Minyo nga Pagkabuhi—Paghimo sini nga Mas Malipayon

Ano ang makahimo sang pag-asawahay nga madinalag-on?

Kay sin-o panuytoy ang makadul-ong sa kalipay sang mag-asawa?

Paano malubad ang mga problema sa komunikasyon?

BANGOD sang impluwensia sang mga libro nga ila nabasa tuhoy sa kahilwayan sang kababayin-an, si Yasuhiro kag ang iya nobya, nga si Kayoko, nagsugod sa pagpuy-anay, sa pagdumdom nga sarang nila mabugto ang ila relasyon sa bisan ano nga tion. Sang magbusong lamang si Kayoko nga ginlegalisar nila ang ila pag-asawahay. Apang, may mga duhaduha gihapon si Yasuhiro nahanungod sa kahimusan sang pamilya. Sang mag-utwas ang mga problema tuhoy sa kuwarta kag indi na sila magsahuay, wala sing nakapugong sa ila sa pagdiborsio.

Madugaydugay sa tapos sila magdiborsio, kag lipod sa isa kag isa sa ila, si Yasuhiro kag si Kayoko nagsugod sa pagtuon sing Biblia upod sa mga Saksi ni Jehova. Wala madugay, natukiban ini sang tagsatagsa sa ila kag nakita nila ang mga pagbag-o nga ginhimo sang isa kag isa sa ila paagi sa pag-aplikar sang mga prinsipio sang Biblia. Namat-od sila nga magpakasal liwat. Karon nga may diosnon na sila nga pagtamod sa pag-asawahay, handa sila sa paghimo sing mga sakripisyo agod malubad ang ila mga problema.

Ano ang naghimo sang ila ikaduha nga pagpakasal nga madinalag-on? Amo ang ila pagtamod sa Ginhalinan sang pag-asawahay. (Genesis 2:​18-24) Ang tuytoy nga ginhatag sang labing eksperiensiado nga manuglaygay sa pag-asawahay, nga si Jehova nga Dios, amo ang liabe nga nagabukas sang ganhaan padulong sa malipayon nga pag-asawahay.

Ang Sekreto sang Malipayon nga Pag-asawahay

Ang mga problema sang pag-asawahay sarang malubad kag ang pag-asawahay sarang masalbar kon iaplikar sang mag-asawa ang ginsiling ni Jesucristo: “ ‘Dapat mo higugmaon si Jehova nga imo Dios sa bug-os mo nga tagipusuon kag sa bug-os mo nga kalag kag sa bug-os mo nga hunahuna.’ Ini ang labing daku kag nahauna nga sugo. Ang ikaduha, kaangay sini, amo ini, ‘Dapat mo higugmaon ang imo isigkatawo subong sang imo kaugalingon.’ ” (Mateo 22:​37-39) Amo ini ang sekreto sa malipayon nga pag-asawahay. Dapat higugmaon sang bana kag asawa si Jehova antes nila higugmaon ang ila kaugalingon ukon ang isa kag isa sa ila. Ini nga relasyon mahimo mapaanggid sa lubid nga tatlo ka dupli. “Kon ang isa ka tawo maglandas sa iya nga isa lamang, ang duha magatindog sa iya. Kag ang lubid nga tatlo ka dupli indi mabugto sing madali.”​—Manugwali 4:12.

Bangod ang gugma sa Dios nagakahulugan sing pagtuman sa iya kasuguan, dapat unahon sang bana kag asawa sa ila kabuhi ang kasuguan kag mga prinsipio sang Dios tuhoy sa paggawi sang tawo. Sa paghimo sini nagahimo sila sing lubid nga tatlo ka dupli kag ang pinakamabakod nga dupli amo ang ila gugma kay Jehova. Kag “ang iya mga sugo indi mabug-at,” siling sang 1 Juan 5:3.

