Makasalig Ka sa Dios

MAKASALIG ka sing bug-os sa Dios kag sa Iya pulong, ang Biblia. Sa tapos sang bug-os kabuhi nga pagsalig sa Dios, ang isa ka tawo, nga nagaedad sing kapin sa 100 ka tuig, naghatag sining rason sang iya pagsalig: “Yari karon!” siling niya, “Sa sining adlaw nagalakat ako sa dalanon sang bug-os nga duta, kag nakahibalo kamo sa bug-os ninyo nga mga tagipusuon kag sa bug-os ninyo nga mga kalag nga wala sing isa ka butang nga nakulang sa tanan nga butang nga maayo nga ginpamulong nahanungod sa inyo ni Jehova nga inyo Dios. Ang tanan nahanabo sa inyo. Wala sing isa ka butang nga nakulang sa ila.”​—⁠Josue 23:⁠14.

Ining tawo, si Josue, isa ka lider sang dumaan nga Israel, nakaeksperiensia sing bug-os nga pagkamasaligan sang Dios kag sang iya Pulong. Ang tanan nga ginsaad sang Dios sa Israel natuman. Kon makilala mo pa sing dugang ang Manunuga kag ang iya Pulong, mapalambo mo ang amo man nga pagsalig. Isa ka sumilimba sang Dios sang ulihi, si Hari David, nagpabutyag sini sa sining paagi: “Ang mga nakakilala sang imo ngalan magasalig sa imo, kay wala ka magbiya sa mga nagapangita sa imo, O Jehova.”​—⁠Salmo 9:⁠10.

Indi Ka Gid Pagpaslawon sang Dios

Kon labi mo nga ‘makilala ang ngalan sang Dios’ kag kon ano ang ginapahangop sina nga ngalan​—⁠ang iya mga katuyuan, mga hilikuton, kag mga kinaiya​—⁠labi man nga magsalig ka sa iya. Isa sia ka masaligan nga Abyan nga indi gid magpaslaw sa imo, ukon indi magtuman sang iya ginsaad. Kag indi maluyahan sing buot bangod sang pagkasalimpapaw sang mga nagapangangkon nga iya mga tiglawas kag nian ginalimbungan ang iban. Ang mga tawo nga kaangay sina ginakilala sang Biblia subong dimasaligan. Ang relihioso nga mga salim­papaw nagasiling sing isa ka butang apang nagahimo sing kabaliskaran. Subong sang ginpaandam ni apostol Pedro, ginahingalitan nila ang ila mga panong. Si Pedro nagsulat: “Bangod sini ang dalanon sang kamatuoran pakamalauton. Kag, sa ila pagkamahamkunon pagahingalitan nila kamo paagi sa pinahituhito nga mga pulong.”​—⁠2 Pedro 2:​2, 3.

Ina nga mga tawo wala nagatiglawas sa Dios. Ginpakahuy-an nila ang iya Pulong. Ngaa indi usisaon sa imo kaugalingon ang rekord mismo kag testimoniya sang Dios subong ginapakita sa Biblia? ‘Apang,’ mahimo ipamangkot mo, ‘ngaa dapat ako magsalig sing labi sa Biblia sangsa bisan anong iban pa nga libro?’ Matuod nga may madamong relihioso nga pagpangdaya sa bug-os nga maragtas, apang tuhay ang Biblia. Binagbinaga ang masunod nga mga rason sa pagsalig sa Biblia.

Mga Rason sa Pagsalig sa Biblia

Makasalig ka sa Biblia bangod ang mga saad kag mga tagna sini pirme nagakatuman. Yari ang isa lamang ka halimbawa. Bisan pa nga daw indi ini mapatihan sang bihag nga Israel, si Jehova nga Dios, ang awtor sang Biblia, nagsaad nga hilwayon niya sila gikan sa pagkabihag sa gamhanan nga Babilonia kag ipasag-uli sila sa Jerusalem. Daw indi ini masaligan bangod ang Babilonia amo anay ang nagapangibabaw nga kagamhanan sa kalibutan kag naglaglag sing bug-os sa Jerusalem. Apang mga duha ka gatos ka tuig sing abanse, ginhingadlan pa gani ni Jehova ang Persianhon nga manuggahom nga si Ciro subong ang isa nga magapukan sa Babilonia kag hilwayon ang Iya katawhan kag nagtagna kon paano ang suba nga pamakod sang Babilonia mapaslawan. Mabasa mo ang rekord sa Isaias 44:​24–45:⁠4.

Ginapaathag sang libro nga Reasoning From the Scriptures kon paano natuman ang saad: “Wala pa matawo si Ciro sang ginsulat ang tagna. . . . Sing detalyado ang tagna natuman sugod sang 539 B.C.E. Ginpalikaw ni Ciro ang mga tubig sang Suba Eufrates padulong sa artipisyal nga linaw, ang mga gawang sa suba sang Babilonia napatumbayaan nga bukas sa tion sang kapiestahan sa siudad, kag ang Babilonia napukan sa mga Medianhon kag Persianhon sa idalom ni Ciro. Sa tapos sadto, ginhilway ni Ciro ang mga tinapok nga Judiyo kag ginpabalik sila sa Jerusalem upod ang sugo nga tukuron liwat ang templo ni Jehova didto.”a Ang tagsa ka saad sang Dios kaangay sini, ang tagsa ka tagna nga makita sa Biblia, natuman gid sing sibu.

