Pamangkot sang mga Pamatan-on . . .

Nakahimo Bala Ako sing Indi Mapatawad nga Sala?

“WALA pa gid ako nasubuan sing kaangay sini. Wala na ako sing pagtahod sa kaugalingon, kag naghunahuna ako nga ang Dios indi na gid magapatawad sa akon.”​—Marco.a

“Ginluyahan gid ako. Ang pagbatyag nga nakasala naglikop sa akon tagipusuon. Ginhunahuna ko nga nakahimo ako sing pila ka indi mapatawad nga sala.”​—Alberto.

“Wala sing tawo nga wala nagapakasala,” siling sang Biblia. (1 Hari 8:46) Apang kon kaisa ang isa ka pamatan-on mahimo magabatyag nga nagsobra na sia sa paghimo sing isa ka simple nga sayop. Kaangay nanday Marco kag Alberto, mahimo nga ginapigos sia sang padayon nga balatyagon nga nakasala sia. Mahimo sia magbatyag nga ang iya nahimo tuman ka makangilil-ad, tuman gid kalaut, nga indi gid sia mapatawad sang Dios.

Ano kon ang kasubong sini nga balatyagon nagapaantus sa imo? Magpakalig-on ka. May sarang pa mahimo sa imo kahimtangan.

Kon Ngaa ang Aton Konsiensia Nagapasakit sa Aton

Kinaandan lamang nga magbatyag sing kasubo kon nakahimo ka sing isa ka binuang nga sayop. Kita tanan natawo nga nasangkapan sing ginatawag sang Biblia nga “konsiensia.” Amo ini ang nasulod nga igbalatyag sang kon ano ang husto kag sayop, isa ka nasulod nga alarma nga sa masami nagatunog kon maghimo kita sing malain. (Roma 2:​14, 15) Halimbawa, binagbinaga si Hari David. Nakighilahi sia sa asawa sang isa ka tawo. Sang ulihi, ginpadala niya ang bana, nga si Urias, sa isa ka pat-od nga kamatayon. (2 Samuel 11:​2-17) Ang epekto kay David?

“Kay sa adlaw kag gab-i ang kamot [sang Dios] mabug-at sa akon,” siling ni David. Huo, nabatyagan niya ang kabug-at sang dipagkahamuot sang Dios. Si David nagsiling man: “Walay paghidait sa akon mga tul-an bangod sang akon mga sala. Kay ang akon mga kalautan nagalapaw sa akon ulo; subong sang mabug-at nga lulan lakas sila kabug-at sa akon. . . . Nagakalisod ako sa bug-os nga adlaw.” (Salmo 32:4; 38:​3-6) Ang konsiensia ni David padayon nga nagtublag sa iya tubtob nga napahulag sia sa paghimo sing positibo nga pagpanghikot kag naghinulsol sa iya sala.

Sa amo man nga paagi, kon ikaw naedukar sang Cristianong mga ginikanan kag nahamulag ka gikan sa mga prinsipio sang Biblia, magabatyag ka sing kasubo. Ining balatyagon sang paghinulsol kinaandan, kag maayo. Magatulod ini sa isa ka tawo nga tadlungon ang iya kaugalingon ukon magpangayo sing bulig antes mangin isa ka kinaandan nga batasan ang paghimo sang sayop. Sa pihak nga bahin, ang isa ka tawo nga nagapadayon sa sala nagahalit sang iya konsiensia. Sa ulihi mangin dimabinatyagon na ini, kaangay sang nakibulan nga panit. (1 Timoteo 4:2) Pat-od nga magasunod ang imoralidad.​—Galacia 6:​7, 8.

Diosnon nga Pagpangasubo

Indi katingalahan, nian, nga ang Biblia nagahambal tuhoy sa ‘isa ka sala nga sa kamatayon.’ (1 Juan 5:16; ipaanggid ang Mateo 12:31.) Ini nga sala indi lamang isa ka kaluyahon sang unod. Ginhimo ini sing hungod, mabinatuon, kag binuang. Indi ang sala mismo kundi ang kahimtangan sang tagipusuon ang nagahimo sa isa ka nakasala nga indi mapatawad.

Apang, ang kamatuoran nga nagabatyag ikaw sing kasubo sa imo sayop nga paggawi, nagapakita nga wala ikaw nakahimo sing indi mapatawad nga sala. Ang Biblia nagasiling nga “ang diosnon nga kasubo nagahikot sing paghinulsol nga sa kaluwasan.” (2 Corinto 7:10) Sa pagkamatuod, siling sang pagpalig-on nga ginhatag sa Santiago 4:​8-10: “Tinlui ang inyo mga kamot, kamo nga makasasala, kag putlia ang inyo mga tagipusuon, kamo nga mga duha sing hunahuna. Magkalisod kag maglalaw kag maghaya. Bayluhi ang inyo kinadlaw sa paglalaw kag ang inyo kalipay sa kasubo. Paubsa ang inyo kaugalingon sa atubangan ni Jehova, kag bayawon niya kamo.”