Nagadul-ong ini sa pagtamod sa pag-asawahay subong isa ka permanente nga kahimusan. (Malaquias 2:16) Upod ina nga sadsaran sa ila pag-asawahay, mapahulag ang mag-asawa nga lubaron ang ila mga problema sa pag-asawahay sa baylo nga talikdan ini paagi sa diborsio.

Pagpakita sing Gugma sa Imo Pinakamalapit nga Isigkatawo

Agod mangin permanente ang higot sang inyo pag-asawanay, dapat mo bunyagan ang imo gugma sa iya, ang imo pinakamalapit nga isigkatawo. Ini nga gugma dapat nga indi makagod. Talupangda kon paano ginapalig-on sang Biblia ini nga prinsipio: “Mag-isa kamo sa gugma, nga nahiusa sa kalag, nga may isa ka panghunahuna, nga wala nagahimo sing bisan ano gikan sa pagkamaiyaiyahon ukon pagpadayawdayaw, kundi nga may pagpaubos nagabilang sa iban nga maayo pa sa inyo kaugalingon, nga nagatamod, indi lamang sa kaugalingon nga mga butang, kundi sa mga butang man sang iban.”​—Filipos 2:​2-4.

Matuod, sa sining makagod nga kalibutan mabudlay maghimo sing isa ka butang nga indi gikan sa pagkamaiyaiyahon ukon pagpadayawdayaw. Kon ang imo tiayon wala nagauna sa pagpakita sing gugma, ang pagkadimakagod mas mabudlay pa; apang paagi sa pagpaubos, nga ginatamod ang imo tiayon nga maayo pa sa imo kaugalingon, mas mahapos mo binagbinagon ang mga kaayuhan sang imo tiayon. Ginalaygayan kita sang Biblia nga ilugon ang panghunahuna ni Cristo Jesus. Sia isa ka gamhanan nga espiritu, apang ‘nangin sa dagway sia sang ulipon,’ kag nangin isa ka tawo. Indi lamang ina, kundi sang yari sia sa duta, “nagpaubos sia sang iya kaugalingon kag nagmasinulundon tubtob sa kamatayon,” nga nakahatag sing kaayuhan bisan sa mga tawo nga wala magbaton sa iya. (Filipos 2:​5-8) Paagi sa pagpakita sini nga panimuot, nahaylo ni Jesus ang madamo nga mga manugpamatok, kag paagi sa pag-ilog kay Jesus, amo man ang nahimo sang iya mga sumulunod. (Binuhatan 6:7; 9:​1, 2, 17, 18) Amo man ang matabo sa imo. Paagi sa pagtamod sa imo tiayon nga maayo pa sa imo kaugalingon kag sa pag-atipan sang mga butang sang imo tiayon, mahimo nga mahaylo mo sia sing amat-amat.

Apang, ang pagtamod sa imo tiayon subong maayo pa sa imo wala nagakinahanglan nga magpabaya ang asawa sa kapintas sang bana, subong sang nagakatabo sa Sidlangan. Ang bana kag asawa dapat magtamdanay nga mas maayo ang isa kag isa sa ila kay ang tagsatagsa sa ila handa sa paghimo sing mga sakripisyo para sa isa kag isa sa ila. Kon hambalan sang mag-asawa ang ila mga palaligban sing mapainubuson, magpakita sing dimakagod nga interes sa isa kag isa, kag magsunod sa laygay sang Dios, malubad nila ang ila mga problema. Binagbinagon naton karon ang pila sang laygay sang Dios.

