia makakita sing kaangay sini.
“Sa pagbinagbinag sang tatlo ka semana nga ginhinguyang sa paglibot sa Alice Springs,” siling sang isa sang mga manuglakbay, “nasapwan ko nga amo ini ang akon labing makapabakod kag makapalig-on sing pagtuo nga eksperiensia. Ang nagapangibabaw amo ang espiritu sang pag-updanay nga amon tanan ginkalipayan. Indi importante kon diin kami nagkadto—ang matuod nga bahandi amo ang amon paghiusa sa hunahuna kag espiritu!”
[Mapa sa pahina 18]
(For fully formatted text, see publication)
Mga ruta sang pagpamasyar sang safari pakadto kag gikan sa kombension sa Alice Springs
Western Australia
Northern Territory
Queensland
New South Wales
South Australia
Victoria
Tasmania
Darwin
Perth
Alice Springs
Brisbane
Sydney
Adelaide
Melbourne
Hobart
Uluru (Ayers Rock)
Port Augusta
Kakadu National Park
[Retrato sa Pahina 16, 17]
Ang mga tumandok nalakip sa mga nagahulat sang bawtismo sa distrito nga kombension sa Alice Springs
[Retrato sa Pahina 17]
Kalayo nga gindabok sa wayang para sa billy tea kag damper
[Retrato sa Pahina 17]
Buaya nga nagapainit sa adlaw sa Kakadu National Park
[Retrato sa Pahina 18]
Uluru (Ayers Rock) 470 kilometros sa bagatnan-katundan sang Alice Springs
Kinaandan nga danyag sa Kakadu National Park sang Naaminhan nga Teritoryo