May Isa pa Bala nga Imo Masaligan?

“Isa sia sa pila ka tawo sa guwa sang amon pamilya nga ginasaligan gid sang akon mga ginikanan. . . . Ginapakita niya nga isa sia ka maayo kag mainulikdon nga tawo nga indi gid maghimo sing bisan ano nga makahalit sa amon. . . . Isa sia sa pila ka tawo sa akon kabuhi nga ginsaligan ko gid sing bug-os.”

AMO sina ang paglaragway sang isa ka lamharon nga babayi tuhoy sa iya pagsalig sa doktor sang iya pamilya. Sing makapasubo, isa yadto ka makatalagam dinagakaigo nga pagsalig. Sanglit sang 16 anyos sia, gin-abusuhan sia sa sekso sining doktor. “Ginbutigan niya ako kag gindayaan,” siling niya sa mga awtoridad sa korte, nga naghatag sing hustisya.​—⁠The Toronto Star.

Nagguba ang Pagsalig sa Bisan Diin

Ang pagsalig, kaangay sa isa ka matahom apang maluya nga bulak, mahapos magabot kag matapakan. Ginalaglag ini bisan diin! Si Mi­chael ­Gaine, nga sekretaryo sang kardinal kag sang arsobispo sa Inglaterra nagsiling: “Sadto anay ang tanan nagasalig sa isa ka pari. Ang mga pamilya nagatugyan sang ila kabataan sa idalom sang iya pag-atipan. Wala ko na ginapaabot ina karon. Ginhamulag kita gikan sa sinang pagsalig sing dayon.”​—⁠The Guardian Weekend.

Ginadayaan sang mga negosyante ang mga kompetensya. Ang malimbungon nga mga manugpasayod nagadaya kag nagahingalit sa mga konsumidor. Ginkawatan sang isa ka batinggilan nga opisyal ang mga pundo para sa pension sang iya kaugalingon nga kompanya, ginakawatan ang iya mga empleyado sang ila pundo nga kuwarta. Masami nga ginakawatan sang mga empleyado ang ila mga amo. Halimbawa, ginpatalupangod sang isa ka report, nga “ang mga negosyo sa Can­ada nagakapierde sing mga $20 bilyones sa isa ka tuig bangod sang kinawatay sa sulod sang kompanya.”​—⁠­Canadian Business.

Indi tanan nga politiko ang dimasaligan. Apang ang mga report kaangay sang masunod nagapakibot sa pila lamang ka tawo: “Duha ka semana sa tapos ginpatay ang isa sang labing kontrobersyal nga politiko nga babayi sa Pransia, ginbuyagyag sang pulisiya ang pagpangdaya sa politika kag kriminal nga paghimbunay nga madugay na nga nagtago sing hilikuton sang panguluhan sa baybayon sang Meditiraneo.”​—⁠The Sunday Times, London.

Sing masami, sa suod nga mga kaangtanan ang pagsalig nagakadula. Ginaluiban sang mga bana kag mga asawa ang ila mga tiayon. Ginaabusuhan sang mga ginikanan ang mga kabataan. Ginadayaan sang mga kabataan ang mga ginikanan. Sang ginbuksan ang talaguan sang mga dokumento sang Stasi, ang sekreta sa anay Sidlangan nga Alemanya, ginbuyagyag sini ang isa ka “lapnag nga sistema sang pagpangdaya” sang mga tawo nga ginkabig nga mga abyan. Sa sistema sang pagpangdaya, siling sang isa ka report, “ang gahom sang Stasi nagdangat tubtob sa hulot-klasehan, sa pulpito, sa hulot-tulugan, bisan pa sa kulumpesaran.”​—⁠Time.

Sa Ireland isa ka kolumnista ang nagsulat: “Ginbutigan kita, ginpatalang kita kag gingamit kag gin-abusuhan kag gintamay sadtong ginbutang naton sa mga palangakuan.” (The Kerry­man) Bangod pirme sila ginluiban, madamong tawo ang wala na sing ginasaligan. Ano ang aton sarang mahimo agod mapat-od nga ang aton pagsalig nagakaigo? Ang duha ka masunod nga artikulo magausisa sining pamangkot.