Ang Pagtamod sang Biblia
Ang Nagahigot nga Gugma
SANG 1978 ginwaswasan sang isa ka mabaskog nga bagyo sa Aminhan nga Atlantiko ang isa ka luhuso nga barko nga Queen Elizabeth 2. Ginhampashampas ang barko sang mga balod nga subong kataas sa napulo ka panalgan nga tinukod, amo kon ngaa daw duol ini nga nagsalupsalop. Nagtinumpilak ang mga kasangkapan kag mga pasahero samtang mabaskog nga naglinggilinggi ang barko. Talalupangdon nga diutay lamang ang mga samad sang 1,200 ka pasahero. Bangod sang maayong inhenyeriya, materyales, kag pagkatukod, wala mawasak ang barko.
Sang nagligad nga mga siglo isa pa ka barko ang inabtan sang isa ka mabaskog nga bagyo. Sakay sa sini si apostol Pablo kag ang 275 nga iban pa. Sa kahadlok nga basi mawasak ang barko bangod sang mabaskog nga bagyo, mahimo gid nga ang mga marinero nagbutang sing “mga suporta”—mga kadena ukon kalat—sa idalom sang barko gikan sa isa ka kilid padulong sa pihak agod indi mawasak ang mga tapi nga kasko sining de-pasahero nga barko. Naluwas ang tanan nga pasahero, apang naguba ang barko.—Binuhatan, kapitulo 27.
Ang mga pagtilaw sa kabuhi nagapabatyag sa aton kon kaisa nga subong bala sakay kita sa isa ka barko sa mabalod nga kadagatan. Ang mga balod sang kabalaka, kapaslawan, kag kapung-aw mahimo nga magabasya sa aton, ginatilawan kon tubtob diin ang aton gugma. Agod masulay ini nga mga bagyo kag indi mawasak, nagakinahanglan man kita sing pila ka bulig.
Kon Mag-abot ang mga Bagyo
Ang pagtuo kag pagbatas ni apostol Pablo tul-id nga narekord sa Biblia. Nagpaulipon sia para sa unang Cristianong mga kongregasyon. (2 Corinto 11:24-28) Ang iya mga nahimuan sa hilikuton sang Ginuo maathag nga pamatuod sang iya daku nga gugma sa iya mga isigkatawo kag sang iya malig-on nga kaangtanan sa Dios. Apang, ang kabuhi ni Pablo indi nangin masulhay sa tanan nga tion. Sa literal kag sing malaragwayon, madamo nga bagyo ang ginsulay sang apostol.
Sang adlaw ni Pablo, kon ang barko makasugata sing mabaskog nga bagyo, ang kaluwasan sang mga pasahero kag sang barko nasandig sa kalantip sang mga tripulante kag subong man sa kabakuron sang barko. Subong man sini sang ang apostol makasumalang sing malaragwayon nga mga bagyo. Bisan pa ginsulay ni Pablo ang pisikal nga kinawad-on, pagkabilanggo, kag pagpaantos, ang pinakamabaskog nga mga bagyo nga naghangkat sang iya espirituwal kag emosyonal nga kalig-on kag sang iya ikasarang nga magpadayon sa paghigugma naghalin sa sulod sang Cristianong kongregasyon.
Halimbawa, walay kalapyo nga nagpangabudlay si Pablo sing isa ka tuig kag tunga agod matukod ang kongregasyon sa siudad sang Corinto. Bangod sang iya mga naeksperiensiahan sa mga taga-Corinto ginpalangga niya ang panong. Ginpatuhuyan pa gani ni Pablo ang iya kaugalingon subong amay nila. (1 Corinto 4:15) Apang, walay sapayan sang iya narekord nga gugma kag lakas nga pagpangabudlay para sa kongregasyon, ginpakalain pa si Pablo sang iban sa Corinto. (2 Corinto 10:10) Bangod sang tanan nga nahimo niya subong pagsakrispiyo sang kaugalingon, pat-od nga makapasubo gid yadto!
Paano nahimo sang mga nakabaton sing maalwan nga gugma ni Pablo nga mangin tuman kapintas kag pakanubuon sia? Pat-od nga ginbatyag ni Pablo nga daw ginawasak sia, subong sang isa ka barko nga ginawaswas sang bagyo. Madali lang kuntani nga mangampo sia, magbatyag nga walay pulos tanan ang iya mga panikasog sang una, ukon maghinakit! Ano ang nagpalig-on kay Pablo? Ano ang nagpugong sa iya nga indi mawasak sang kapaslawan?
