Paglandas sa Trahedya Paagi sa Kusog ni Jehova
SANG KORESPONSAL SANG MAGMATA! SA ESPANYA
SANG Pebrero sini nga tuig, madamo gikan sa Kongregasyon sang mga Saksi ni Jehova sa Bailén sa Espanya ang nasadyahan sa matahom nga isa ka adlaw nga pag-ulupod sa malapit nga Kabukiran sang Sierra Nevada. Apang mga 5 kilometros lang gikan sa puluy-an, isa ka nagasugata nga salakyan ang nagtabok sa linya nga ginadalaganan sang ila bus, nga nagtuga sing direkta gid nga pagbungguanay. May naglupok, kag ginlamon sang kalayo ang bus. Gilayon nga nakaguwa ang iban nga pasahero, apang madamo sa likod sang bus ang napuot sang aso kag napatay.
Sa kabilugan, 26 ka Saksi ang napatay, lakip ang apat ka bug-os tion nga ministro kag pila ka kabataan—halos un-kuarto sang Kongregasyon sang Bailén. Ginpabutyag sang hari sang Espanya, si Juan Carlos, ang kasubo sang kalabanan nga mga Espanyol sang magsulat sia sa iya telegrama sa meyor sang Bailén: “Nakibot sing daku sa makakulugmat nga aksidente. Batuna ang amon hanuot nga pagkahanuklog. Ipaalinton palihug sa mga pamilya sang mga biktima ang amon hanuot nga simpatiya kag pagsakdag sa sining masakit nga tion.”
Ang pamangkot sang iban sang linibo nga nagkumpanyar amo, Ngaa nagakatabo ini nga sahi sang mga trahedya? Sing maathag, ang mga aksidente nga tuga sang “tion kag wala ginapaabot nga hitabo” nagaapektar sa katawhan ni Jehova subong sa kay bisan sin-o. (Manugwali 9:11, 12) Apang, nagasaad si Jehova nga sa indi madugay ang kasubong nga mga trahedya pagadulaon.—Bugna 21:4, 5.
Madamong katapo sang pamilya sang sanga sang mga Saksi ni Jehova sa Espanya kag linibo gikan sa iban nga duog sang pungsod ang nagkadto sa Bailén sa paglipay kag pagsakdag sa lokal nga mga kautoran. Ang mga tawo sa Bailén, upod sa lokal kag rehiyonal nga mga awtoridad, nakigbuylog man sa kalisod sang mga pamilya sang mga Saksi. Madamo sing nagapanilag ang nakadayaw sa kalig-on sang namatyan nga mga Saksi.
“Madugay ko na nga kilala ang mga Saksi,” siling ni Antonio Gómez, ang meyor sang Bailén, “kag bisan sing personal isa ako ka agnostiko, nagadayaw ako sa inyo pagtuo. Sang matabo ang aksidente, ginhunahuna ko sa gilayon nga ang inyo relihioso kag tawhanon nga paghiusa makabulig sa inyo nga malandas sing maayo ang trahedya sangsa iban nga grupo. Nakita ko kon paano ginsakdag sang bug-os nga banwa ang nalisdan nga mga pamilya. Mahimo nga ang mga tawo may sayop anay nga paghangop tuhoy sa inyo ginatindugan, apang nalipay ako sa pagsiling nga nadula ini. May nasulod kamo nga kusog nga mabudlay mahangpan sang isa nga indi Saksi.”
Si José Borrell, ang ministro sang publiko nga mga hilikuton nga nagkumpanyar sa lubong subong tiglawas sang gobierno sang Espanya, nagpanugiron: “Ano ang masiling mo sa mga nadulaan sang halos tanan sang ila pamilya sa isa ka tion lamang? Wala sing maayo pa sangsa nasapwan nila sa ila pagtuo. . . . Makadalayaw ang inyo pagtuo.”
“Padayon nga Lipayon ang Isa kag Isa”
Ano ang ila “nasapwan sa ila pagtuo”? Labaw sa tanan, nakasapo sila sing lugpay gikan kay Jehova, “ang Dios sang tanan nga paglipay, nga nagalipay sa aton sa tanan naton nga kabudlayan.” (2 Corinto 1:3, 4) Walay sapayan sang ila kalisod, nakasapo sila sing kusog sa paglugpay sa isa kag isa, ginadumdom ang mga pinamulong ni Pablo sa mga taga-Tesalonica: “Padayon nga lipayon ang isa kag isa kag magpalig-unay sa isa kag isa.”—1 Tesalonica 5:11.
