Maghanda Para sa Isa ka Masanag nga Palaabuton

“PADAYON kamo nga nagahanda,” palig-on ni Jesus. (Lucas 12:40) Kon himuon naton ini, sa pag-abot ni Cristo nga “may gahom kag dakung himaya,” makasabat kita nga may kalipay sa iya sugo: “Maghangad kamo kag bayawa ang inyo mga ulo, kay ang pagluwas sa inyo nagahilapit.”​—Lucas 21:​27, 28.

Ano nga sahi sang kaluwasan? Amo ang sahi sang kaluwasan nga naagom ni Noe kag sang iya pamilya​—huo, sa katapusan sining kalibutan! “Ang kalibutan nagataliwan,” sulat ni apostol Juan, “apang sia nga nagahimo sang kabubut-on sang Dios nagapabilin sing dayon.”​—1 Juan 2:17.

Sa bag-ong kalibutan ni Jehova, ang dutan-on nga mga sakop sang Hari, si Jesucristo, magaagom sing kabuhi nga walay katapusan. “Ang mga matarong gid magapanag-iya sang duta,” siling sang Biblia, “kag sila magapuyo sing dayon sa sini.” (Salmo 37:29) Daw ano katahom nga palaabuton ang ginasaad sang Dios para sa iya katawhan! “Ang Dios mismo magaupod sa ila,” siling sang iya Pulong. “Pahiran niya ang tagsa ka luha sa mga mata nila, kag wala na sing kamatayon, ukon kalisod ukon paghibi ukon kasakit pa.” Matuod ini nga tagna!​—Bugna 21:​3, 4.

Apang, agod maagom ining palaabuton, dapat ikaw maghulag. Ang pagtigayon sing ihibalo amo ang una nga kinahanglanon. Ang Biblia nagapaathag: “Nagakahulugan ini sing kabuhi nga walay katapusan, ang pagkuha nila sing ihibalo tuhoy sa imo, ang lamang matuod nga Dios, kag tuhoy sa isa nga imo ginpadala, si Jesucristo.”​—Juan 17:3.

Dapat man ikaw makigtipon sing regular upod sa iban pa nga nagatinguha sining ihibalo, subong sang ginpanugyan sang apostol: “Magpatugsiling kita kon paano magpukaw sa isa kag isa sa gugma kag maayong mga buhat, nga wala nagabiya sang aton pagtilipon sing tingob . . . kag labi pa gid sa ginatan-aw ninyo nga nagahilapit ang adlaw.” (Hebreo 10:​24, 25) Sa pagkamatuod, makita sang katawhan ni Jehova nga nagahilapit pa gid ang adlaw sang kaluwasan pasulod sa bag-ong kalibutan sang Dios, kag gani nakilala sila sa ila pagtilipon sing tingob.

Nagkomento tuhoy sa isa ka pagtinipon sa isa ka daku nga istadyum, ang Sunday Telegraph sa London nagreport: “Wala sing pagkawalay paglaum nga sa masami ginaangot sa mga nagasiling nga ‘Malapit Na ang Katapusan.’ Mahimo nga malapit na ini. Samtang wala pa ini daw subong bala nga ang tanan kontento sa isa ka maligdong, matarong, Diosnon apang malipayon nga paagi.” Nagdugang pa ang pamantalaan: “Kon ang karon nga sistema sang kalibutan malapit na malusod, daw subong bala nga ang mga Saksi sa Twickenham nakahanda na sa pag-organisar sang bag-o.”

Ang paghanda nagakahulugan sing pagkamasako, nagahimo sing hilikuton kaangay sang ginhimo ni Noe, nga nag-alagad sang mga adlaw antes sang Anaw subong “isa ka manugbantala sang pagkamatarong.” (2 Pedro 2:5) Ang paghanda nagakahulugan man sing pagpakigbahin “sa balaan nga paggawi kag mga buhat sang diosnon nga debosyon.” Ginaagda ikaw, huo, ginapalig-on, nga magbuylog sa katawhan ni Jehova sa ‘paghulat kag sa pagdumdom sang pag-abot sang adlaw ni Jehova.’​—2 Pedro 3:​11, 12.