Ilisipon Na Lang ang mga Inadlaw sang Satanismo

GINTUGA ni Jehova nga Dios sanday Adan kag Eva, ginpahamtang sila sa isa ka paraiso nga hardin, kag ginsugo sila nga magbuad kag pun-on ang duta sing matarong nga kaanakan. Atipanon nila ang hardin, kultibaron ini kag tipigan ini, kag magkabuhi sing dayon, ini tanan sa isa lamang ka kondisyon: ‘Indi kamo dapat magkaon gikan sa isa ka kahoy sa tunga sang hardin. Kon magkaon kamo sa sini, mapatay kamo.’​—Genesis 1:​27, 28; 2:​8, 9, 15-17; Isaias 45:18.

Ang isa ka gamhanan nga anghel nagrebelde sa Dios kag nangin si Satanas, buot silingon “Manugpamatok,” kay luyag niya nga sia ang maggahom. Luyag niya nga sia ang simbahon sang kaliwatan sang tawo. Gin-impluwensiahan niya si Eva nga kaunon ang gindumilian nga bunga, nagasiling nga maayo ini kaunon kag indi sia mapatay kundi mangin kaangay sang Dios, nga makapamat-od para sa iya kaugalingon kon ano ang maayo kag kon ano ang malaut. Malain ang iya una nga desisyon; namat-od sia nga mangin maayo ang pagkaon sa gindumilian nga bunga. Nagkaon si Eva, ginhatagan niya si Adan kag nagkaon man sia, kag sila nga duha napatay sang ulihi. Sa amo, nagdala si Adan sing sala kag kamatayon sa ila mga anak, nga nagakapatay sugod sadto. (Genesis 3:​1-6; Roma 5:12) Ginpili sang unang tawhanon nga mag-asawa nga sundon si Satanas kag sila ang nangin una nga mga kombertido sa pagsimba kay Satanas. Tubtob karon, minilyon ang namat-od nga ang relihion sadtong orihinal nga mga ginikanan amo anay kag amo gihapon ang maayo para sa ila. “Kon padayon nga ginapresentar mo ang imo kaugalingon sa bisan kay sin-o subong nga mga ulipon sa pagtuman sa iya, mga ulipon kamo niya bangod ginatuman ninyo sia.”​—Roma 6:16; Juan 17:​15, 16; 1 Juan 5:19.

Ginpamatbat ni Jehova ang matabo kay Satanas sa ulihi, apang gintugutan sia nga magpadayon sa sulod sang isa ka tion. Magahatag ini kay Satanas sing kahigayunan nga pamatud-an ang iya panghangkat, nga ang Dios indi makabutang sing mga tawo sa duta nga magaunong sa Iya sa idalom sang pagtilaw​—isa ka hangkat nga tuman ka dramatiko nga ginlaragway kag ginsabat pabor kay Jehova sa una nga duha ka kapitulo sang tulun-an nga Job sang Biblia. Walay sapayan sang mapintas kag masingki nga mga pagsalakay ni Satanas, ginpili mismo ni Job nga tipigan ang iya integridad sa Dios, paagi sa amo ginpamatud-an niya nga butigon si Satanas. (Genesis 3:15; Exodo 9:16; Job 42:7) Ang Hebreo kapitulo 11 nagarekord man sing isa ka malaba nga listahan sang mga Saksi nga nagdampig kay Jehova sa hulusayon sang bug-os uniberso nga pagkasoberano.

Si Cristo Jesus amo ang talalupangdon nga isa nga sa tanan nga tion naghatag sing kompleto nga sabat para sa bahin ni Jehova sa daku nga hulusayon sang bug-os uniberso nga pagkasoberano kag sang integridad sang tawo sa Dios. Isa ini ka daku nga pagkalutos para kay Satanas. Ginpangindian sing bug-os ni Jesus ang tanyag ni Satanas nga ihatag sa iya ang pagginahom sa ibabaw sang bug-os nga kalibutan sa baylo sang isa lamang ka buhat sang pagsimba kay Satanas. Maisugon man nga ginbatas ni Jesus ang isa ka mabudlay gid nga kahimtangan samtang nagatagumatayon sia sa usok sang pag-antos. Nadaug niya si Satanas kag ang kalibutan ni Satanas, nagahatag sa aton sing isa ka himpit nga modelo nga pagasundon.​—Mateo 4:​8-10; 27:50; Juan 16:33; Hebreo 5:​7-10; 1 Pedro 2:21.

