1995—Ano ang Aton Palaabuton?

“Nagakinahanglan ang kalibutan sing tuytoy sa baylo sang mga pangabay lamang para sa demokrasya kag hilway nga merkado​—apang indi ini matigayon.”​—Will Hutton, Guardian Weekly.

GIKAN sa tawhanon nga pagtamod, daw matuod ina nga pinamulong. Daw kulang ang kalibutan sing isa ka masaligan nga tuytoy nga magatudlo sang direksion padulong sa paghidait, kalig-unan, hustisya, pagkaalalangay, kag maayong panguluhan. Gintilawan sang tawo ang halos tanan nga sistema sang panguluhan, halin sa monarkiya tubtob sa republika, halin sa diktatoryal tubtob sa demokrasya, apang daw indi gihapon magamhan ang kalibutan. Sa diin sia maliso karon?

Daw may yara pililian​—ang banas paubos sa isa ka kalibutan nga may kapin nga kasingki, krimen, kagarukan, inhustisya, pagkasalimpapaw sa relihion kag politika, pagdumtanay sang mga pungsod, kag paghingalit sa mga imol. Amo ina ang banas nga siling sang iban magadul-ong sa anarkiya.

Ukon yara ang mabudlay, masakripisyuhon sa kaugalingon nga pagtaklad padulong sa isa ka mas maayo nga kalibutan nga napasad sa panguluhan nga solusyon sang Dios, nga masapwan sa Biblia. Mabudlay ini bangod nagakinahanglan ini sing moral nga kaisog, personal nga sakripisyo, isa ka espirituwal nga pagtamod sa kabuhi, kag pagtuo sa isa ka may katuyuan nga Dios. Apang agod magmadinalag-on ini nga pagtaklad dapat man mangin mapainubuson ang isa ka tawo​—mapainubuson sa atubangan sang iya Manunuga. Dapat sia magdangop sa Dios para sa matarong nga paggahom. Ang Cristianong apostol nga si Pedro naglaygay: “Busa, magpaubos kamo sa idalom sang gamhanan nga kamot sang Dios, agod nga bayawon niya kamo sa nagakaigo nga tion; samtang ginatugyan ninyo sa iya ang tanan ninyo nga kabalaka, kay sia nagaulikid sa inyo.”​—1 Pedro 5:​6, 7; Bugna 4:11.

Sin-o ang Nagapadabdab sang Dumot?

Indi mabag-o sang tawo sing permanente ining kalibutan padulong sa maayo​—ang makagod, malaut nga mga tawo tuman kadamo kag tuman ka gamhanan. Husto si manalagna Jeremias sang magsulat sia: “Nahibaluan ko gid, O Jehova, nga ang dalanon sang tawo wala sa iya kaugalingon. Wala sa tawo nga nagalakat ang pagtuytoy sang iya tikang.” (Jeremias 10:23) Kon wala ang Dios, indi matuytuyan sang tawo sing madinalag-on ang iya mga tikang para sa kaayuhan sang bug-os tawhanon nga pamilya. Ngaa subong sina? Bangod dugang sa aton duna nga pagkadihimpit yara pirme ang dikitaon nga kaaway si Satanas, nga nakahanda sa iya malaut nga impluwensia, subong sang ginhimo niya sa Rwanda, agod magpinatyanay ang mga tawo.​—Genesis 8:21; Mateo 4:​1-11.

Agod buyukon sa tagipusuon kag hunahuna sang mga tawo ang pagdampigdampig, pagdumtanay, kag pagpatyanay, ginatanom ni Satanas sa mga pungsod ang ideya sang pagkalabaw sang pungsod, tribo, kag relihion. Ining tudok nga dumot ginatanom halin sa pagkalapsag sang mga ginikanan nga nalatom na sini, sa masami bangod sang tradisyon sa sulod sang mga siglo. Nian, ining tradisyon ginapabakod sang eskwelahan kag relihion. Amo kon ngaa minilyon ka tawo ang nagadaku nga may dumot kag kaugot sa ila tagipusuon. Ginakondisyon kag ginabuyok ang ila panghunahuna halin sa pagkalapsag nga awayon ang ila isigkatawo kon suguon sila sang malalangon politikal kag relihioso nga mga lider. Ang pagpabutyag sing dimakatarunganon nga mga eslogan kag pahayag sa telebisyon sarang makapainit, makapadabdab sang kahimtangan, nga nagadul-ong sa “pagpapas sa tribo” ukon pag-ubos sa bug-os nga tribo.

