“Magpadala Kita sing Kard”

“DAW ano ka makalilipay nga talipuspusan sang semana yadto!” Pagpauli ninyo sa tapos sang pagduaw sa mga abyan, may makalilipay nga mga memorya ikaw sadtong makapapagsik nga tion. Daw ano ka maabiabihon ang inyo mga tagbalay! Sa pagpabutyag sang inyo apresasyon, nagsiling ka sa imo pamilya: “Magpadala kita sing kard.”

Nagkadto ka sa lokal nga mga balaligyaan agod magbakal sing kard. Madamo ikaw sing nakita apang makalilibog. ‘Ano nga kard ang dapat ko pilion?’ ‘Diin ang may nagakaigo gid nga mga pulong?’ Indi gid mahapos magpili! Gani ngaa indi na lang maghimo sang imo kaugalingon nga kard?

Paghimo sang Imo Kaugalingon nga mga Kard

Mas mahapos ini sangsa ginahunahuna mo sa primero. Ang lamang nga kinahanglanon mo amo ang isa ka matinlo nga papel ukon manipis nga kard, isa ka inugsulat, kag, sa pagkamatuod, isa ka mensahe. Upod sa desinyo nga imo mapili, sarang mo madugang ang imo kaugalingon nga estilo. Paano? Yari ang duha ka panugda.

(1) Magpili sing laragway nga naluyagan mo. Ayhan isa ini ka danyag gikan sa isa ka magasin nga sarang mo magunting kag itapik sa imo kard. Ginkibot sang isa ka asawa ang iya bana paagi sa isa ka kard nga iya ginhimuhimo para sa ika-25 nga anibersaryo sang ila kasal. Naggunting sia sing duha ka diutay nga retrato sang iya bana kag sang iya kaugalingon kag gintapik ini sa isa ka simple lamang nga kard agod ipabutyag ang iya kalipay sa ila gin-ambitan nga kabuhi.

(2) Gamita ang mga bulak. Matahom na ang desinyo sini. Sa tapos ini mapipi kag mapamala, itapik ini sa imo kard agod magdugang sing kalipay kag estilo.​—Tan-awa ang kahon.

Kon ano man nga dekorasyon ang imo mapilian, sa pagkamatuod ang labing importante amo ang mensahe. Ang paghimo sang imo kaugalingon nga mga kard nagahatag sa imo sing kahigayunan sa pagkomposo sing mga tinaga nga nagapabutyag sing matuod sang imo mga balatyagon.

Isa ka Nagakaigo nga Mensahe

Si Haring Solomon sang una “nagtinguha sa pagpangita sing makalilipay nga mga pulong kag sa pagsulat sing husto nga mga pulong sang kamatuoran.” (Manugwali 12:10) Inang pinili nga mga pulong magahimo sang imo sinulat nga mensahe nga “subong mga mansanas nga bulawan sa pinuna nga pilak” para sa magabaton sini.​—Hulubaton 25:11.

Pilia ang mga pulong nga may makalilipay nga epekto. Mahimo mo ilakip ang pila sang inspirado nga mga pulong sang Biblia agod ipaalinton ang imo sinsero nga mga balatyagon. Abiabihon gid ini.

Kon paano mo isulat inang mga pulong sa kard nagapaalinton man sing isa ka mensahe. Ang paghimo sini nga matinlo kag madali mabasa nagahambal sing daku tuhoy sa imo, nga nagpadala sini.

Mga Okasyon sa Pagpadala sing mga Kard

Ang mga kasal makalilipay nga mga okasyon nga sa amo mahimo agdahon sang kalaslon ang ila mga abyan kag mga paryente. Kon may sinalusalo sila nga hiwaton, makapakita sila sing pag-ulikid sa kaayuhan sang mga magaduaw gikan sa malayo nga mga duog paagi sa paglakip sa imbitasyon kon san-o ini masugod kag matapos.

Ang pagkatawo sang isa ka bata isa pa ka okasyon nga mahimo padalhan sing kard. Nagapahibalo ini sa mga ginikanan sang bata nga nagaambit ikaw sa ila kalipay.

Dugang pa sa sina nga mga okasyon, daw ano ka madinumdumon nga magpabutyag sing pasalamat sa pagkamaluluy-on nga ginpakita sa imo sang mga tawo. Sarang mo man malipay ang mga nagamasakit kag ang mga yara sa ospital, ginapasalig sila sang imo gugma kag kabalaka. Ang imo malipayon nga mga panamyaw kag ang matahom nga laragway sa imo kard makabulig sa pagbuhin sang kapung-aw kag kabalaka. Sa pagkamatuod, subong ginasiling sang isa ka dumaan nga hulubaton, “ang pulong sa nagakaigo nga tion O daw ano kaayo!”​—Hulubaton 15:23.

Sa malayo man ukon sa malapit, ipaalinton ang imo simpatiya sa mga namatyan sing hinigugma. Mahimo nagakaigo ang isa ka pahanumdom tuhoy sa makatilingala nga paglaum sa pagkabanhaw.

Busa, sa kada tion nga luyag mo ipaalinton ang imo mga balatyagon sa iban, ngaa indi magpadala sing kard? Sa pagkamatuod, wala sini ginapuwera ang direkta nga pagpakighambal sa tawo kon mahimo ini. Sa baylo, isa ini ka dugang nga kahigayunan nga mangin maluluy-on.

[Kahon sa pahina 26, 27]

Isa ka Pinasahi nga Dekorasyon

Ang pagdekorar sing napipi nga mga bulak makapatahom sang imo mga kard. Isa ini ka simple lamang, indi mahal nga paagi sa paghatag sa imo mga kard sing isa ka pinasahi nga estilo. Diutay lamang nga mga gamit ang imo kinahanglanon.

Pagpanipon sing mga Bulak

◻ Pat-ura nga naglisensia ka sa pagpamuksi sing mga bulak nga naluyagan mo.

◻ Likawi ang pagpamuksi kon nagaulan.

◻ Indi pagpuksia ang gulang na nga mga bulak ukon mga dahon.

◻ Indi pag-uyangi ang mga bulak.

Ang iban nga mga bulak indi maayo pipion kon maunod (bluebell), liryo, orkidya ukon may balik-awot nga korte (daffodill, lilac, dalagku nga mga rosas, ragiwriw).

Pagpipi sa mga Bulak

◻ Iplastar ang mga bulak sa ulot sang sikante nga mga papel (blotting paper) nga nautlan sang duha ka plywood. Ang pagdugang sing pila ka panid sang pamantalaan makabulig sa pagsalupsop sang hun-og. Hugta ang pagpintal sang plywood kada adlaw samtang nagamala ang mga bulak.

◻ Maghulat sing dimagkubos isa ka semana antes buksan ang ginpintalan.

◻ Usisa sa makadali kon bala nagakaigo ang pagpipi sa mga bulak, kag kon kinahanglanon, bag-uha ang posisyon sa mamala nga papel.

◻ Ibalik liwat ang pintal, kag ibilin ini sa mainit-init, mamala nga duog sa duha ukon tatlo ka semana antes kuhaon ang mga bulak.

Pagplastar sa mga Bulak

◻ Maggamit sing diutay nga kula.

◻ Uyati ang mala na nga mga bulak sing mahalungon, ayhan maggamit sing buntis.