San-o Matapos ang Trahedya?

SAN-O mauntat ang pagbiktima sa kabataan sa pagpangidnap, pag-abuso, pagpanghimulos, kag sa masami sa malain nga impluwensia sang ila katubotubo? Ang dugang bala nga pagpatuman sa kasuguan kag mas grabe nga mga silot para sa mga krimen nga nahimo batok sa kabataan magaamlig sa ila? Ang dugang bala sosyal nga mga programa sa pag-aman sing pagkaon, puluy-an, kag edukasyon magatapna sa pag-abuso kag paglayas? Ang pagtudlo bala sing maayo nga pagkomunikar sa mga ginikanan nga nagaulikid sa ila kabataan makabulig sa mga ginikanan nga mabatuan ang dalamguhanon sa kakunyag nga nagaganyat sang ila kabataan sa malaglagon nga palibot?

Bisan pa inang mga tikang mahimo makabulig, tubtob ang gamot nga kabangdanan sinang mga trahedya indi madula, ang kabataan magapabilin nga napaidalom sa madamong pag-antos. Suno sa isa ka pamatan-on, ang bisan anong tikang nga himuon sa paglubad sang problema tuhoy sa nagalayas nga kabataan apang wala nagaupang sang pag-abuso ukon pagpatumbaya sa puluy-an indi mangin epektibo gid, kay nahimo na ang halit.

Ang Gamot nga Kabangdanan

Ano ang gamot sining tanan nga problema? Paano ini madula? Ang Biblia nagapaathag nga ang isa ka pamilya ginasalakay sang dimakita malauton espiritu nga mga tinuga, si Satanas kag ang iya mga demonyo, nga nagakalipay sa kapintas, seksuwal nga paghimulos, kag kalautan. (Genesis 6:​1-6; Efeso 6:12) Sang yari si Jesus sa duta, ang kabataan ginsalakay sining mga demonyo. Ang isa ka bata nga lalaki nag-antos nga nagligid sa duta kag ginpilak sa kalayo.​—Marcos 9:​20-22.

Bisan sang mga siniglo antes magkari si Jesus sa duta, ang mga demonyo naghugyaw sa pagpaantos kag pagpanunog sa lamharon nga kabataan nga ginhalad sa makangilil-ad nga paganong mga dios, subong nanday Baal, Cemos, kag Moloc. (1 Hari 11:​7; 2 Hari 3:​26, 27; Salmo 106:​37, 38; Jeremias 19:​5; 32:35) Busa, karon, sa sining kalibutan nga dugang kag dugang nga nagalain, indi katingalahan nga ang mga demonyo nagapuntariya sa kabataan nga nagaantos gikan sa maluyagon tawhanon nga mga ahente nga nagapakahuya, nagasakit, kag nagapatay sa mga pamatan-on. Ang mga nagahimo sinang sapatsapaton nga mga krimen masami nagapasulod sa ila hunahuna sing pornograpiya, nga nagagatong sang ila kalautan.

Ang pag-ipit nga ginahimo sang mga demonyo sa tawhanon nga rasa nagauswag sa aton tion, bangod ginatawag sang Biblia ining tion sa maragtas nga “ang katapusan nga mga adlaw” sang presente malaut nga sistema sang mga butang. Ini nagtagna nga ini mangin “makahalanguyos nga mga tion nga mabudlay pakigbagayan.” Karon sing labi pa, ang impluwensia sang mga demonyo nagaresulta sa pagpabanaag sang mga tawo sing kalautan sining malauton espiritu nga mga tinuga. Ang Biblia nagtagna nga ang mga tawo sa aton adlaw mangin mabangis, wala sing pagpugong sa kaugalingon, wala sing kinaugali nga pagpalangga, wala sing gugma sa kaayuhan.​—2 Timoteo 3:​1-5, 13.

Nagakabagay ina nga paglaragway sa makagod nga mga tawo nga nagahimo sing mga pelikula, mga musika, mga magasin, kag mga libro nga nagapadaku sang pagpakighilahi, mga droga, paghikog, pagpatay, paglugos, incesto, pag-ulipon, kag pagpaantos. Paagi sa sini kag sa iban pa, ang mga demonyo nagtib-ong sing isa ka kultura nga, kaangay sa mahigko nga hangin, nagdagta sa mga hunahuna kag mga tagipusuon sang mga lamharon kag mga tigulang, ginadula sing amat-amat ang mga talaksan sang pamilya kag diosnon nga moralidad.