Makatalandog makita ang Cristianong mga kautoran nga lalaki kag babayi, ang iban sa ila nadulaan sing tubtob sa walo ka paryente, nga nagaduaw sa iban nga namatyan nga mga katapo sang kongregasyon. “Naghibi kami sang pagkit-anay namon. Apang paagi sa mga luha ginpahanumdom namon ang amon kaugalingon sang paglaum nga pagkabanhaw, kag nalugpayan kami,” paathag ni Francisco Saez, ang nagadumala nga manugtatap, nga namatyan mismo sang iya duha lamang ka kabataan.
“Wala namon ginpabay-an ang amon hilikuton sa pagbantala, kag naghimo kami sing pinasahi nga panikasog sa pagduaw sa mga paryente sang mga napatay nga indi mga Saksi, nga ginagamit ang brosyur nga Kon ang Isa nga Ginahigugma Mo Mapatay.” Si Francisco nagpadayon: “Sing personal, luyag ko magbantala, kay nahibaluan ko nga paagi sa pagbantala sa iban magaayo ang akon pamatyag. Kag matuod gid, walay sapayan nga nagguwa ako nga nagahibi, nagpauli ako nga nalugpayan.”
Ang mga tawo sa Bailén naghulag sing positibo sa sining pagpanaksi nga hilikuton. Isa ka semana pagkatapos sang aksidente, si Encarna, nga nagapangasubo sa pagkadula sang duha ka kabataan nga babayi kag apat ka apo, nagduaw sa isa ka babayi nga bag-o lang niya nasugdan sing isa ka pagtuon sa Biblia. Ginhatagan ni Encarna sing Makasulatanhon nga lugpay ining babayi, nga namatyan sang bana sang nagligad nga apat ka bulan. “Karon dapat kita magpalig-unay nga duha,” siling niya, samtang padayon nila nga ginabinagbinag ang brosyur nga Kon ang Isa nga Ginahigugma Mo Mapatay.
Ang pagsakdag gikan sa bug-os kalibutan nga paghiliutod gilayon man nga nag-abot. “Ang bug-os nga kongregasyon napalig-on gid sang linibo ka sulat kag mga telegrama nga amon nabaton,” paathag ni Francisco Capilla, ang sekretaryo sang kongregasyon. “Nagpadala sing van ang opisina sang koreo agod direkta nga idul-ong ining tanan sa amon balay sa adlaw-adlaw. Nagapasalamat gid kami sa mahigugmaon nga pag-ulikid sang amon mga kautoran.”
Paglaum sa Likod sang Trahedya
May makuha bala nga kaayuhan gikan sa amo nga sahi sang trahedya? “Ang tagipusuon sang isa nga maalamon yara sa balay sang kalisod,” sulat sang dumaan nga si Hari Solomon. (Manugwali 7:4) Nahisuno sa sining prinsipio, ang trahedya sa Bailén nagpahunahuna sing hanuot sa iban nga tawo tuhoy sa ila kaangtanan sa Dios. Si Faustino, nga isa ka ditumuluo nga bana nga napatyan sing duha sang iya anom ka kabataan sa aksidente, nagsiling sa iya asawa nga si Dolores: “May maayo ako nga balita nga isugid sa imo. Masugod na ako sa pagtuon sa Biblia, kay luyag ko makita ang akon kabataan sa bag-ong kalibutan.”
Bisan nga indi gilayon malandas sang aton mga kautoran nga lalaki kag babayi sa Bailén ang ila kalisod, ginalugpayan nila ang iban kag nagakalugpayan. Ginapalig-on sila ni Jehova paagi sa iya espiritu kag sa pagsakdag sang madamong mahigugmaon nga mga kautoran nga lalaki kag babayi. Padayon kami nga nagapangamuyo sa amon langitnon nga Amay para sa ila.
[Laragway sa pahina 26]
Apat sa sadtong mga napatay