Matuod, ang sayop mahimo nga tuman ka serioso. Ang lamharon nga si Julie, halimbawa, nadalahig sa necking kag petting sa iya nobyo. “Sang primero ginbatyag ko nga nakasala ako sing daku,” panuaron niya, “apang samtang nagaligad ang tion, naanad na ako sa sini. Wala na ini nagatublag sang akon konsiensia sing tuman.” Sang ulihi, ang malaut nga buhat nagdul-ong tubtob sa punto sang seksuwal nga paghuliray. “Nagkalisod gid ako,” siling ni Julie. “Ang akon konsiensia nagluya tubtob sa punto nga natabo ini sing madamong beses.”

May mahimo pa bala sa sinang kahimtangan? May yara pa. Ano naman ang tuhoy kay Manases, isa sang mga hari sang Juda? Nakahimo sia sing tuman ka serioso nga mga sala, lakip ang espiritismo kag paghalad sing mga anak. Apang, ginpatawad sia sang Dios bangod sang iya sinsero nga paghinulsol. (2 Cronica 33:​10-13) Ano naman ang tuhoy kay Haring David? Bangod naghinulsol sia sa iya malaut nga mga buhat, nasapwan niya si Jehova nga isa ka Dios nga “maayo kag handa sa pagpatawad.”​—Salmo 86:5.

Ang mga Cristiano sa karon may amo sini nga pasalig: “Kon ituad ta ang aton mga sala, matutom kag matarong sia, kag magapatawad sang aton mga sala kag magatinlo sa aton sa tanan nga pagkadimatarong.” (1 Juan 1:9) Sa kay sin-o dapat magtu-ad ang isa? Una, kay Jehova nga Dios. “Iula sa atubangan niya ang inyo tagipusuon.” (Salmo 32:5; 62:8) Masapwan mo nga mabuligon ang pagbasa sang mahinulsulon nga pagtu-ad ni David sa Salmo 51.

Sing dugang, ang Biblia nagasugo sa mga Cristiano nga nakasala sing serioso sa pagpakighambal sa mga gulang sang kongregasyon. (Santiago 5:​14, 15) Ang ila hanuot nga laygay kag mga pangamuyo makabulig sa imo nga matukod liwat ang imo kaangtanan sa Dios kag liwat nga makatigayon sing isa ka matinlo nga konsiensia. Mahantop nila ang kinatuhayan sa tunga sang kaluyahon kag kalautan. Ginahimo man nila nga makatigayon ikaw sing kinahanglanon nga bulig agod malikawan ang liwat nga paghimo sang imo sayop. Si Julie, nga naghimo sining maisugon nga tikang sa iya kaugalingon, nagapanugyan: “Gintinguhaan ko nga ‘sabdungon ang akon kaugalingon’ kag nagdumdom pa nga ini magamadinalag-on. Apang pagkatapos sang isa ka tuig nahibaluan ko nga nagsayop gid ako. Indi mo malubad ang isa ka serioso nga problema nga wala sing bulig halin sa mga gulang.”

Pagbatyag nga Nakasala sa Magagmay nga mga Sala

Apang, kon kaisa, ang isa ka pamatan-on “makahimo sing sayop nga tikang nga wala niya mahibalui.” (Galacia 6:1) Ukon ginapahanugutan niya nga mangibabaw ang unudnon nga huyog. Ang isa ka pamatan-on sa sini nga kahimtangan mahimo magabatyag sing tudok nga balatyagon nga nakasala​—ayhan sing sobra sangsa nagakadapat. Magaresulta ini sa dikinahanglanon nga kalisang. Ining tudok nga balatyagon nga nakasala mahimo nga resulta sang isa ka mapagros apang tuman ka sensitibo nga konsiensia. (Roma 14:​1, 2) Dumduma, nga kon makasala kita “may mananabang kita upod sa Amay, si Jesucristo, nga matarong.”​—1 Juan 2:​1, 2.

Binagbinaga liwat ang kaso sang lamharon nga si Marco, nga ginhinambitan sa panugod. Ining lamharon nga Cristiano kombinsido nga nakahimo sia sing isa ka indi mapatawad nga sala. Masami sia nagasiling sa iya kaugalingon: ‘Nahibaluan ko gid ang mga prinsipio sa Biblia, apang nagapakasala gihapon ako!’ Ang iya sala? Ang problema sa masturbasyon. ‘Paano ako mapatawad sang Dios kon indi ko mabayaan ining batasan?’ pangatarungan ni Marco. Si Alberto, nga may kaangay man nga pagpakig-away batok sa pag-abuso sa kaugalingon, nagsiling: “Nabatyagan ko ang tuman ka tudok nga nakasala sa nasulod nakon bangod indi ko mahilway ang akon kaugalingon sa sala.”