‘Dili Pagdagtai ang Higdaan sang Pag-asawahay’

Si Jehova, nga nagtukod sang kahimusan sang pag-asawahay, may plano para sa nagakaigo nga relasyon sang lalaki kag sang iya asawa. Sang ginpamangkot kon bala suno sa kasuguan nga diborsiohan sang lalaki ang iya asawa sa bisan anong kabangdanan, si Jesucristo nagsiling: “Ang gintingob sang Dios dili pagbulagon sang tawo.” Ginpakita niya nga isa lamang ang makatarunganon nga kabangdanan sang diborsio kag pagminyo liwat paagi sa pagsiling sing dugang pa: “Nagasiling ako sa inyo nga ang bisan sin-o nga nagabulag sa iya asawa, kon indi bangod sa pagpakighilawas, kag magpangasawa sing iban, nagapanglahi.”​—Mateo 19:​3-9.

Ang sekso sa guwa sang pag-asawahay, bisan pa ginahimo sa ngalan sang gugma, indi gid mahigugmaon, para sa duha. Ang isa ka lalaki sa sentral nga Japan nangerida sing pila ka babayi. Nangin suspetsuso ang iya asawa kag nagbatyag sing kapaslawan. Yara sa katalagman ang ila pag-asawahay. Nian nag-abot ang adlaw nga ang isa sang iya mga kerida nagsiling sa iya nga ibuyagyag niya ang ila relasyon sa iya asawa kag pinilit sia nga pakaslan sia. “Ina nga mga relasyon indi magpahalipay kay bisan sin-o,” siling niya sing mahinulsulon. Nalubad niya ini nga problema apang nasaklaw na niya ang balatyagon sang tanan nga nadalahig. Maathag ang talaksan sang Biblia sa sini nga butang. “Paghuptan sing dungganon sang tanan ang pag-asawahay, kag ang higdaan sang pag-asawahay dipagdagtaan, kay hukman sang Dios ang mga makihilawason kag mga makilahion.” (Hebreo 13:4) Paagi sa pagsunod sa sini nga sugo, malikawan sang isa ang mga balatian nga ginapaliton sang seksuwal nga buhat, ang tension sang pag-asawahay, kag ang kahuol sang likom nga relasyon sa iban.

Mga Bana, Higugmaa kag Palanggaa ang Inyo mga Asawa

Ang prinsipio sang pagkaulo sa sulod sang pamilya ginbalay man sang Dios. “Magpasakop ang mga asawa sa ila mga bana subong nga sa Ginuo, kay ang bana amo ang ulo sang asawa subong nga si Cristo man amo ang ulo sang kongregasyon,” siling sang Efeso 5:​22, 23. Indi mahapos iaplikar ini nga laygay. “Isa ini ka tulad-bukid nga hangkat para sa akon,” baton ni Shoko, nga nagaagaw sang kinamatarong sang iya bana sa paghimo sing katapusan nga mga desisyon. Sa pagdumdom nga ang isa ka lalaki dapat makabakal sing balay kon manugtreinta na ang iya pang-edaron, ginpilit niya ang iya bana nga baklon ang balay nga iya nakita. Apang, sang matun-an niya ang mga prinsipio sang Biblia, nagbag-o ang iya pagtamod sa iya bana. Ang daw hipuson kag binabayi nga kinaiya, kon tan-awon sing nagakaigo, isa gali ka mahinantupon, mapainubuson, kag mahagop nga kinaiya.

Bangod sining prinsipio, dapat tandaan sang mga bana nga yara sila sa idalom sang mas mataas nga awtoridad ni Cristo Jesus. (1 Corinto 11:3) Subong yara sa idalom sang awtoridad ni Cristo, dapat higugmaon sang bana kag palanggaon ang iya asawa subong sang paghigugma ni Jesus sa iya mga sumulunod. (Efeso 5:​28-30) Sa amo, dapat mapatugsilingon nga binagbinagon sang isa ka Cristianong bana ang mga balatyagon, mga handum, kag mga limitasyon sang iya asawa antes sia maghimo sing mga desisyon.