Sa pagpakita kon ano ang mahimo matabo sa malapit nga palaabuton, si Martin van Creveld, isa ka istoryador sa militar sa Israel, nagsulat sa The Transformation of War: “Pasad sa makita karon, may posibilidad nga ang relihioso . . . nga pagkapanatiko magatungod sing daku pa nga papel sa pagpadabdab sing armado nga inaway” sa Nakatundan sangsa bisan anong tion “sa nagligad nga 300 ka tuig.” Sa amo ang relihion, sa baylo nga isa ka puwersa para sa paghidait kag sa pagbayaw sang espirituwalidad sang katawhan, nagapabilin gihapon sa iya maragtason nga papel subong manugsugyot sing dumtanay, inaway, kag pinatyanay.

Ginsaad ang Isa ka Tuhay nga Palaabuton

Agod ang katawhan makalipikar para sa kabuhi sa isa ka matarong nga bag-ong kalibutan, dapat sila makigbahin sa pagtuman sang tagna ni Isaias: “Tudluan niya [Jehova] kita sang iya mga dalanon, kag magalakat kita sa iya mga banas. . . . Kag sia magahukom sa tunga sang mga pungsod kag magahusay nahanungod sa madamong katawhan. Kag ang ila mga espada salsalon nila nga mga punta sang arado kag ang ila mga bangkaw nga mga galab nga inughagbas. Ang pungsod indi magbayaw sing espada batok sa pungsod, kag indi na sila magtuon sing inaway.”​—Isaias 2:​3, 4.

Sin-o sa karon ang nagapamati sa sining dalayawon nga tagna sa bug-os nga kalibutan? Sin-o ang napatay sa Rwanda sa baylo nga patyon ang ila mga masigkatumuluo sa tuhay nga tribo? Sin-o ang mga napatay sa mga kampo konsentrasyon sang mga Nazi sa baylo nga mag-alagad sa militar ni Hitler? Sin-o ang mga nabilanggo sa madamo nga pungsod sa baylo nga magtuon sa pagpakig-away? Amo sila ang nagabenepisyo sa katumanan sang Isaias 54:13: “Ang tanan mo nga anak tudluan ni Jehova, kag mangin bugana ang paghidait sang imo mga anak.”

Ang mga Saksi ni Jehova sa bug-os nga kalibutan may yara sina nga paghidait karon bangod ginbaton nila ang pagtudlo ni Jehova gikan sa iya Pulong, ang Biblia. Ginasunod nila ang mga panudlo kag huwaran ni Cristo Jesus. Kag ano ang ginsiling niya: “Ginahatagan ko kamo sing bag-ong sugo, nga maghigugmaanay kamo; subong nga ako naghigugma sa inyo, maghigugmaanay man kamo. Sa sini ang tanan makahibalo nga mga disipulo ko kamo kon may gugma kamo sa isa kag isa.” (Juan 13:​34, 35) Ginapakita sang mga Saksi ni Jehova ini nga gugma tubtob sa kasangkaron nga, bisan pa mga Katoliko kag mga Protestante anay, may paghiusa nga nagapangabudlay sila karon sa Naaminhan nga Ireland. Bisan pa sang una magkaaway sila sing relihion, nagabuligay sila karon subong mga Cristiano sa Israel, sa Lebanon, kag sa iban pa nga mga kadutaan. Wala na sila nagatuon sa pagpakig-away. Daw ano kuntani ka tuhay kon ang tanan nga katawhan sang kalibutan nagpamati sa mga pulong ni Jesus kag nag-aplikar sini sa ila kabuhi!

