Ang Pagtamod sang Biblia

Bulig sa Imo Kasubo

“ANG KASUBO NAGAHIMO SA ATON TANAN NGA MANGIN MGA BATA LIWAT​—NAGAGUBA SANG TANAN NGA KINATUHAYAN SA KINAALAM. ANG PINAKAMAALAM WALA SING NAHIBALUAN.”​—RALPH WALDO EMERSON, IKA-19 NGA SIGLO NGA AMERIKANO NGA MAMALAYBAY KAG ENSAYISTA.

ANG sudlot sang kamatayon wala lamang nagapaantos kundi nagapakunol man sa balatyagon sang mga biniyaan​—bana, asawa, amay, iloy, anak nga lalaki, anak nga babayi, ukon abyan. Ang maalam mahimo mamangkot sing mga pakiana apang indi makabati sing makalipay nga mga sabat, kag ang mabaskog mahimo maghibi bangod sa daku nga kasubo apang indi makatigayon sing paumpaw. Mahimo madumduman sang mga bumalasa sang Biblia ang panganduhoy ni David sang ginpatay ang maluibon nga si Absalom: “Anak ko nga Absalom, anak ko, anak ko nga Absalom! O kabay pa kuntani nga ako na lang ang napatay, sa baylo mo, anak ko nga Absalom, anak ko!” (2 Samuel 18:33) Indi ini panganduhoy sang isa ka hari tuhoy sa isa ka traidor; isa ini ka panganduhoy sang isa ka amay bangod sang iya napatay nga anak. Mahimo nga amo man sini ang nabatyagan mo sang ginsubuan ikaw.

Sa tion sang daku nga kasubo, ang makatulublag nga mga pamangkot mahimo magsulod sa hunahuna. ‘Ngaa dapat pa ini matabo? Nahibaluan bala sang Dios nga matabo ini? Kon nahibaluan niya, ngaa wala niya pagpunggi ini?’ Bisan pa ang isa ka tawo mahimo nga sampaton sa Biblia kag nakahibalo nga ang mga patay pagabanhawon, ang makatulublag nga mga pamangkot mahimo magkinahanglan sing madalom nga pagpamalandong agod makatigayon sing konsolasyon kag paglipay.

Ang sayop nga mga sabat wala nagadala sing matuod nga kaayawan, kundi butig lamang nga paglipay. Ang sugiran ikaw nga ‘ginakinahanglan sang Dios ang imo palangga’ masami nga ginabangdan sang pagtalikod sa Dios nga may kapait. Ang kamatuoran, nga yara sa Biblia, nagasabat sa mga pamangkot tuhoy sa kasubo kag kapin pa nga nagapasuod sa isa kay Jehova nga Dios, sa baylo nga itulod sia palayo sa iya. Ginapasalig kita sa 2 Corinto 1:​3, 4 nga sia ang Amay sang mahigugmaon nga mga kaluoy kag ang Dios sang tanan nga paglipay.

Balanse ang Ihibalo kag Gahom sang Dios

Si Jehova, nga Labing Gamhanan, nakahibalo sang tanan nga nagakatabo sa iya masangkad nga tinuga. Ang Salmo 11:4 nagapasalig sa aton: “Si Jehova​—ang iya trono yara sa mga langit. Ang iya mga mata nagatan-aw, ang iya nagasiga nga mga mata nagausisa sa mga anak sang mga tawo.” Sa Hebreo 4:13 si apostol Pablo nagsulat: “Walay tinuga nga indi hayag sa iya panulok.” Wala lamang nakahibalo ang Dios kundi nagaulikid sia! Si Jesus nagsiling: “Wala bala ginabaligya ang duha ka magamay nga pispis sa isa ka sensilyo nga may manubo nga balor? Apang wala sing isa sa ila ang mahulog sa duta nga indi nahibaluan sang inyo Amay. . . . Mahal pa kamo sa madamo nga magamay nga pispis.”​—Mateo 10:​29, 31.

Sarang bala mapunggan sang Dios ang hilaw nga kamatayon sang isa nga hinigugma kag ang kasubo nga nagsunod? Huo, masarangan niya. “Ang tanan nga butang posible sa Dios,” siling ni Jesus. (Marcos 10:27) Sang madugay na nga tion, ginpamatian ni Jehova ang pangamuyo sang nagatagumatayon nga si Ezequias kag gin-ayo sia kag gindugangan sing tinuig ang iya kabuhi. (Isaias 38:​2-5) Wala sing duhaduha nahanungod sa ikasarang ni Jehova sa paghimo sing tanan nga buot niya, apang dapat naton mahangpan ang dugang pa nahanungod sa iya kabubut-on. Nakabasa kita tanan sing mga kasaysayan sang mga tawo nga nasamad ukon nagbalatian sing grabe, apang nabuhi sila. Nagpasilabot bala si Jehova para sa ila?