Bangod sang madamo sing kalamidad nga panahon nga aton ginakabuhian, daw subong bala nga si Satanas nagabaskog pa kag ang Satanismo mismo nagauswag. Apang, ang tulun-an nga Bugna sang Biblia, nagahatag sing tuhay gid nga laragway sa kapitulo 12, bersikulo 7-9, 12:

“Nagdabdab ang inaway sa langit: Si Miguel [Cristo Jesus] kag ang iya mga anghel nakig-away batok sa dragon, kag ang dragon kag ang mga anghel sini nakig-away apang wala ini magdaug, ukon wala naman sing duog nga nasapwan para sa ila sa langit. Gani ginhulog ang daku nga dragon, ang orihinal nga man-ug, ang isa nga ginatawag nga yawa kag Satanas, nga nagapatalang sa bug-os napuy-an nga duta; ginhulog sia sa duta, kag ang iya mga anghel ginhulog kaupod niya. Bangod sini magkalipay kamo, kamo nga mga langit kag kamo nga nagapuyo sa sini! Kailo para sa duta kag para sa dagat, bangod ang Yawa nagpanaug sa inyo, nga may daku nga kaakig, kay nahibaluan niya nga malip-ot na lang ang iya tion.”

Ang mga Adlaw sang Paraiso nga Duta Mangin Walay Katapusan!

“Kay nahibaluan niya nga malip-ot na lang ang iya tion,” ginapadasig ni Satanas ang iya demonyohanon nga pagpanghikot sa sining “katapusan nga mga adlaw.” (Santiago 5:​1-3) Apang, walay sapayan sang mabudlay nga dag-on, may yara paglaum sa aton mga adlaw. Ginapahayag sang Bugna 21:​1, 3-5 kon ano ini: “Nakita ko ang isa ka bag-ong langit kag isa ka bag-ong duta; kay ang nahaunang langit kag ang nahaunang duta nagtaliwan, kag wala na ang dagat. Pagkatapos sini nabatian ko ang isa ka mabaskog nga tingog gikan sa trono nga nagasiling: ‘Yari karon! Ang kayangkayang sang Dios upod sa mga tawo, kag magapuyo sia kaupod nila, kag sila mangin iya katawhan. Kag ang Dios gid magaupod sa ila. Kag pahiran niya ang tagsa ka luha sa mga mata nila, kag wala na sing kamatayon, ukon kalisod ukon paghibi ukon kasakit pa. Ang nahaunang mga butang nagtaliwan.’ Kag ang Isa nga nagalingkod sa trono nagsiling: ‘Yari karon! Ginahimo ko nga bag-o ang tanan nga butang.’ Subong man, nagsiling sia: ‘Isulat mo, kay ining mga pulong matutom kag matuod.’ ”

Sa amo, si Cristo Jesus magahari sa isa ka libo ka tuig, nga sa amo nga tion pagatumanon ni Jehova ang iya orihinal nga katuyuan nga magtuga sing duta kag ipahamtang sa sini ang katawhan. (Bugna 20:​1, 2, 6) Madumduman ninyo nga sa ginsuguran gintuyo nga tugbon sang katawhan ang duta sing matarong nga kaanakan, atipanon ang duta, tatapon ang mga tanom kag mga sapat sa sini, magkabuhi sa paghidait, kag maghigugmaanay sa isa kag isa. Ginpunggan anay ang katumanan sina nga katuyuan agod tugutan si Satanas sa pagtinguha nga pamatud-an ang iya panghangkat nga sarang niya mapatalikod ang tanan nga katawhan gikan kay Jehova nga Dios. Naulipon niya ang binilyon ka katawhan, apang napaslawan sia sa pila ka milyon nga manugtipig sing integridad.​—Roma 6:16.

Sa tion sang pagpasag-uli, ang kaluoy ni Jehova paagi kay Cristo Jesus magalab-ot bisan tubtob sa lulubngan agod hatagan sing kahigayunan para sa kabuhi nga walay katapusan sa isa ka paraiso nga duta ang binilyon nga napatay sa tion sang nagligad nga linibo ka tuig: “Dili kamo matingala sini, kay ang oras magaabot nga ang tanan nga yara sa handumanan nga mga lulubngan magapamati sa iya tingog kag magaguwa, ang mga nakahimo sing maayo sa pagkabanhaw nga sa kabuhi, kag ang mga nakahimo sing malaut sa pagkabanhaw nga sa paghukom.”​—Juan 5:​28, 29.