“Naunawan sing Asin”

Si Hisako nabudlayan sa pagpakighambal sa iya bana. Sa kada tion nga makighambal sia sa iya, nagalikaw ang iya bana paagi sa pagsiling: “Himua lang ang luyag mo.” Si Hisako naghinumdom: “Sa banta ko ang kabangdanan sang amon problema amo nga indi ako mainanggaon. Mas maayo kuntani kon malagday ako maghambal.” Sa karon, makahambalanay na sila sing malipayon. Nag-abot ang pagbag-o sang gin-aplikar ni Hisako ang masunod nga laygay: “Magpamulong kamo sing malulo sa tanan nga tion, nga naunawan sing asin, agod nga makahibalo kamo kon ano ang dapat nga pagsabat ninyo sa tagsatagsa.” (Colosas 4:6) Subong nga ang pagkaon nga natimplahan sing asin mas manamit, ang ginpamensar anay sing maayo nga mga pulong nga ginabungat sa mainayuhon nga paagi mas mahapos batunon. (Hulubaton 15:1) Sa katunayan, paagi lamang sa mapatugsilingon nga paghambal, ang pagkamugay sang mag-asawa masami mapunggan.

Huo, epektibo gid ang paghigugma kay Jehova nga Dios kag ang pagtahod sa iya mga prinsipio. Ang gugma kay Jehova nagapahulag sa imo nga tamdon ang inyo pag-asawahay subong nga isa ka permanente nga higot kag nagabulig sa imo nga mangin determinado sa pagtipig sini. Naghatag ang Dios sing maayong mga panuytoy nga magabulig sa imo sa pag-atubang sa tanan nga indi pag-ugyunay sang mag-asawa kag magalubad sang inyo mga problema, bisan pa daw ano ka tulad-bukid ini sa kadakuon. Indi, sa masami ang diborsio indi ang ganhaan padulong sa mas malipayon nga kabuhi, kundi amo ang pag-aplikar sang mga prinsipio sang Biblia. Sarang mo mabuksan ina nga ganhaan paagi sa pagpalambo sang imo gugma kay Jehova. Ngaa indi tun-an ang iya laygay gikan sa labing awtoritatibo nga libro sang tuytoy tuhoy sa pag-asawahay, ang Biblia?

[Kahon sa pahina 9]

Kon ang Diborsio Amo ang Mapilian

BISAN pa ginatugutan sang Biblia ang diborsio kag ang pagminyo liwat bangod sang pagpakighilawas, ang panghilahi wala sing awtomatiko nagabugto sang relasyon sang bana kag asawa. Mahimo makadesisyon ang inosente nga tiayon nga magdiborsio ukon indi.​—Mateo 19:9.

Gin-atubang ni Yasuko ini nga desisyon. Ang iya bana nagpuyopuyo sa iya kerida. Ginbasol si Yasuko sang iya ugangan nga babayi kag ginsilingan: “Ikaw ang may sala tanan sa pagsubong sini sang akon anak.” Pirme nagahilibion si Yasuko. Madamo ang naglaygay sa iya, apang wala sing bisan isa sa ila ang nagpakamalaut sang pagpangerida sang iya bana. Nian, ang iya iloy mismo, nga nagsugod sa pagtuon sang Biblia, nagsiling sa iya: “Sa Biblia, maathag nga ginahambal nga ang pagpanghilahi malain.” (1 Corinto 6:9) Nagmag-an gid ang balatyagon ni Yasuko sa paghibalo nga may yara gihapon isa ka talaksan sang maayo kag malain sa sining kalibutan karon.

Makadesisyon na si Yasuko karon. Bisan pa nagplano sia anay nga diborsiohan ang iya bana, nahangpan niya sa tapos matun-an ang Biblia upod sa mga Saksi ni Jehova nga wala man niya ginahimo ang dapat niya himuon. Gani namat-od sia nga tilawan ang mga prinsipio sang Biblia sa paglubad sang iya mga problema. Ginsugdan niya nga iaplikar ini. (Efeso 5:​21-23) “Indi yadto mahapos,” hinumdom niya. “Pirme ako nagabalik sa daan nga paggawi. Madamo nga beses nga nangamuyo ako kay Jehova nga nagahilibion.” Sang magbag-o sia, ang iya bana amat-amat man nga nagbag-o. Mga lima ka tuig sang ulihi, ginbugto sang iya bana ang tanan niya nga relasyon sa iya kerida. Si Yasuko naghinakop: “Kombinsido ako nga ang pagtuman sa Pulong sang Dios mapuslanon gid.”