Ang nagadugang nga pagpangidnap sing bata, pag-abuso, kag pagpamatay bahin sang tanda sang katapusan nga mga adlaw. Sing dugang, ang Biblia nagsiling nga ‘ang mga tawo mangin mahigugmaon sang kaugalingon, indi tampad sa kasugtanan, dimatutom, mga maluib.’ Gani karon nga mga adlaw ang higot sang pag-asawahay masami nga nagakabugto sa gilayon pagkatapos nga ginhimo sila. Subong nga ang pagdiborsio nagadugang, amo man ang pagpangidnap sang mga ginikanan. Kag ang pagsakit kag pagpatay sa presente ukon una nga tiayon nagadugang, diin ang kalabanan nga biktima amo ang mga babayi. Busa, makita naton ang isa ka kaliwatan sang kabataan nga ginapalig-on sang mga ginikanan nga maglayas paagi sa pagpatumbaya kag pag-abuso sa ila. Sing dugang, ang aton tion ginatandaan sang kabataan nga “malalison sa mga ginikanan,” nga mga “batinggilan,” kag nga nagapakamaayo nga maglayas upod sa ila mga katubotubo sa baylo nga magtahod sa diosnon nga mga talaksan.​—2 Timoteo 3:​2-4.

Malapit na Matapos ang Trahedya

Apang, ang impluwensia ni Satanas kag sang iya mga demonyo malapit na matapos. (Bugna 12:12) Ang tagna sa Bugna 20:​1-3 nagasiling nga dulaon sang Dios si Satanas kag ang iya mga demonyo. Pagkatapos sina, ang langitnon nga Ginharian sang Dios, sa mga kamot ni Jesucristo, magagahom sining duta sa pagkamatarong, magapatuman sing hustisya kag magapasalig sing kasiguruhan para sa tanan. (Salmo 72:​7, 8; Daniel 2:44; Mateo 6:​9, 10) Wala na ang makagod nga sistema sang komersio nga nagapigos sa mga imol kag nagahimulos sa tawhanon nga kaluyahon nga makaganansia, kay “ang kalibutan magataliwan kag ang kailigbon sini.” (1 Juan 2:17) Yadtong tanan nga nagahimo sing kalautan pagadulaon, subong nga gintagna sang Hulubaton 2:22: ‘Kag ang malauton pagaut-don gikan sa duta.’

Ang Miqueas 4:4 nagapaathag nga sa bag-ong kalibutan sang Dios may kalig-unan kag paghidait para sa tanan: “Wala na sing magapahadlok sa ila.” Paano ina mangin posible? Paagi sa harianon nga kasuguan sang gugma. Inang supremo nga kasuguan magagahom sa tanan nga panghunahuna kag mga aksion. Ang magakabuhi sa sadtong tion makatuon sa pagpabanaag sing personalidad ni Jesus kag sang iya Amay, si Jehova nga Dios, kay kon indi, indi sila pagtugutan nga magkabuhi sing padayon. Paagi sa pagsul-ob nila sing ‘pagkaawa, pagkalulo, pagkamapailubon, kag pagkalum-ok,’ madula ang kakagod sa tawo. (Colosas 3:12) Magabanaag sa kalipay ang kabuhi; ang mga puluy-an nga napun-an sing gugma kag pagpalangga mangin kinaandan sa bug-os nga duta.

Ang Isaias 65:​21-23 nagasaad sing bugana nga pagkaon kag matahom nga puluy-an para sa tanan: “Magapatindog sila sing mga balay kag puy-an ini; magatanom sila sing mga ulubasan kag magakaon sang bunga sini. . . . Indi sila magpangabudlay sa walay pulos, ukon magpanganak nga sa kalalat-an.” Wala na sing pag-abuso. Wala na sing pag-antos sang kabataan ukon mga ginikanan.

Mga Benepisyo sa Karon

Bisan pa karon, sa hingapusan nga mga takna sining malaut nga sistema, ang ihibalo tuhoy kay Jehova kag sa iya katuyuan sa pagpasag-uli sining duta sa isa ka paraiso nagadala sing mga benepisyo. Naghatag ini sa madamo nga pamatan-on kag mga ginikanan sing paglaum kag rason sa pagkalipay, bisan pa nga nangin biktima sila sang aton mga tion. Halimbawa, si Tamara, nga ginhinambitan sa nagligad nga artikulo, nagpaathag kon ano ang natabo sa iya kabuhi.