Ang bisan sin-o sa amo nga tion nga indi magpahisuno sa matarong nga palibot sinang bag-o nga duta indi magapabilin sa pagdagta ukon sa paglaglag sini, sang mga tanom kag mga sapat, sang paghidait sang katawhan, ukon sang matuod nga pagsimba kay Jehova nga Dios. Ang Salmo 37:​10, 11, 29 nagapalig-on sini: “Kay sa diutay pa nga tion, kag ang malauton wala na; kag talupangdon mo gid ang iya duog, kag wala na sia didto. Apang ang mga mahagop magapanubli sang duta, kag makasapo gid sila sang ila bug-os nga kalipay sa kabuganaan sang paghidait. Ang mga matarong magapanag-iya sang duta, kag magapuyo sila sa sini sing dayon.”

Ang Miqueas 4:​2-4 nagasaad sing matuod nga paghidait kag kalig-unan: “Madamo nga pungsod ang magakadto kag magasiling: ‘Kari kamo, kamo nga katawhan, kag magtukad kita sa bukid ni Jehova kag sa balay sang Dios ni Jacob; kag tudluan niya kita sang iya mga dalanon, kag magalakat kita sa iya mga banas.’ Kay gikan sa Sion magaguwa ang kasuguan, kag ang pulong ni Jehova gikan sa Jerusalem. Kag magahukom sia sa tunga sang madamo nga katawhan, kag magahusay sang mga butang nahanungod sa mabakod nga mga pungsod sa malayo. Kag salsalon nila nga mga punta sang arado ang ila mga espada kag mga galab nga inughagbas ang ila mga bangkaw. Indi na sila magbayaw sing espada, pungsod batok sa pungsod, ukon magtuon pa sila sing inaway. Kag sila magalingkod, ang tagsa sa idalom sang iya ubas kag sa idalom sang iya higuera, kag wala na sing magapakurog sa ila; kay ang baba ni Jehova sang kasuldadusan nagpamulong sini.”

Ining pagkamahidaiton magalapnag man sa kasapatan, kay ang Oseas 2:18 nagasiling: “Sa amo nga adlaw magapakigkatipan ako [si Jehova] may kaangtanan sa ilahas nga kasapatan sang latagon kag sa nagalupad nga mga tinuga sang kalangitan kag sa nagasaug nga mga butang sa duta, kag balion ko ang pana kag ang espada kag untaton ang inaway gikan sa duta, kag pahigdaon ko sila sa kalig-unan.” Ang Ezequiel 34:25 nagapamulong man tuhoy sa isa ka katipan nga wala nagalakip sang presensia sang bisan anong “makahalalit nga ilahas nga sapat.”

Dugang pa, ang Isaias 11:​6-9 nagasaad sing paghidait sa ulot sang mga sapat sa Paraiso: “Ang lobo magapuyo kaupod sang kordero, kag ang leopardo magaluko kaupod sang kanding nga tinday, kag ang tinday nga baka kag ang leon nga totoy kag ang pinatambok magatingob; kag ang bata magatuytoy sa ila. Kag ang baka kag ang oso magahalab; ang ila mga tinday magaluko sing tingob. Kag bisan ang leon magakaon sing dagami kaangay sang baka. Kag ang bata nga nagasuso magahampang sa ibabaw sang buho sang kobra; kag ang nalutas nga bata magakuot sang iya kamot sa palanaguan sang man-ug nga dalitan. Indi sila maghalit ukon maglaglag sa bug-os ko nga bukid nga balaan; kay ang duta matugob sang ihibalo tuhoy kay Jehova subong sang mga tubig nga nagatabon sang dagat.”

Ang mga mahagop magapanubli sang duta. Atipanon nila ang kahanginan, ang katubigan, kag ang duta. Ang mga tuburan kag mga ilig magabasa sa kigas nga kadutaan. Ang kagulangan magapanapot sa kabukiran nga ginkalbo bangod sang makagod nga bentaha. Ang kagulangan magabugana kag ang anay mga desyerto magapamukadkad subong sang rosas. Ang mga bulag makakita, ang mga bungol makabati, ang mga piang magalakat, kag ang mga apa magahambal. (Isaias 35:​1-7) Ang apresasyon sa matahom nga kabukiran kag mga nalupyakan ni Jehova kag sa iya mga baybayon nga nagapangalihid sa nagaalimbukad nga mga dagat kag mga oseano indi gid magatugot sa kakagod sang tawo nga maglutaw liwat agod laglagon ang duta. Mangin mahapos na kag natural, para sa himpit nga katawhan, nga puno sang mga bunga sang espiritu ni Jehova, ang magkalipay, ang tagsatagsa, sa paghigugma sa iya isigkatawo subong sang iya kaugalingon, kag labaw sa tanan ang paghigugma kay Jehova sa bug-os niya nga tagipusuon, kalag, hunahuna, kag kusog. Huo, ang tanan nga katawhan magapamunga sing espirituwal nga bunga sang “gugma, kalipay, paghidait, pagkamainantuson, kalulo, kaayo, pagtuo, kalum-ok, pagpugong sang kaugalingon.”​—Galacia 5:​22, 23.