Ang isa pa ka halimbawa sang natuman nga tagna amo gid ang kamatuoran nga ang pagsalig nagakadula sa aton siglo. Gintagna ini sang Biblia subong nagapakilala nga tanda sang tion nga aton ginakabuhian, kay ginatawag sini ang dag-on nga nagsugod sang Inaway Kalibutanon I sang 1914 “ang katapusan nga mga adlaw” kag nagasiling nga magadala ini sing ‘makahalanguyos nga mga tion nga mabudlay pakigbagayan.’ Ginpahibalo sini nga sa aton adlaw ang mga tawo mangin “mahigugmaon sa kaugalingon, . . . palabilabihon, bugalon, . . . dimapinasalamaton, dimatutom, wala sing kinaugali nga gugma, indi tampad sa bisan anong kasugtanan, mapasipalahon, . . . maluib, batinggilan, nagahabok sa pagpadayaw.” Kag nagtagna man ini: “Ang malaut nga mga tawo kag mga malimbungon magalain kag magalain pa.” (2 Timoteo 3:​1-4, 13) Amo gid sina ang aton nakita sa aton tion.

Makasalig ka sa Biblia bangod bug-os ini nga maminatud-on. Wala pa gid sing isa nga nagmadinalag-on sa paghangkat sang pagkamaminatud-on sang Biblia. Ang bantog nga sientipiko nga si Sir ­Isaac New­ton nagsiling: “Nakasalapo ako sing mas pat-od nga mga tanda sang pagkamaminatud-on sa Biblia sangsa bisan anong sekular nga maragtas.” Wala ini sing pagpalsipikar kaangay sa “lista-adlawan” ni Hitler! Kag kamusta ang Biblia kon ipaanggid sa iban nga dumaan nga mga sinulatan? Ang The Bible From the Beginning nagasiling: “Sa kadamuon sang dumaan nga MSS. [mga manuskrito] nga nagapamatuod sing isa ka sinulatan, kag sa kadamuon sang mga tinuig nga nagligad sa ulot sang orihinal kag sang nagapamatuod nga MSS., natigayon sang Biblia ang isa ka maathag nga bentaha sangsa dumaan nga mga sinulatan [nanday Homer, Plato, kag iban pa]. . . . Sa kabilugan ang dumaan nga MSS. tuman ka diutay kon ipaanggid sa Biblia. Wala sing dumaan nga libro nga napamatud-an sing maayo subong sang Biblia.” Ang tanan nga nahanungod sa Biblia nagatudlo sa bug-os nga pagkamaminatud-on sini.

Makasalig ka sa Biblia bangod sibu gid ini sa tanan nga ginasiling sini. Ang Biblia nagasiling nga “ginauntay [sang Dios] ang aminhan sa ibabaw sang wala unod nga kahawaan, ginabitay niya ang duta sa ibabaw sang wala.” (Job 26:⁠7) Sa baylo nga suliton ang kunokuno nga mga teoriya nga lapnag sadtong tion, subong nga ang duta nagatungtong sa mga elepante, ginsiling sang Biblia ang napamatud-an na nga sientipiko nga kamatuoran​—⁠nga ang duta “nagabitay” sa espasyo. Dugang sa sina, kapin sa duha ka libo ka tuig antes ang panahon ni Co­lum­bus, maathag nga ginsiling sang Biblia nga ang duta tipulon.​—⁠Isaias 40:⁠22.

Makasalig ka sa Biblia bangod sang pagkabunayag kag pagkaprangka sini. Ang mga manunulat sang Biblia wala sing ginhimutig. Bisan pa ang ginasiling nila makapalain sa ila kaugalingon, sa ila mga kaupdanan, kag sa ila mga gumalahom, bunayag nga ginareport nila ang mga kamatuoran. Sa iya ebanghelyo si apostol Mateo, halimbawa, hayag nga nagbaton nga ang mga apostoles ni Jesucristo kon kaisa nagpakita sing kakulang sing pagtuo, nagkinagamo para sa kabantugan, kag nagsikway pa gani kay Jesus sang gindakop sia.​—⁠Mateo 17:​18-20; 20:​20-28; 26:⁠56.