“Sang 18 na ako, nagpamana ako kag amat-amat nga nagbiya sa akon ‘mga barkada,’ diin ang iban sa ila napriso sang ulihi, bangod nagiyan sa mga droga kag pagpamiga. Apang may amo gihapon ako nga personalidad, gani nagsugod ang pagbaisay namon sang akon bana. Apang, wala madugay pagkatapos nabun-ag ang amon anak nga lalaki, isa ka butang ang natabo nga nagpabag-o sing bug-os sang akon kabuhi. Nakasapo ako sing Biblia kag ginsugdan ang pagbasa sini. Isa ka gab-i ginbasa ko ang kapitulo sa Hulubaton nga nagasiling ‘ang pagpangita sing kaalam kaangay sa pagpangita sing natago nga mga bahandi.’ (Hulubaton 2:​1-6) Antes ako magtulog sina nga gab-i, nagpangamuyo ako para sa sinang kaalam. Pagkadason nga aga, ginpislit sang mga Saksi ni Jehova ang akon doorbell. Nagsugod ako sa pagtuon sing Biblia upod sa ila, apang wala ko maaplikar sa gilayon ang akon natun-an gikan sa Biblia. Sang ulihi, nangin determinado ako sa pagsunod sa Cristianong dalanon sang kabuhi kag ginbawtismuhan. Karon, upod sa akon bana, ginabuligan ko ang iban nga makabaton sing paumpaw nga ginaaman sang Dios.”

Huo, nasapwan ni Tamara ang Tuburan sang tanan nga paumpaw, si Jehova nga Dios. Sia ang langitnon nga Amay nga indi gid magabiya sa sadtong nagadangop sa iya. Ang Salmo 27:10 nagasugid sa aton: “Kon magbiya sa akon ang akon amay kag ang akon iloy, nian si Jehova mismo magasapupo sa akon.”

Si Domingos, nga ginhinambitan sa primero, nakasapo man sing isa ka matuod nga pamilya, nga nakahatag sing paglugpay, pagpalig-on, kag pagsakdag. Nagpanugiron sia: “Isa ka adlaw nakabaton ako sing isa ka kopya sang libro nga Listening to the Great Teacher kag nakibot ako sa paghibalo nga ang Dios may ngalan nga Jehova.a Nagtambong ako sa isa sang mga miting sang mga Saksi ni Jehova kag nahayanghag sa akon nakita nga wala sing pagbinahinbahin ano man ang imo kahimtangan sa kabuhi. Ginsugdan ako sa pagtuon sa Biblia sang mga Saksi walay sapayan sang akon pigado nga pagpamiste, barumbado nga pagginawi, kag wala pagsalig sa tanan. Sing amat-amat ginbuligan nila ako nga sikwayon ang akon anay paagi sang pagkabuhi. Ginbuligan pa gani nila ako nga makatigayon sing trabaho. Sang ulihi nabuligan ako nga mag-uswag padulong sa pagpabawtismo.”

Ang mga kongregasyon sang mga Saksi ni Jehova kaangay sa isa ka nagaamlig nga lambat para sa lamharon nga katawhan. Nalipay ang mga Saksi sa pagbulig kay bisan sin-o nga maluyag magtuon sang matahom nga paglaum sa unahan. Daku nga paumpaw ang dalhon sa sadtong nagatinguha sing isa ka kaangtanan sa ila langitnon nga Amay, bangod ang mga Saksi ginhanas sa pag-aman sing laygay kag panuytoy gikan sa Pulong sang Dios, ang Biblia. Ang isa ka Saksi nagpaathag nga dapat ipakita sa mga lamharon nga katawhan nga ang makangilil-ad nga kahimtangan diin sila nagapakig-angot, makangilil-ad man kay Jehova. Nagsiling ang Saksi: “Indi luyag ni Jehova nga abusuhan ang kabataan. Indi niya luyag nga masinulub-on sila. Apang indi niya luyag nga ilisan ang isa ka sahi sang pag-abuso sing isa pa ka pag-abuso​—ang abuso nga makuha nila sa mga kalye. Sarang sila makapalapit sa hamtong nga mga indibiduwal sa organisasyon ni Jehova agod hambalan ang ila problema kag kon paano ini lubaron.”

Para sa kabataan nga may mabinatunon nga tagipusuon, nagaaman ang Pulong sang Dios sing isa ka gamhanan nga motibasyon sa paglikaw sa siod sang pag-ipit sang katubotubo. Si Frances, isa ka 17-anyos nga dalagita, madamong beses nga ginsudyot sang isa ka kabutho nga magligoy sa eskwelahan nga wala nagapanugid sa iya mga ginikanan. Sang ulihi naglayas sia sa puluy-an. Pagkatapos makatuga sing tuman nga kabalaka sa iya ginikanan, nagpauli sia. Pagkatapos sini, nagbisita ang duha ka Saksi gikan sa iya kongregasyon. Nahibal-an nila nga ang kahimtangan sang pamilya indi ang kabangdanan sang problema, kag naghatag sila sing mahigugmaon nga laygay. Ginpaathag nila ang Cristianong obligasyon sang mga pamatan-on sa pagtahod sa ila mga ginikanan (Efeso 6:​1, 2); ang kinahanglanon nga likawan ang pagkadibunayag, bangod wala sia nagsugid sa iya ginikanan nga nagligoy sia (Efeso 4:25); kag ang importansia sang paglikaw sa malain nga mga pagpakig-upod. (1 Corinto 15:33) Nangin positibo ang iya reaksion.