[Kahon sa pahina 11]

Indi Pag-ugyunay sa Sekso kag Diborsio

MADAMO nga mag-asawa ang nagasambit sang indi pag-ugyunay sa sekso nga amo ang ila rason sa pagdiborsio. Sa pagpakita kon diin ang problema, ang isa ka libro tuhoy sa nagabag-o nga kahimusan sa pamilya karon, nga natig-uluhan Sekkushuaritii to Kazoku (Seksuwalidad kag Pamilya), nagasiling: “Ang pag-asawahay nga kahimusan sa isa lamang ka tawo kag ang impormasyon tuhoy sa masupog nga sekso karon indi magkaupod. Ang nagabaha nga impormasyon tuhoy sa sekso nagapatiko sang seksuwal nga handum sang mag-asawa kag nagaguba sang kinaandan nga gugma. Indi lamang ang pagbaligya sing sekso kundi pati man ang pornograpiko nga mga videotape kag mga komiks nga nagalaragway sang kalawasan sang mga babayi subong ginabaligya nga butang ang nagapatiko sang tawhanon nga mga balatyagon kag sang ila tagipusuon. Sa amo, ang mga asawa ginahil-asan sa palugos nga paghulid sang ila bana sa ila, kag ang mga bana nga wala ginapasugtan nagakadulaan sang ila pagkalalaki.”

Ang imoral nga mga publikasyon, mga video, kag ang mga programa sa telebisyon nagapatiko sang sekso. Wala sini ginatudlo ang butang nga makalilipay sa pag-asawahay. Ginaguba man sini ang pagsaligay nga palambuon sang bana kag asawa agod magmadinalag-on ang ila pag-asawahay. Ang Psychology Today nagasiling: “Ang pagsalig nagapahulag sa imo nga itugyan sa imo tiayon ang imo pinakamadalom nga mga balatyagon kag mga kahangawa, kay nahibaluan mo nga tipigan niya ini. Samtang ang gugma ukon kakunyag sa sekso mahimo nga magdugang ukon magbuhin sa sulod sang isa ka hut-ong sang tion, ang pagsalig wala nagabag-o.”

Ang sekso indi amo ang sadsaran sang madinalag-on nga pag-asawahay. Ang isa ka asawa nga nakaeksperiensia sing mabudlay nga mga problema sa pag-asawahay nagsiling: “Ang nakapalig-on sa akon sing labi amo ang mga pulong sa libro nga Making Your Family Life Happy: ‘Sa kabilugan nga paghambal, kon ang tanan nga iban nga mga kaangtanan sa pag-asawahay maayo, kon may yara gugma, pagtahod, maayong komunikasyon kag paghangop, nian ang sekso talagsa lang mangin problema.’ ”a

Ang matuod nga nagahigot sa mag-asawa indi ang sekso kundi ang gugma. Ang sekso nga wala sing gugma wala sing pulos, apang ang gugma makatindog sing isahanon. Paagi sa pagbutang sang sekso sa nagakaigo nga duog sini, nga wala ini ginahimo nga sentro sang ila pagkabuhi, ang mag-asawa makatigayon sing kalipay sa ila pag-updanay kag malubad nila ang problema nga indi pag-ugyunay sa sekso.

[Footnote]

[Retrato sa Pahina 10]

Ang pagtahod sa mga prinsipio sang Biblia magabulig sa mag-asawa sa paghambalanay sing hilway