Ang Pagtamod sang Biblia

Ano nga Sahi sang Pagdiborsio ang Ginadumtan sang Dios?

“MADAMO nga problema ang gintuga sang akon pagdiborsio,” sulat sang isa ka Cristianong babayi nga ginluiban sang iya bana. “Ang tion sa pagpasibu indi mahapos. Kinahanglan ko magpasibu indi lamang sa hunahuna kundi sa pinansial kag sa espirituwal man. Ambot kon pakamaayuhon ni Jehova ang akon pamat-od, bangod nahibaluan ko nga ginasiling sang Kasulatan nga ginadumtan niya ang pagdiborsio. Problema ini nga nagapadayon.”

Kon ang isa ka pag-asawahay matapos, ang mga problema wala nagakatapos. Hinali magautwas ang bag-o nga listahan sang mga problema. Ang pagbatyag sing​—kapung-aw, kasubo, kag balatyagon nga nakasala​—mga balatyagon nga nagatuhaw sing hinali. Ang bangigay sa legal nga kinamatarong kon sin-o ang matatap sa bata nga dapat atubangon. Ang anak nga lalaki ukon babayi nga nagahilibion sa pagpangita kay Nanay ukon kay Tatay. Ang mga pag-ipit sang mga kabudlayan sa pinansial. Ang paglandas sa handum nga paghirupay nga ginatugot lamang sang pag-asawahay.

Nian yara ang pagtamod sang Dios nga dapat binagbinagon. Ang Biblia nagasiling nga ‘ginadumtan [sang Dios] ang diborsio.’ (Malaquias 2:16) Buot silingon bala sini nga ginakaugtan sang Dios ang tanan nga pagdiborsio? Dapat bala, kon amo, magbatyag nga nakasala ang isa ka Cristiano nga luyag magdiborsio bangod ginluiban sia sang iya nga tiayon? Para sa mga sabat, tan-awon naton ang mga kahimtangan sang mga adlaw ni Malaquias nga nagpahulag sa Dios sa pagsiling nga ginadumtan niya ang pagdiborsio.

“Dili Kamo Makig-angot sing Maluibon”

Si Malaquias nagpanagna sa tapos sang 443 B.C.E., halos isa ka siglo pagkatapos nga nakabalik ang tinapok nga mga Judiyo halin sa Babilonia. Naglain ang mga kahimtangan sa Juda, ilabi na sa tunga sang mga saserdote. (Malaquias 2:​7-9) Ang mga buhat subong sang pagbutig, pakighilawas, paglimbong, kag pagpamigos nangin bugana sa tunga sang mga Israelinhon sa kabilugan. (Malaquias 3:5) Ining mga kahimtangan nagpautwas sing pangduhaduha amo kon ngaa ang iban naghinakop: “Walay pulos ang pag-alagad sa Dios.”​—Malaquias 3:14.

Ang relihioso kag moral nga kaduluntan sa mga adlaw ni Malaquias makita man sa naganubo nga pagtahod sa pag-asawhay. Madamo sa mga kalalakin-an sa Israel ang nagdiborsio sa asawa sang ila pagkapamatan-on, ayhan agod makapangasawa sa mas bataon paganong kababayin-an. Ang halaran ni Jehova napuno sing mga luha sang sinikway nga mga asawa nga nagakari sa santuaryo agod maghibi kag magbakho sa atubangan sang Dios.​—Malaquias 2:​13-15.

Ano ang ginbatyag ni Jehova nga Dios sa sining sahi sang pagdiborsio? Paagi kay Malaquias nagpaandam sia: “ ‘Andami ang inyo espiritu, kag wala sing magluib sa asawa sang iya pagkapamatan-on. Kay ginadumtan niya ang pagdiborsio,’ siling ni Jehova nga Dios sang Israel . . . ‘Busa andami ang inyo espiritu nga indi kamo magluibay.’ ” (Malaquias 2:​15, 16) Suno sa Theological Wordbook of the Old Testament, ang Hebreong tinaga nga ginbadbad ‘makig-angot sing maluibon’ nagakahulugan sing “makig-angot sing malimbungon, (makig-angot sing) dimatutom.” Sa Salmo 59:​5, ang participle nga porma sini nga berbo ginabadbad subong “mga traidor.”