Tuman Bala Kaayo nga Indi Ini Matuod?

Mahimo nga sa sini nga punto magasiling ang iban nga mga bumalasa, ‘Ina tanan tuman kaayo nga indi ina matuod.’ Apang, indi, ang mga kahimtangan karon tuman kalain nga indi ini dapat magpadayon. Yari na kita sa ginatawag sang Biblia nga “katapusan nga mga adlaw.” Magtulok sa palibot, kag makita mo nga amo gid sini. “Sa katapusan nga mga adlaw,” siling sang Pulong sang Dios, “magaabot ang makahalanguyos nga mga tion nga mabudlay atubangon. Kay ang mga tawo mangin mahigugmaon sang ila kaugalingon, mahigugmaon sang kuwarta, bugalon, palabilabihon, mapasipalahon, malalison sa mga ginikanan, dimapinasalamaton, dimatutom, wala sing kinaugali nga gugma, indi tampad sa bisan anong kasugtanan, mapatupatuon, wala sing pagpugong sang kaugalingon, mabangis, wala sing gugma sa kaayo, mga maluib, dasudaso, nagahabok sa pagpadayaw, mahigugmaon sa kinasadya sa baylo nga sa Dios, may isa ka porma sang diosnon nga debosyon apang nagapanghiwala sang gahom sini; kag palayo kamo gikan sa sini. Apang ang malaut nga mga tawo kag mga malimbong magalain kag magalain pa, nga nagapatalang kag ginapatalang.”​—2 Timoteo 3:​1-5, 13.

Bisan pa may subong sini kaathag nga paglaragway sa aton tion, madamo gihapon ang magayubit. Dapat man ina paabuton. Ang ila pagyubit isa pa ka butang nga may bahin sa mga pamatuod nga yari na kita sa katapusan nga mga adlaw: “Sa katapusan nga mga adlaw ang mga mayubiton magaabot nga may pagyubit, nga nagasunod sang ila kaugalingon nga mga kailigbon kag nagasiling: ‘Diin bala ang saad sang iya presensia? Ti, kutob sang pagtulog sang aton mga ginikanan sa kamatayon, ang tanan nagapadayon subong nga amo sila kutob sa ginsuguran sang pagtuga.’ . . . Ang mga langit kag ang duta nga amo karon ginatigana sa kalayo kag ginatipigan para sa adlaw sang paghukom kag kalaglagan sang mga tawo nga didiosnon. . . . May yara bag-ong mga langit kag isa ka bag-ong duta nga ginahulat naton suno sa iya saad, kag sa sini magapuyo ang pagkamatarong.”​—2 Pedro 3:​3, 4, 7, 13.

Nagsaad si Jehova nga, sa iya bag-ong kalibutan sang pagkamatarong, ining malaut nga daan nga sistema sang kalibutan ni Satanas indi gani pagdumdumon: “Yari karon nagatuga ako sing bag-ong mga langit kag isa ka bag-ong duta; kag ang una nga mga butang indi na pagdumdumon, ukon magsulod sa tagipusuon. Apang magkasadya kamo, kamo nga katawhan, kag magkalipay sing dayon sa akon ginatuga.” (Isaias 65:​17, 18) Ilisipon na lang ang mga adlaw sang Satanismo, kag sa sibu nga tion sang Dios, si Satanas mismo pagalaglagon sing dayon.​—Bugna 20:​1-3, 7-10.

Sa pagkamatuod, ang makalilipay nga mga kahimtangan nga magaabot sa Paraiso nga duta indi tuman kaayo nga indi magmatuod; ginakabig ni Jehova ang karon nga mga kahimtangan sining daan nga sistema sa idalom ni Satanas nga tuman kalain nga magpabilin pa ini.

[Retrato sa Pahina 10]

Ang makalilipay nga mga kahimtangan nga magaabot sa Paraiso nga duta indi tuman kaayo nga indi magmatuod