Nagapati ang mga Saksi ni Jehova nga ang ginsaad nga bag-ong kalibutan sang Dios malapit na, isa ka kalibutan nga pagagamhan sang isa ka langitnon nga panguluhan. Ano ang ila sadsaran sa sining positibo nga paglaum?

Ang Ginsaad Desidido nga Paghikot sang Dios

Sa iya Pulong, ang Biblia, nagsaad ang Dios sing isa ka matarong nga paggahom para sa tanan matinumanon nga katawhan. Paagi sa iya manalagna nga si Daniel, nagtagna sia nga sa katapusan sining karon nga sistema, magatukod sia sing isa ka permanente kag matarong nga panguluhan. “Sa mga adlaw sadto nga mga hari magapatindog ang Dios sang langit sing ginharian nga dili gid malaglag. Kag ang ginharian indi gid pag-ibilin sa iban nga katawhan. Dugmukon sini kag papason ining tanan nga ginharian, kag ini magapadayon tubtob sa tion nga walay latid.” (Daniel 2:44) Amo man ini nga paggahom sang Ginharian ang gintudlo ni Cristo sa mga tumuluo nga pangabayon nila sa iya bantog nga pangamuyo: “Amay namon nga yara sa mga langit, pakabalaanon ang imo ngalan. Magkari ang imo ginharian. Paghimuon ang imo kabubut-on, subong sang sa langit, amo man sa duta.”​—Mateo 6:​9, 10.

Sa sina nga pangamuyo ginapangabay naton ang Dios nga tumanon ang iya mga saad tuhoy sa iya matarong nga paggahom. Kag nahibaluan naton nga ang Dios indi makabutig. Nagpamulong si Pablo tuhoy sa “kabuhi nga walay katapusan nga ginsaad sang Dios, nga indi makabutig, sa wala pa ang malawig gid nga tion.” (Tito 1:2; Hebreo 6:​17, 18) Kag ano ang ginsaad sang Dios? Si apostol Pedro nagasabat: “May bag-ong mga langit kag bag-ong duta nga ginahulat naton suno sa iya saad, kag sa sini magapuyo ang pagkamatarong.”​—2 Pedro 3:13; Isaias 65:17; Bugna 21:​1-4.

Antes matigayon inang matarong nga paggahom diri sa duta, kinahanglan anay matabo ang daku nga pagpaninlo. Ang mga tagna sang Biblia nagatingob sa pagpakita nga ini nga buhat sang pagtinlo sa kalibutan gikan kay Satanas kag sa iya malaut nga mga puwersa mahanabo sa indi madugay. (Tan-awa ang Mateo, kapitulo 24; Lucas, kapitulo 21; kag Marcos, kapitulo 13.) Ining hingapusan nga buhat sang pagpaninlo ginatawag nga inaway sang Armagedon, “ang inaway sang dakung adlaw sang Dios nga Labing Gamhanan.”​—Bugna 16:​14, 16.

Walay sapayan sang ginahunahuna sang madamo, wala sing kabilinggan ang tuig 2000. Ang matuod, ina nga petsa para lamang sa Cristiandad. Ang iban nga mga kultura may ila kaugalingon nga mga sistema sang pagpetsa. Ang importante amo nga karon na ang tion nga magliso sa Dios kag sa iya Pulong agod pamatud-an sa kaugalingon kon ano “ang maayo kag kalahamut-an kag himpit nga kabubut-on sang Dios.” (Roma 12:​1, 2) Ang importante amo nga karon na ang tion nga magpili ikaw​—maglakat padulong sa isa ka palaabuton nga ginapakamaayo sang Dios ukon magpadayon sa banas sang kapaslawan nga ginatanyag sang kalibutan ni Satanas. Ginapalig-on namon ikaw nga pilion ang dalanon sang Dios. Pilia ang kabuhi!​—Deuteronomio 30:​15, 16.

[Blurb sa pahina 14]

“May bag-ong mga langit kag bag-ong duta nga ginahulat naton suno sa iya saad.” ​—2 Pedro 3:13

[Retrato sa Pahina 13]

Matuod gid nga masalsal sang mga pungsod ang ila mga espada nga mga punta sang arado sa idalom lamang sang paggahom sang Ginharian sang Dios