Pamangkot sang mga Pamatan-on . . .

Ngaa Ginatugutan sang Dios nga Matabo ang Malain nga mga Butang?

TIN-EDYER pa lamang si Lidi­ja sang magdabdab ang inaway sa ila pungsod​—⁠ang pungsod nga kilala anay subong Yu­go­sla­via. “Nagpanago ako sing madamong inadlaw kag gab-i sa madulom nga duog,” hinumdom niya. “Pirme ako ginasulay nga magdalagan paguwa, walay sapayan nga mahimo ako mapatay! Antes sang inaway, matigayon mo ang tanan nga luyag mo, apang karon malipay ka na kay buhi ka pa.”

Ang mga kahuol kag mga kabudlayan sang inaway nakaapektar sing daku sa espirituwal kay Lidi­ja. Sia nagasiling: “Pila ka semana nga wala kami makabantala kag makatambong sa mga miting. Abi ko anay ginpabayaan na kami ni Jehova. Ginpamangkot ko ang akon kaugalingon, ‘Ngaa wala niya kami ginabuligan karon?’ ”

Ang mga inaway, kasingki, balatian, kalamidad, mga aksidente​—⁠ang malain nga mga butang kaangay sini mahimo matabo bisan sa mga pamatan-on. Kag kon ang isa ka tawo personal nga maapektuhan sang trahedya, sing kinaugali mahimo ikaw mamangkot, ‘Ngaa ginatugutan sang Dios nga mahanabo ining malain nga mga butang?’

Ang mga tawo sang Dios sang dumaan nga mga tion namangkot man kaangay sina. Halimbawa, sang nakita ni manalagna Habacuc ang makaluluoy nga kahimtangan sang katawhan sang Dios, nagpanalambiton sia: “Tubtob san-o, O Jehova, magapangayo ako sing bulig, kag indi ikaw magpamati? Tubtob san-o ako magapangayo sa imo sing bulig gikan sa kasingki, kag indi ikaw magaluwas? Ngaa ginatugutan mo ako sa pagtulok sa makahalalit, kag padayon mo nga ginatulok ang kagamo?” (Habacuc 1:​2, 3) Ang pila ka Cristianong pamatan-on karon nagaeksperiensia sing kaanggid emosyonal nga kahuol.

Binagbinaga ang nabatyagan sang isa ka dalagita nga Cristiano sa hinali nga pagkapatay sang iya amay. Sia nagsiling: “Nagwaras ako, nagtiyabaw sa bintana, nagsinggitan kay Jehova nga Dios. . . . Ginbasol ko sia sa tanan. Paano nga natabo ini? Si Tatay isa gid ka maayo nga amay kag mahigugmaon nga bana, kag karon patay na sia​—⁠wala bala nagaulikid si Jehova?” Sa kahimtangan kaangay sini, kinaandan lamang ang magbatyag sing pagkagumon, masakitan, ukon maakig pa gani. Dumduma, ang matutom nga manalagna nga si Habacuc ginligban man bangod sang pagluntad sang kalautan. Apang, kon padayon nga huptan sang isa ka tawo ang iya kaakig, makatalagam ini. Mahimo nga ‘maakig sia mismo kay Jehova.’​—⁠Hulubaton 19:⁠3.

Kon amo, paano mo malikawan nga madala ikaw sang kaakig kag kalain sang buot? Una, dapat mo mahangpan kon diin nagahalin ang kalautan.

Ang Malain nga mga Butang Wala Nagahalin sa Dios

Ginaathag sang Biblia nga wala gintuyo sang Dios nga mag-antos kita sa sining paagi. Ginbutang niya ang unang mag-asawa sa isa ka paraiso nga puluy-an nga wala sing kasakit kag pag-antos. (Genesis 1:28) Pat-od nga nahibaluan ninyo sing maayo kon paano naglain ang mga butang: Ginsulay sang isa ka dimakita nga espiritu nga tinuga, nga sang ulihi nangin Yawa kag Satanas, sanday Adan kag Eva sa paglapas sa Dios. (Genesis, kapitulo 3; Bugna 12:9) Paagi sa paghimo sini, gintagudilian ni Adan ang tanan niya nga kaanakan sa sala kag sa makahalapay nga mga epekto sini.​—⁠Roma 5:⁠12.