Ang iban nga mga tawo may labaw sa kinaandan nga ikasarang sa pag-ayo kag mabaskog nga kabubut-on sa pagkabuhi. Mahimo nga amo ini ang kabangdanan sa ila daw milagruso nga pag-ayo. Ukon mahimo nga ang pila sang bag-o nga pagbulong nangin madinalag-on. Sa amo, indi kita dapat maghinakop dayon nga si Jehova nagpasilabot.​—Filipos 4:13.

Ginapaathag sang Pulong sang Dios Kon Ngaa Nagakapatay ang mga Tawo

Sa Roma 5:​12, simple kaayo nga ginpaathag ni apostol Pablo nga ang aton katigulangan nga si Adan nagrebelde sa iya Manunuga kag makatarunganon nga ginpamatbatan sing kamatayon. Sanglit mga kaliwat niya kita, mga makasasala kita kag mahimo mapatay sa bisan ano nga tion. Wala kita sing garantiya nga magkabuhi sing padayon. Maathag nga ginpakita sang maalam nga si Hari Solomon nga ang tion kag dikitaon nga hitabo mahimo matabo kay bisan sin-o sa bisan ano nga tion, ayhan isa ka ikamatay nga aksidente ukon hinali nga pagbalatian sing grabe. Ukon ang isa mahimo matawo nga may balatian na nga nagapalip-ot sang iya kabuhi. Ginpaathag man ni Solomon nga sa Dios may tion kag panahon para sa tanan nga butang. Ang Dios nagatalana sing tion sa pag-ayo, indi lamang sa isa ukon pila, kundi sa tanan nga nagatuo nga katawhan sa tion sang paghari ni Cristo Jesus.​—Manugwali 3:1; 9:11; 1 Corinto 15:​25, 26.

Tandai ining makapahunahuna nga ideya: Indi pwera ang mga Cristiano sa mga kalamidad nga nagapaantos sa kaliwatan sang tawo kag sa amo mahimo mapaidalom sa mga eksperiensia nga kinaandan sa katawhan. “Ang mga pagtilaw nga dapat ninyo batason indi maglabaw sa kinaandan sa katawhan.”​—1 Corinto 10:​13, The Jerusalem Bible.

Ang Dalanon sa Pag-ayo

Ang kamatayon isa ka tion sang pagluha nga ginaupdan sing pinakasinsero nga pagpakiluoy kay Jehova, ang Manugpamati sa pangamuyo. Karon labaw sa bisan ano man nga tion, magpalapit sa Dios. Karon labaw sa bisan ano man nga tion, ibubo ang imo tagipusuon sa pagpangayo sing paghantop, sing kusog sa pagpasibu. Ang Biblia nagapalig-on sa aton sa paghimo sina gid. Si Pedro nagsiling: “Itugyan ang tanan ninyo nga kabalaka sa iya, kay nagaulikid sia sa inyo.” (1 Pedro 5:7) Daw ano ka makalipay ang mga pulong sang Dios sa Isaias 57:15: “Amo ini ang ginasiling sang Mataas kag Makahalawhaw nga Isa, nga nagapuyo sa wala sing katubtuban kag ang iya ngalan balaan: ‘Nagapuyo ako sa mataas kag balaan nga duog, kag upod man sa isa nga ginapigos kag may mapainubuson nga espiritu.” Ang isa nga ginapigos nagapabilin sa amay; may daku nga pagkasuod nga labaw sa bisan san-o nga tion. “Sa dugang nga pagpalapit mo sa Dios, dugang pa nga mangin malapit sia sa imo,” sulat ni Santiago. (Santiago 4:​8, JB) Ginapasalig kita ni Santiago nga ang Dios handa sa paghatag sa aton sing kinahanglanon nga kaalam kag kusog sa pag-ayo.

Dugang pa, masapwan mo nga ikaw mangin kapin ka maluluy-on nga tawo tuhoy sa mga pagtilaw kag mga kabudlayan sang iban, kapin ka mahinuklugon. Makatuon ikaw sing dugang pa kon ano ang ginabatyag sang iban nga mga tawo kag kon paano maghatag sing mga pulong sang paglipay kag paglaum. Mahimo makabulig ka sa isa nga nagakalisod. Huo, mas daku ang mangin kahanuklog mo sa iban sa ila kasisit-an.​—Filipos 2:1.

Ang pagkapatay sang isa nga hinigugma mahimo nga makapasubo kag masakit sa sulod sang isa ka tion, ayhan malawig nga tion. Apang, sa ulihi, mahimo ini maghatag sing mas matin-aw nga pagtamod sa palaabuton sa unhan, ang paglaum nga makaalagad sa Dios nga hilway sa masakit nga mga eksperiensia. Mahimo pa gani kita mangin mas mabaskog sa aton Cristianong personalidad.​—1 Pedro 1:​6, 7.

Gani walay sapayan sang kasakit sang kasubo, indi gid mag-ampo! Himua nga pamat-od ang magpadayon sa pag-alagad sa Dios sing matutom kag maunungon, sa iya himaya kag kadungganan kag sa imo walay katapusan nga kaluwasan.

[Picture Credit Line sa pahina 16]

The Day Before Parting ni Josef Israels: Regalo ni Alice N. Lincoln, Maayong Kabubut-on, Museum of Fine Arts, Boston