Ang Gugma nga Nagahigot sa Aton
Wala magbilin si Pablo sing duhaduha sa hunahuna sang iya mga bumalasa tuhoy sa kon ano ang ginahalinan sang iya kusog kag motibo. Sia nagsulat: “Ang gugma ni Cristo nagatiklod sa amon.” (2 Corinto 5:14) Gintudlo ni Pablo ang talalupangdon nga ginahalinan sang iya kusog kag motibo. Ang nagatiklod nga kusog amo “ang gugma ni Cristo.” Ang isa ka iskolar sa Biblia naghimo sang masunod nga komento tuhoy sa sining kasulatan: “Wala nagasiling si Pablo nga ang aton gugma kay Cristo nagaamlig sa aton para sa aton ministeryo . . . Kulang ini. Ang aton gugma kay Cristo ginapadabdab kag padayon nga ginapabaskog sang iya gugma para sa aton.”—Italiko amon.
Ang gugma nga ginpakita ni Cristo paagi sa pagpaidalom sang iya kaugalingon sa isa ka masakit nga kamatayon sa usok sang pag-antos—paagi sa amo ginhatag ang iya himpit nga tawhanon nga kabuhi subong gawad agod luwason ang tanan nga tumuluo nga katawhan—amo ang nagpahulag, nagtiklod, kag nagpilit kay Pablo nga magpadayon sa pag-alagad para sa kaayuhan ni Cristo kag sang paghiliutod. Sa amo, ang gugma ni Cristo nagkontrol kay Pablo, nagpugong sa iya nga indi magpakita sing kakagod, kag ipatuhoy lamang ang iya tulumuron sa pag-alagad sa Dios kag sa mga isigkatawo.
Sa pagkamatuod, ang ginahalinan sang motibo sa likod sang matutom nga dalanon sa kabuhi sang isa ka Cristiano amo ang gugma ni Cristo. Kon ginaatubang kita sing mga pagtilaw nga mahimo makapaluya sa aton sa pisikal, emosyonal, kag espirituwal, ang nagatiklod nga kusog sang gugma ni Cristo magabulig sa aton nga magpadayon labang pa sa punto diin ang isa nga kulang sing motibo magauntat. Nagahatag ini sa aton sing kusog nga magbatas.
Indi naton masaligan ang aton dihimpit nga emosyon nga magpabaskog kag magpahulag sa aton. Amo gid sini kon ang aton mga pagtilaw nagaabot subong resulta sang kapaslawan ukon kabalaka. Sa pihak nga bahin, ang gugma ni Cristo may gahom sa pag-amlig sa aton para sa aton ministeryo, sa pagpabaskog kag sa pagpahulag sa aton, walay sapayan sang pagtilaw sa aton kaugalingon. Ang gugma ni Cristo nagabulig sa isa ka Cristiano nga magbatas indi lamang labaw sa ginapaabot sang iban kundi ayhan labaw pa gani sa iya mismo ginapaabot.
Dugang pa, sanglit ang gugma ni Cristo walay katapusan, ang epekto sini walay katapusan man. Isa ini ka nagatiklod nga kusog nga wala nagaluya ukon nagaugdaw. “Ang gugma wala gid nagakapaslawi.” (1 Corinto 13:8) Nagabulig ini sa aton nga magpadayon sa pagsunod sa iya sing matutom, bisan ano man ang matabo.
Ang mga pagtilaw sa emosyon nagapaguwa sing kusog nga sarang makawasak sa aton. Busa, daw ano ka importante nga pamalandungon naton ang gugma nga ginpakita ni Cristo para sa aton. Ang gugma ni Cristo magahugpong sa aton. Ang iya gugma magabulig sa aton nga likawan ang pagkaguba sang aton pagtuo. (1 Timoteo 1:14-19) Dugang pa, ang gugma ni Cristo nagatiklod sa aton nga himuon ang tanan nga masarangan naton sa paghimaya sa isa nga nagpahanabo sang gugma ni Cristo, si Jehova nga Dios.—Roma 5:6-8.