Gikan sa Amon mga Bumalasa

Paghatag sa Panahon sang Krismas Ang artikulo nga “Something Better Than Christmas Giving” (Disiembre 22, 1992, Awake!) nagpaathag sang isa ka kontrobersial nga tema sing maathag, apang may dakung taktika. Halin gid sa umpisa, kalahamut-an ini sa tagsa ka bumalasa, relihioso man ukon indi. Dugang pa, wala sing patarasak nga pagkondenar sa tanan nga butang nga may kaangtanan sa Krismas. Ining kalahamut-an nga presentasyon makalilipay basahon kag itanyag sa amon pagbantala nga hilikuton.

T. T., Alemanya

Ginpakita gid sing artikulo sa akon kon ano ang mas maayo sangsa mga regalo kon Krismas, nga amo, ang gugma sang akon mga ginikanan kag ang ila tinagipusuon gid nga paghatag. May problema man ako sa pagpaathag sa akon klase kon ngaa kita nga mga Saksi ni Jehova wala nagasaulog sing “St. Nicholas’ Day” kag sing Krismas. Sa bulig sining artikulo, makahatag ako sing maayong paathag.

S. H. S., Alemanya

Mga Celta Ang inyo artikulo nga “The Celts​—Their Influence Still Felt” (Septiembre 8, 1992, Awake!) makalilipay gid. Kinaandan gid karon [sa mga manunulat] nga ipaathag ang tema tuhoy sa dumaan nga mga kultura nga subong bala ang mga tawo sadto anay may yara sang tanan nga butang kag subong bala nga kon kita tanan mangin mga dinumaan liwat, ang tanan magaayo. Makapasulhay basahon ang isa ka artikulo nga nagpahayag sang isa ka kultura sa isa ka makawiwili nga paagi apang wala nagahimo sini nga halandumon ukon makahalam-ot.

L. Z., Estados Unidos

Sekso sang Bata Salamat sa artikulo sa kahon nga natig-uluhan “How Is a Child’s Sex Determined?” nga nagguwa sa artikulo nga “Women​—Respected at Home?” (Hulyo 8, 1992, Awake!) Gintudluan ninyo ako nga indi pagbasulon ang akon magulang nga babayi bangod nagbata sia sing lima ka babayi sa sulod sang napulo ka tuig kag wala makabata sing lalaki. Suno sa inyo artikulo, kon may basulon man, dapat amo ang bana.

E. J. O., Nigeria

Bisan pa ang similya sang lalaki amo ang butang nga magapat-od kon bala lalaki ukon babayi ang bata, indi balasulon ang bana ukon ang asawa. Subong ginsiling sang artikulo, isa “lamang ini ka loterya sang pagpanganak” nga indi makontrol sang bisan sin-o sa duha.​—ED.

Crossword Puzzles Salamat gid sa crossword puzzles! Nabasa ko kasan-o lang ang kapitulo tuhoy sa kapung-aw sa libro nga Questions Young People Ask​—Answers That Work. Ginpanugda nga maghimo ka sing “mga hilikuton nga nagahatag sing kalipay,” subong sang paglubad sing isa ka puzzle ukon palaligban. Isa ini ka mabuligon gid nga ideya bangod nasapwan ko ang akon kaugalingon nga nagakadlaw, nagakawili, kag nagahibalo sing bag-ong impormasyon. Palihug indi pag-untati ang mga puzzle.!

M. R., Estados Unidos

Ang libro nga ginpatuhuyan ginabalhag sang Watchtower Bible and Tract Society of New York, Inc., ang mga manugbalhag sining magasin.​—ED.

Balingag nga mga Ginikanan Sang mabasa ko ang artikulo nga “Young People Ask . . . What if My Parent Has Disgraced Us?” (Oktubre 22, 1992, Awake!) nag-alagay ang akon mga luha nga daw baha. Ang akon amay ginsikway gikan sa Cristianong kongregasyon sang nagligad nga duha ka tuig, kag binudlayan gid kami sang akon iloy. Ginhimo ko ang ginpanugda sa artikulo kag nagtu-ad ako sa isa ka hamtong nga Cristianong gulang, kag nakabaton ako sing daku nga pagpalig-on kag pagsakdag.

A. O., Hapon

Ang akon amay, nga isa anay sang mga Saksi ni Jehova, nangin apostata. Gintinguhaan niya nga sulayon ang iban gikan sa kamatuoran kag nagahatag pa sia sing mga pamulongpulong sa mga simbahan. Ginatawag nila sia nga “reberendo”! Nahuya gid ako! Ining artikulo nakabulig gid sa akon.

B. A., Estados Unidos