Paagi sinang mga impormasyon, mahangpan naton sing maayo ang mga pulong sa Malaquias 2:16: “Ginadumtan Niya ang pagdiborsio.” Ginadumtan ni Jehova ang sahi sang pagdiborsio nga nagadalahig sa dirasonable nga pagbulag sa isa ka tiayon agod makakuha naman sing lain. Halimbawa, ang isa ka lalaki nga nakahimo sing panghilahi kag nagdiborsio sa iya walay sala nga asawa batok sa iya kabubut-on ukon nagapilit sa iya asawa nga bulagan sia agod mapakaslan niya ang lain nga babayi sa pagkamatuod nagapakig-angot sing maluibon sa iya asawa. Ining malimbungon, walay kaluoy nga pagtratar sa walay sala nga tiayon isa ka sala nga makangilidlis sa mata sang Dios. Ang isa ka lalaki nga nagahimulos sa mapagros nga mga tinuig sang kabuhi sang isa ka babayi kag dayon nagasikway sa iya, ayhan bangod sang isa ka mas bataon nga babayi, sa pagkamatuod isa ka traidor.a

Apang, kamusta, ang tuhoy sa wala sing sala nga tiayon nga namat-od nga magbulag sa makihilahion nga tiayon? Ginadumtan man bala sang Dios ang amo nga sahi sang pagdiborsio?

Ang Kaugalingon nga Halimbawa sang Dios

Mahibaluan gid ayhan sang Dios kon ano ang pamatyag kon ginaatubang sang desisyon kon bala bulagan ukon indi ang makihilahion nga tiayon? Sa simboliko nga paghambal, ginkabig ni Jehova ang iya kaugalingon subong kasado sa dumaan nga pungsod sang Israel paagi sa iya katipan upod sa ila. (Isaias 54:​1, 5, 6; 62:​1-6; Jeremias 31:​31, 32) Subong bana, matutom gid si Jehova, wala nagaliso sang iya pagtamod sa iban nga mga pungsod. (Salmo 147:​19, 20; Amos 3:​1, 2) Apang kamusta ang Israel? Ano nga sahi sang asawa nangin amo ang pungsod?

Sa kabilugan ang pungsod sulit-sulit nga nangin maluibon sa katipan, sang ulihi nakadangat sa kahimtangan nga ginlaragway sa pangamuyo nga narekord sa Daniel 9:​5, 6: “Nakasala kami kag nagbalingag kag nagmalauton kag nagbato; nga nagalapas sa imo mga sugo kag sa imo mga pagsulundan. Kag wala magpamati sa imo mga alagad nga mga manalagna, nga nagpamulong sa imo ngalan sa amon mga hari, sa amon mga prinsipe, kag sa amon mga ginikanan, kag sa tanan nga katawhan sang duta.” Sa mata ni Jehova, ang subong sadto nga pagkadimatutom katupong sa pagpakighilahi sang isa ka asawa.​—Jeremias 3:1.

Pagkatapos sang siniglo nga pagpaumod kag pagbatas, ano ang ginhimo ni Jehova? Paagi sa malig-on nga hudisyal nga buhat, ginpaguwa niya una ang aminhan nga mga tribo dayon ang bagatnan nga tribo sa ila duta subong mga tinapok, si Jehova subong resulta, nakigdiboriso sa amo nga pungsod. (Jeremias 3:8; Daniel 9:​11, 12) Gani paagi sa iya kaugalingon nga halimbawa, paano makadumot si Jehova kon pilion sang isa ka wala sing sala nga tiayon nga bulagan ang tiayon nga nangin maluibon sa sumpa sang pag-asawahay?

Ang pag-asawahay isa ka sagrado nga kahimusan sa mata sang Dios, kag indi dapat pakadiutayon sang mga nagasulod sa sini ang sumpa nga ila ginhimo. (Hebreo 13:4) Apang kon ang isa ka tiayon magluib sa sumpa paagi sa paghimo sing “pakighilawas,” ginahatagan sang Dios ang isa nga wala sing sala sing kinamatarong sa pagpili kon bala magpatawad ukon makigdiborsio. (Mateo 19:9) Mabudlay ina nga desisyon, isa nga dapat himuon lamang sang wala sing sala nga tiayon. Kon mamat-od ang wala sing sala nga tiayon nga tapuson ang pag-asawahay, indi sia dapat magbatyag nga nakasala bangod sang pagpakigdiborsio. Dumduma nga ginadumtan ni Jehova indi ang tanan nga pagdiborsio, kundi ang sahi sang pagdiborsio nga nagadalahig sing dimakasulatanhon nga pagbulag sa isa ka tiayon agod makakuha sing lain.b

[Mga footnote]

[Picture Credit Line sa pahina 14]

Historic Costume in Pictures/ Dover Publications, Inc., New York