Sing maathag, indi ang Dios ang nagdala sing kalautan sa katawhan, kundi ang tawo mismo. (Deuteronomio 32:​5; Manugwali 7:29) Sa pagkamatuod, ang tanan malain nga butang nga ginaantos sang mga tawo sa karon​—⁠ang balatian, ang kamatayon, ang mga inaway, ang mga inhustisya​—⁠resulta sang hungod nga paglapas ni Adan. Dugang pa, kita tanan napaidalom sa ginatawag sang Biblia “tion kag wala ginapaabot nga mga hitabo.” (Manugwali 9:11) Ang malauton kag matarong pareho nga nagaeksperiensia sing wala ginapaabot nga mga aksidente kag mga trahedya.

Ang Pagpahanugot sang Dios sa Kalautan

Walay sapayan nga makalulugpay mahibaluan nga indi ang Dios ang ginahalinan sang kalautan, mahimo magapalibog gihapon ikaw, ‘Ngaa ginatugutan niya nga magpadayon ang kalautan?’ Sa liwat, nagabalik ini sa mga hulusayon nga nag-utwas sa Eden. Ginsilingan sang Dios si Adan nga kon maglapas sia, mapatay sia. (Genesis 2:17) Apang, ginsilingan sang Yawa si Eva nga kon kaunon niya ang ginadumilian nga bungang kahoy, indi sia mapatay! (Genesis 3:​1-5) Subong resulta, gintawag ni Satanas ang Dios nga isa ka butigon. Dugang pa, ginpahangop ni Satanas nga makabenepisyo ang tawo kon maghimo sia sang iya kaugalingon nga mga desisyon kag indi pagsundon ang ginasiling sang Dios nga himuon niya!

Indi mapasapayanan sang Dios ining mga pagbutangbutang. May nakita ka na bala nga isa nimo ka kabutho nga naghangkat sa awtoridad sang isa ka manunudlo? Kon indi sia pagsapakon sang manunudlo, ilugon sia sang iban nga mga estudyante. Sa kaanggid nga paagi, nagkinagamo kuntani sa langit kon wala ginsapak sang Dios ang hangkat ni Satanas. Ginhimo ina ni Jehova paagi sa pagtugot sa tawo nga sundon ang dalanon ni Satanas. Natigayon bala sang tawo ang kaangay Dios nga kahilwayan nga ginsaad ni Satanas? Wala. Ang paggahom ni Satanas nagdala sing kagamo kag kalisod, nagapamatuod nga isa sia ka malaut nga butigon!

Tugutan bala sang Dios nga magpadayon ang kalautan sa walay katubtuban? Indi. Agod husayon ang mga hulusayon nga ginpaluntad ni Satanas, sa indi madugay dulaon sang Dios ang tanan nga kalautan. (Salmo 37:10) Apang samtang wala pa paano naton ini malandas?

Isa ka Hulusayon nga Nagadalahig sa Imo

Una sa tanan, hibalua, nga ining hulusayon sa ulot sang Dios kag ni Satanas nagadalahig sa imo! Paano? Binagbinaga ang tulun-an sa Biblia nga ginsunod sa ngalan sang matarong nga tawo nga si Job. Sang gintudlo sang Dios si Job subong halimbawa sang isa ka matutom nga sumilimba, nagsabat si Satanas: “Magasimba bala si Job sa imo kon wala sia sing makuha sa sini?” (Job 1:​9, Today’s English Version) Huo, nangatarungan si Satanas nga kon tugutan sia sa paggamit sing pag-ipit, sarang niya mapatalikod ang bisan sin-o nga tawo gikan sa pag-alagad sa Dios!​—⁠Job 2:​4, 5.

Sa amo ginpasipalahan ni Satanas ang tanan mahinadlukon sa Dios nga mga tawo. Ginpasipalahan ka niya. Apang, ang Hulubaton 27:​11 nagasiling: “Magmaalam ka, anak ko, kag pasadyaha ang akon tagipusuon, agod nga masabat ko sia nga nagapakahuya sa akon.” Huo, kon alagaron mo ang Dios walay sapayan sang masakit nga mga kabudlayan, sa pagkamatuod nagabulig ikaw sa pagpamatuod nga si Satanas isa ka butigon!

Sa pagkamatuod, kon nagaatubang sing malain nga mga butang, indi mahapos dumdumon ang mga hulusayon nga nadalahig. Si ­Diane, nga napulo ka tuig lamang sang mapatay ang iya iloy, nagasiling: “Nahadlok ako basi mangin dimasinapakon ako ukon mangin suplada bangod sang mga pagtilaw sa akon kabuhi.” Apang, ang pagkahibalo kon ngaa gintugutan sang Dios ang kalautan nakabulig sa iya nga matigayon ang nagakaigo nga pagtamod sa iya mga problema. Sa karon nagasiling sia: “Walay sapayan sang mga butang nga mabudlay pakigbagayan sa akon kabuhi, ang kamot ni Jehova pirme nagaalay-ay sa akon.”

