Ngaa Wala Nagakabali ang Liog sang mga Kalaw?

NAKABATI ka na bala sang isa ka kalaw nga nagabarena sa kahoy? Sanglit may yara mga 200 ka espesyi sang mga kalaw sa bug-os nga kalibutan, mahimo nga natalupangdan mo nga ang dalayon nga pagtusik sini daw isa ka nagabarak nga machine gun. Sang nakakita ako sing isa, nga ang tuktok sini nagatusik sa puno sang kahoy, nagpalibog ako, ‘Ngaa wala nagakabali ang iya liog ukon nahalitan ang iya utok?’ Kon kita subong mga tawo ang magahimo sang kaanggid nga puwersado nga buhat, ayhan kinahanglan nga magpatan-aw kita sa isa ka manughilot ukon sa isa ka manugbusbos sa utok! Gani, ano ang sekreto?

Binagbinaga subong halimbawa, ang pula sing tiyan nga kalaw nga makita sa nasidlangan nga katunga nga bahin sang Estados Unidos. Ang Book of North American Birds nagasiling: “Paagi sa iya mabug-at, korte-tigib nga tuktok, ginatusik sini ang mga sapat-sapat sa idalom sang panit sang kahoy, ginadakop ang mga bagangan sa mga buho, ginalaslas ang mga natip-ak nga kahoy samtang nagabuho sing pugaran.” Paano niya ginaamligan ang kaugalingon gikan sa yab-ok sang kahoy? “Ang mga buho sang iya ilong ginatabunan sang isa ka diutay nga maskara sang mapino nga mga bulbol.”

Kag kamusta ang ulo nga ginabunggobunggo? “Agod indi mahalitan ang utok . . . , ang mabakod nga liog, madamol nga bagol, kag ang daw-kutson nga espasyo sa ulot sang madamol nagguwa nga ginaut kag sang utok mismo nagapanghikot subong pinasahi nga mga manug-amlig.”

Ang isa pa ka kalaw, ang dalag sing tiyan nga sapsucker, nagabarena sing mahipid nagaidas nga mga buho sa panit sang kahoy, nga gikan sini ginasupsup niya ang tagok. Indi kaangay sang pula sing tiyan nga kalaw, nga may tuman kalaba, silindriko nga dila nga may punta sa pagpana sa mga sapat-sapat, ang sapsucker may mas malip-ot nga dila nga may mapino nga mga bulbol sa pagbulig dilap sang tagok.

Pat-od gid nga inang nanuhaytuhay katahom nga desinyo nagapakita sang isa ka Manugdesinyo, si Jehova nga Dios. Sa pagpaubos dapat naton ipalanog ang mga pinamulong ni Job: “Nakahibalo ako nga mahimo mo ang tanan nga butang, kag wala sang imo katuyuan nga mapunggan.” Kag si David nagsulat: “Makatilingala ang imo mga binuhatan, ang akon kalag nakakilala sing maayo sini.”​—Job 42:2; Salmo 139:14.

[Picture Credit Lines sa pahina 31]

Leonard Lee Rue, 111/ H. Armstrong Roberts

Wala: H. Armstrong Roberts