Ang isa pa ka talalupangdon nga rason sa pagsalig sa Biblia amo nga ang laygay sang Biblia pirme napamatud-an nga praktikal kag mapuslanon sa tion nga ang mga tawo nagsalig sa sini sing tuman sa pag-aplikar sini. (Hulubaton 2:​1-9) Ang laygay sang Biblia maathag nga tuhay sa laygay sang “mga eksperto” nga masami nagabaylobaylo sa paglandas sa mga problema sang kabuhi. Tuhoy sa mga kolumnista nga nagatanyag sinang laygay sa madamong pungsudnon nga pamantalaan, ang The Sunday Times sang London nagapamangkot: “Ang linibo bala ka tawo kada tuig nagasugid sang ila pinakasulod nga mga panghunahuna kag balatyagon sa sining mga kolumnista nga sing matuod nagapataka lamang sa paghatag sing laygay?” Ang mga manunulat sang Biblia wala nagapataka sa paghatag sing laygay. Ginrekord nila ang masaligan, inspirado sang Dios nga laygay nga napamatud-an nga masaligan sa bug-os nga maragtas.​—⁠2 Timoteo 3:​16, 17.

“Ang laygay sang Biblia nag-amlig sa akon gikan sa direksion nga mahimo nagguba kuntani sang akon kabuhi,” siling ni El­len, nga nagapangidaron karon sing 30 anyos kag may malipayon nga pag-asawahay. “Ang akon nagdeborsio nga mga ginikanan, wala nagpakita sing pagtuo sa kahimusan sang pag-asawahay, kag sa pagkamatuod ginpalig-on nila ako nga magpuyo lamang upod sa isa sa baylo nga pamanahon sia. Kon ginhunahuna ko ang kalig-unan nga ginahatag sa akon kabuhi sang pagsunod sa mga prinsipio sang Biblia, nalipay ako nga nagsalig ako sa Biblia labaw sa laygay sang akon mga ginikanan.”​—⁠Tan-awa ang Efeso 5:​22-31; Hebreo 13:⁠4.

“Katorse anyos lamang ako sang nagsugod ako sa pagtuon sa kon ano ang ginasiling sang Biblia tuhoy sa mga butang,” siling ni Flor­ence. “Karon kon akon hinumdumon ang katuigan 1960 sadto kag ang kalisdanan nga gintuga sang akon mga katubotubo sa ila kaugalingon paagi sa pagsunod sa mga mga kabilihanan kag moral sadto, mapinasalamaton gid ako sa proteksion nga ginhatag sang laygay sang Biblia sa akon subong isa ka lamharon, dieksperiensiado nga babayi.”​—⁠Tan-awa ang 1 Corinto 6:​9-11.

“Sa akon bahin,” siling ni ­James, “nadalahig ako sa pagsugal, pagpanigarilyo, kag pag-inom.” Nagpadayon sia: “Nahibaluan ko ang kahalitan nga gintuga sini sa madamong tawo kag sa ila mga pamilya. Sang primero indi ko mahangpan ang kapuslanan sang Biblia sa akon mga problema. Apang nakita ko na karon sing maathag kon paano ini nag-impluwensia sang akon panghunahuna para sa kaayuhan kag nagbulig sa akon nga mahuptan ang mas mapagros nga estilo sang kabuhi.”​—⁠Tan-awa ang 2 Corinto 7:⁠1.

Si Mary Anne nagbuko sa paghikog bangod sang mga pag-ipit sang kabuhi kag mga kabudlayan sa emosyon nga nagikan sa isa ka magamo nga ginhalinan. “Ang paghikog daw amo lamang ang solusyon sadtong tion,” siling niya. “Apang ginpasibu sang Biblia ang akon panghunahuna. Bangod lamang sang akon nabasahan sa Biblia nga wala ako maghikog.”​—⁠Tan-awa ang Filipos 4:​4-8.

Ano ang nakabulig sa sining mga tawo? Napalambo nila ang bug-os nga pagsalig sa Dios kag sa Iya Pulong, ang Biblia. Ang Dios nangin kaangay sa isa ka masaligan mahal nga abyan nga nagahutik sing laygay sa ila mga dulunggan sa mga tion sang kabudlayan. (Ipaanggid ang Isaias 30:21.) Natun-an nila ang mga prinsipio sang Biblia nga nakabulig sa ila sa paglandas sang mga kapiutan kag mga problema sang kabuhi. Kag natun-an nila nga magsalig sa makadalayaw nga mga saad gikan sa Dios nga indi makabutig​—⁠subong sang saad sang isa ka matahom nga “bag-ong duta” nga hilway gikan sa tanan nga pagpangdaya, kabutigan, kag paghingalit kag hilway gikan sa kasubo, balatian, kag bisan pa sa kamatayon!​—⁠2 Pedro 3:13; Salmo 37:​11, 29; Bugna 21:​4, 5.

Mapalambo mo man ang amo nga pagsalig. Mahimo nga gub-on sang kalibutan karon ang imo pagsalig, apang makasalig ikaw nga ang imo pagsalig sa Dios kag sa iya Pulong indi gid magguba. Ang mga manugbalhag sining magasin malipay sa paghimo sing kahimusan para may isa ka tawo nga magbulig sa imo sa pagkilala sing mas maayo pa sa Dios kag sa iya Pulong, ang Biblia.

[Footnote]

[Laragway sa pahina 8]

Mga 200 ka tuig sing abanse, gintagna sang manalagna sang Dios kon paano pukanon ang Babilonia

[Laragway sa pahina 9]

Nasapwan ni Sir Isaac Newton nga masaligan ang Biblia