Gikan sa Amon mga Bumalasa

Krisis sa mga Eskwelahan Nagahulat ako sa paradahan sang bus sang may nagdaho sa akon sing isyu nga “Schools in Crisis.” (Disiembre 22, 1995) Napamatud-an ko nga mas mapuslanon ini sangsa bug-os nga libro nga nabasa ko sining karon lang tuhoy sa amo nga tema. Pasalamatan ko gid kon ang isa ka suskripsion sang Awake! (Magmata!) mapadala sa akon puluy-an.

V. C., Estados Unidos

Ang bahin tuhoy sa Teokratikong Eskwelahan sa Pagministro nagpahanumdom sa akon sang tion nga nagaeskwela ako. Mahatag ako sang oral nga report apang nabudlayan ako mag-Ingles sadto nga tion. Sang matapos ko ang akon presentasyon, ginsiling sang akon manunudlo nga nagdayaw gid sia kag nga ako lang ang may maayo nga postura kag pagpakig-angot sa tagpalamati. Nahimo ko ini bangod sang pinakamaayo nga paghanas nga nabaton ko sa Teokratikong Eskwelahan sa Pagministro sa Kingdom Hall.

G. A., Estados Unidos

Wala ko ginpaabot nga ining mga artikulo magatandog sing tudok sang akon balatyagon. Sang nagaeskwela ako, masako ang akon mga ginikanan sa ila kaugalingon nga mga problema nga wala na sila sing panahon sa pagbulig sa akon. Subong resulta, may mga tion nga nasubuan gid ako samtang yara sa eskwelahan. Bangod sang mga artikulo kaangay sini, narealisar ko nga ginahigugma ni Jehova ang mga pamatan-on kag indi niya luyag nga magbatyag sila nga nagaisahanon sa sining kalibutan.

M. M., Estados Unidos

Mali Ang artikulo nga “A First for Mali” (Disiembre 22, 1995) makadalayaw gid. Ginbasa ko ini sing tatlo ka beses. Handum ko gid nga ang akon mga kahimtangan magatugot sa akon nga mangin isa ka misyonero! Ang artikulo nagparealisar man sa akon nga madamo nga tawo ang wala sing kasulhayan nga yara sa amon apang sa gihapon malipayon sila. Daw ano gid ka nagakaigo nga pahanumdom!

D. L., Estados Unidos

Flying Rocks Sang nagligad nga pila ka adlaw, ginpaligban ko ang nahanungod sa kinatuhayan sa ulot sang shoot­ing star kag me­te­or­ite. Handurawa ang akon kakibot sang nabasa ko ang artikulo nga “Rocks That Fly” (Disiembre 8, 1995), nga nagpaathag sining punto mismo. Salamat gid sa pagbalhag ninyo sing mga artikulo nga nagapakilala sa aton sang mga tinuga ni Jehova.

R. P., Switzerland

Pagtuon Gikan Kay Andrew Bag-o ko lang nabasa ang artikulo tuhoy sa lamharon nga tawo nga may Down’s syndrome, “What We Learned From Andrew.” (Disiembre 8, 1995) May anak man kami nga may kasablagan sa hunahuna, kag ginapakita sang madamo nga mga komento gikan sa mga ginikanan ni Andrew ang ginabatyag man namon. ­Masami nga mabudlay para sa aton Cristianong kauturan nga mahangpan ang pinasahi nga mga kabudlayan nga ginadala sang may kasablagan sa hunahuna nga anak kag ang emosyonal nga kahuol nga yara sa pamilya. Gani salamat gid sa artikulo.

J. B., Inglaterra

Nagapati ako nga isa ini sang pinakamatahom kag labing makatalandog nga artikulo nga nabalhag ninyo. Sa tatlo lamang ka pahina, napresentar ang bug-os nga detalye kon paano naton dapat tamdon ang mga may kasablagan. Nagapaalinton ini sang daku nga leksion tuhoy sa tawhanon nga mga kaangtanan.

M. L., Espanya

Sang maaga nga bahin sining tuig nagbun-ag ang akon asawa sing isa ka bata nga lalaki nga may Down’s syndrome. Subong sa mga ginikanan ni Andrew, naeksperiensiahan namon ang ginabatyag sang madamo nga ginikanan sa paghibalo nga ang ila lapsag may kasablagan​—⁠kalisang kag kasubo subong man mga pamangkot tuhoy sa presente kag sa palaabuton. Sa amon bahin, natun-an namon nga batunon ang kasablagan sang amon lapsag. Sa indi madugay anom na sia ka bulan, kag maayo ang iya pagdaku. Isa ka adlaw sa tapos nga mabun-ag sia, literal nga nalipay gid ang akon asawa bangod sang madamo nga pagduaw sang aton Cristianong kauturan nga mga lalaki kag mga babayi. Nabatyagan gid namon kon daw ano ang may espirituwal nga pamilya. Kag luwas sa gugma sang aton kauturan nga mga lalaki kag mga babayi, yara si Jehova. Salamat gid sa sining artikulo.

G. C., Pransia