Ginapahanumdom sa aton ni Diane ang isa ka importante gid nga katunayan: Wala ginapaabot ni Jehova nga malandas naton ining mga pag-ipit sing kinaugalingon. Ang Salmo 55:​22 nagapasalig sa aton: “Itungtong ang imo lulan kay Jehova, kag sia magaalay-ay sa imo. Indi gid sia magtugot nga malingkang ang matarong.” Napamatud-an ini sang dalagita nga si Ko­to­yo. Naeksperiensiahan niya ang trahedya sang mapatay ang iya mga ginikanan sa linog nga nag-igo sa Kobe, Japan, sang 1995. Nagahambal tuhoy sa iya kaugalingon kag sa iya magagmay nga mga manghod, sia nagasiling: “Bangod gintudluan kami sang amon iloy sa pagsalig kay Jehova, mabatas namon ini.”

Kamusta si Lidi­ja, ang dalagita nga ginsambit sa panugod? Sang ulihi, narealisar niya nga wala sia ginbiyaan ni Jehova. Nagasiling sia karon: “Pirme kami ginabuligan ni Jehova. Ginatuytuyan niya kami kag ginagabayan ang amon mga tikang.”

Si Jehova​—⁠Isa ka Mahigugmaon nga Dios nga Nagaulikid

Maeksperiensiahan mo man “ang bulig sang Dios” kon may malain nga mga butang nga matabo sa imo. Ngaa? Bangod nagaulikid sa imo si Jehova! Kag bisan ginatugutan niya ang malain nga mga butang nga mahanabo sa maayo nga mga tawo, nagahatag man sia sing mahigugmaon nga lugpay. (2 Corinto 1:​3, 4) Ang isa ka paagi nga ginahimo niya ini amo ang Cristianong kongregasyon. Diri mo masapwan ‘ang mga abyan nga suod pa sangsa isa ka utod,’ nga makapalig-on sa imo sa tion sang kabudlayan. (Hulubaton 18:24) Si Ko­to­yo nagahinumdom: “Halin gid sang una nga adlaw pagkatapos sang linog, nagkadto kami sa duog nga ginatipunan sang mga kauturan, kag nakabaton kami sing pagpalig-on kag sing kinahanglanon nga mga butang. Nagpalig-on ini sa akon. Tubtob nga kaupod namon si Jehova kag ang mga kauturan, nagapati ako nga mabatas namon ang tanan.”

Bangod kilala ikaw ni Jehova subong indibiduwal, maatipan man niya ang inyo mga kinahanglanon kon may malain nga butang nga matabo. Ginasugid ni Daniel kon paano niya nalandas ang pagkapatay sang iya amay, nga nagasiling: “Si Jehova mangin isa ka amay sa imo, kag ang iya organisasyon nagaaman sing espirituwal nga mga lalaki subong mga huwaran. Si Jehova pirme nagaaman sing mga sabat sa mga pamangkot nga kinaandan nga ginapakighambal ko sa akon amay.” Naeksperiensiahan man ni Diane ang mahigugmaon nga pag-atipan ni Jehova kutob sang mapatay ang iya iloy. Sia nagasiling: “Paagi sa mas tigulang, hamtong sa espirituwal nga mga tawo nga naghatag sing pagpalig-on, panuytoy, kag laygay, gintuytuyan niya ako kag ginbuligan ako nga malandas ang pagluya sang buot.”

Sa pagkamatuod, indi gid maayo ang makaeks­periensia sing malain nga mga butang. Apang makalulugpay mahibaluan kon ngaa ginatugutan sang Dios inang mga butang. Pahanumdumi sing padayon ang imo kaugalingon nga sa indi madugay pagalubaron sang Dios ang problema. Ti, ang tanan malain nga butang nga aton naeksperiensiahan madula sa ulihi! (Isaias 65:​17; 1 Juan 3:8) Paagi sa paghimulos sa tanan nga aman nga ginahatag sang Dios agod buligan kita nga makalandas, sarang mo mahimo ang imo bahin sa pagpamatuod nga si Satanas isa ka butigon. Sa ulihi, ‘pahiran sang Dios ang tagsa ka luha sa imo mga mata.’​—⁠Bugna 21:​3, 4.

[Laragway sa pahina 19]

Sa indi madugay dulaon ni Jehova ang tanan malain nga mga butang