Ang masturbasyon isa ka mahigko nga batasan. (2 Corinto 7:1) Apang, ang Biblia wala nagakabig sini nga serioso nga sala kasubong sang pagpakighilahi. Sa pagkamatuod, wala ini gani naghinambit sa sini. Busa, ang masturbasyon nga sala mahimo mapatawad. Ang pagtamod sini subong nga indi mapatawad sa pagkamatuod makahalalit; ang isa ka pamatan-on mahimo mangatarungan nga wala na sing rason agod landason ang problema. Apang ang mga prinsipio sang Biblia nagapakita nga ang isa ka Cristiano dapat manikasog sing tuman agod batuan ining batasan.b (Colosas 3:5) Nakahibalo si Jehova nga ‘kita tanan nakasala sing madamong beses’ (Santiago 3:2) Kon ang batasan mahanabo liwat, ang isa ka pamatan-on indi dapat magbatyag nga ginpakamalaut sia.

Matuod man ini sa iban pa nga mga sayop nga tikang kag kasaypanan. Si Jehova wala nagaobligar nga paantuson naton ang aton kaugalingon sing sobra nga pagbatyag nga nakasala. Sa baylo, nagakahamuot sia kon maghimo kita sing mga tikang agod tadlungon ang problema.​—2 Corinto 7:11; 1 Juan 3:​19, 20.

Mga Ginahalinan sang Bulig kag Paumpaw

Sing kaanggid, nian, nagakinahanglan ikaw sing personal nga bulig sa paghimo sini. Ang mahinadlukon sa Dios nga mga ginikanan may mahimo sing daku sa pagbulig kag pagsakdag sa ila mga anak. Kag ang Cristianong kongregasyon nagatanyag man sing iban nga paagi sang pagsakdag. Si Marco nagsiling: “Ang butang nga nakabulig gid sa akon amo ang pagpakigsugilanon sa isa ka gulang. Nakatigayon ako sing kaisog nga magsugilanon sing hilway kag sa pagsugid sa iya sang akon pinakasulod nga mga hunahuna. Nagtubo ang pagsalig ko sa iya, gani nagpangayo ako sing iya laygay.” Si Alberto, man, nagpangayo sing laygay gikan sa isa ka gulang. “Indi ko malipatan ang iya makapalig-on nga laygay,” siling ni Alberto. “Ginsilingan niya ako nga sang sia lamharon pa, may kasubong man sia nga problema. Daw indi ko mapatihan ini. Namati ako sa iya nga may daku nga apresasyon sa iya pagkabunayag.” Sa sinang bulig kag pagsakdag, sanday Marco kag Alberto nakalandas sang ila mga problema. Sila nga duha sa karon nagaalagad nga may katungdanan sa ila kongregasyon.

Ang isa pa ka bulig amo ang hanuot nga pangamuyo. Kaangay ni David makapangamuyo kamo para sa “isa ka putli nga tagipusuon” kag “isa ka bag-o nga espiritu, nga matarong.” (Salmo 51:10) Ang pagbasa sang Pulong sang Dios amo ang isa pa nga ginahalinan sang paumpaw. Halimbawa, masapwan mo nga makapalig-on ang mahibaluan nga si apostol Pablo may yara man nasulod nga pagsumpakilay. Sia nagsiling: “Kon luyag ko maghimo sing maayo, ang malaut malapit gid.” (Roma 7:21) Nagmadinalag-on si Pablo nga kontrolon ang iya sayop nga mga huyog. Gani ikaw man. Mahimo masapwan mo sing partikular nga makapaumpaw ang pagbasa sang mga salmo, ilabi na gid yadtong may kahilabtanan sa pagpatawad sang Dios, subong sang Salmo 25, 86, kag 103.

Bisan ano man ang matabo, likawi nga painon ang imo kaugalingon kag indi pagtuguti nga madaug sang negatibo nga balatyagon. (Hulubaton 18:1) Panginpusli sing bug-os ang kaluoy ni Jehova. Dumduma, sia ‘nagapatawad sang bugana’ pasad sa halad nga gawad ni Jesus. (Isaias 55:7; Mateo 20:28) Dili pagpakadiutaya ang imo mga sala, apang indi man maghinakop nga ang Dios indi makapatawad sa imo. Palig-una ang imo pagtuo kag ang imo determinasyon sa pag-alagad sa iya. (Filipos 4:13) Sa ulihi makatigayon ikaw sing kalinong sa hunahuna kag tudok nga kalipay sa paghibalo nga ikaw napatawad.​—Ipaanggid ang Salmo 32:1.

[Mga footnote]

[Retrato sa Pahina 15]

Ang pagpakighambal sa isa ka kalipikado nga Cristiano makahatag sing bag-o nga pagtamod sa mga butang