Bulig Gikan sa Hitaas

Nakasapo man si Cheryl sing bulig gikan kay Jehova nga maatubang ang pagkidnap sa iya kabataan sang iya anay bana.b Sang ginpamangkot kon ano ang nakabulig sa iya nga malandas ining makakulugmat nga kahimtangan, nagsiling sia: “Ang una ko nga ginhimo amo ang pagbasa sing Salmo, ilabi na ang Salmo 35. Makalugpay ang paghibalo nga si Jehova nakakita sa inhustisya nga akon nadangatan.” Ang Salmo 35:​22, 23 nagasiling: “Nakita mo ini, O Jehova. Indi maghipos. O Jehova, indi magpalayo sa akon. Pukawa ang imo kaugalingon kag magmata sa akon katarungan, . . . sa akon kahimtangan.”

Pagkatapos sing duha ka tuig, upod ang pagsakdag ni Jehova kag bulig gikan sa mga Saksi, gin-atubang ni Cheryl ang iya anay bana, kag ginbisitahan niya ang iya kabataan. Nakahatag sia sing makapaumpaw nga mga sabat sa kon ngaa natabo ini sa ila kag ginpasalig sila nga wala niya sila ginpabay-an. Bangod ginhanas ni Cheryl ang iya kabataan sa pagpadungog kay Jehova, nasugiran niya sila sang pagsalig niya sa ila. Nagpaathag sia: “Nahibaluan ko nga ang akon kabataan nagahigugma kay Jehova, kag indi niya pagtugutan nga mahalitan sila sing dayon.”

Amo yadto ang paagi nga nalubad ang problema. Bangod sang paghimud-os ni Cheryl sa pagpakig-angot sa mga opisyales sa imigrasyon kag sa iya pagsalig kay Jehova paagi sa hanuot nga pangamuyo, gin-uli ang iya kabataan sa iya. Si Cheryl nagsiling: “Makasiling gid ako nga paagi lamang sa kamot ni Jehova nga nabawi ko sila.”

Importante kaayo nga tudluan ang aton kabataan karon sa pagkilala kay Jehova kag sa pagsimba sa iya! Ang Biblia nagasiling sa 1 Pedro 3:12 nga ang mga mata ni Jehova ‘nagatamod sa mga matarong, kag ang iya mga dulunggan nabuksan sa ila mga pangamuyo.’ Si Jehova isa gid ka palalipdan para sa aton kabataan. Ang iya ngalan ‘isa ka torre nga mabakod. Ang matarong nagadalagan pasulod sa sini kag ginahatagan sing proteksyon.’​—Hulubaton 18:10.

Walay sapayan nga nagakabuhi kita sa tuman ka makatalagam nga mga tion kag indi pirme mahibaluan kon ano ang matabo sa aton kabataan, ang nagasimba kay Jehova nga mga ginikanan nakahibalo nga wala sing dayon nga kahalitan nga magaabot sa ila matutom nga mga lamharon. Nagsaad pa gani sia nga banhawon gikan sa minatay ang mga nag-antos subong biktima sang aton panag-on kag panason ang kasakit kag pag-antos nga ginhimo sa ila.​—Isaias 65: 17, 18; Juan 5:​28, 29.

Ang paglaum nga bag-ong kalibutan sang Dios makakulunyag gid. Amo man ang paghibalo nga sa dili madugay dulaon sang Dios si Satanas kag ang iya malaut nga sistema sa duta. Madula na ang bisan ano nga peligro sa aton kabataan. Isa sang mga ambahanon nga ginaamba sang mga Saksi ni Jehova sa ila mga miting sa kongregasyon nagalaragway sinang bag-o nga sistema sa sining paagi: “When songs of children fill the air,/when joy and peace are everywhere,/then, too, you’ll see the dead arise,/if you keep your eyes on the prize”!

Sa masunod nga tion nga makasugata kamo sing pila ka mga Saksi, pangabaya sila nga ipakita sa imo kon paano man ikaw makatuon sing dugang pa tuhoy sa mga kalipay nga yara lang sa unahan sa nagapakari nga matarong nga bag-ong kalibutan sang Dios. Malipay sila sa pagbulig sa imo nga makita kon paano ang Pulong sang Dios makadala sing daku nga paumpaw karon kag sing dayon nga kabuhi sa palaabuton.​—Salmo 37:29; Bugna 21:​4, 5.

[Mga footnote]

[Blurb sa pahina 12]

“Indi luyag ni Jehova nga ang kabataan abusuhan”