Pamangkot sang mga Pamatan-on . . .

Dapat Ko Bala Itu-ad ang Akon Sala?

“Nahuya gid ako, indi ko mahibaluan kon ano ang akon himuon. Luyag ko magpalapit sa akon mga ginikanan, apang nahuya gid ako.”​—⁠Lisa.⁠a

AMO sina ang sulat sang isa ka naligban nga dalagita. Nakignobyo sia sa isa ka ditumuluo sa sulod sang pila ka tuig kag sang isa ka adlaw, sa idalom sang impluwensia sang alkohol, nakahimo sia sing seksuwal nga imoralidad upod sa lalaki.

Sing makapasubo, ina nga mga butang nagakatabo kon kaisa, bisan sa tunga sang Cristianong mga pamatan-on. Kon mas lamharon kita kag kulang sang eksperiensia, mahimo gid nga makahimo kita sing mas madamo nga sala. Apang samtang ang paghimo sing diutay nga sala isa ka butang, tuhay naman nga butang ang makahimo sing serioso nga sala, subong sang seksuwal nga imoralidad. (1 Corinto 6:​9, 10) Kon matabo ina, ang isa ka pamatan-on dapat magpangayo sing bulig. Ang problema amo nga indi mahapos para sa isa ang magtu-ad sang iya mga sala.

Ang isa ka Cristiano nga dalagita nakahimo sing pakighilawas. Namat-od sia nga itu-ad ini sa mga gulang sa ila kongregasyon, kag nagtalana pa gani sang petsa nga himuon ini. Apang ginpaisol niya ang petsa. Sang ulihi, ginpaisol niya ini liwat. Wala madugay, isa ka tuig na ang nagligad!

“Wala sing Butang nga Matago”

Kon nakahimo ikaw sing daku nga sala, dapat mo mahibaluan nga ang paghipos indi maalamon nga tikang. Una, ang kamatuoran masami nga nagaguwa sa ulihi. Subong isa ka bata, nabuka ni Mark ang isa ka porselana nga dekorasyon sa dingding. “Mahalungon ko nga ginkulahan ini,” hinumdom niya, “apang wala madugay kag nakit-an sang akon mga ginikanan ang mga litik.” Matuod, indi ka na bata. Apang ang kalabanan nga mga ginikanan masami makamutik kon may problema ang ila kabataan.

“Nagbinutig ako agod itago ang akon mga problema,” pagbaton sang 15-anyos nga si Ann, “apang labi nga naglain ang mga butang.” Sa masami, ang binutig nagakatukiban. Kag kon matukiban sang imo mga ginikanan nga nagbinutig ka, pat-od nga maakig sila​—⁠mas akig sangsa kon nagpanugid ka dayon sa ila.

Labi ka importante, ang Biblia nagasiling: “Wala sing bisan anong natago nga indi mabuyagyag, ukon bisan anong tinago nga indi mahibaluan kag matukiban.” (Lucas 8:17) Nahibaluan ni Jehova kon ano ang aton ginhimo kag kon ano ang aton ginahimo. Indi ikaw makapanago sa iya subong sang natabo kay Adan. (Genesis 3:​8-11) Sa ulihi, ang imo mga kasal-anan mabuyagyag man sa iban.​—⁠1 Timoteo 5:⁠24.

Ang paghipos makahalit man sa imo sa iban nga mga paagi. Ang salmista nga si David nagsulat: “Sang naghipos ako, nahagas ang akon mga tul-an tungod sang akon pag-ugayong sa bug-os nga adlaw. Kay sa adlaw kag gab-i mabug-at sa akon ang imo mga kamot.” (Salmo 32:​3, 4) Huo, ang kabudlay sang pagtago sing sala makapabug-at sa emosyon. Ang kabalaka kag sukmat sang konsiensia, subong man ang kahadlok nga mabuyagyag, magapaluya gid sing daku sa imo. Mahimo magasugod ka sa paglikaw sa imo mga abyan kag pamilya. Mahimo mo pa gani mabatyagan nga napahilayo na ikaw sa Dios! “Ginakonsiensia ako bangod ginpasubo ko si Jehova,” sulat sang solterito nga si Andrew. “Padayon ako nga indi mapahamtang.”

Pagpanugid

May paagi bala nga maumpawan ining mabug-at nga emosyon? Huo! Ang salmista nagsiling: “Gintu-ad ko sang ulihi ang akon sala sa imo, kag wala ko gintago ang akon kalapasan. . . . Kag patawaron mo ako sang akon mga kasal-anan.” (Salmo 32:​5; ipaanggid ang 1 Juan 1:⁠9.) Sing kaanggid naumpawan si Andrew bangod gintu-ad niya ang iya sala. Sia nagahinumdom: “Nagpalapit ako kay Jehova kag hanuot nga nangamuyo para sa iya kapatawaran.”

Mahimo mo man ini. Magpangamuyo kay Jehova. Nahibaluan niya ang imo ginhimo, apang mapainubuson nga batuna ini sa iya sa pangamuyo. Mangayo sing kapatawaran, wala nagapangalag-ag bangod nagabatyag ka nga tuman ka malaut agod buligan. Napatay si Jesus agod makatigayon kita sing maayo nga tindog upod sa Dios walay sapayan sang aton pagkadihimpit. (1 Juan 2:​1, 2) Mahimo man ikaw makapangayo sing kusog agod makahimo sing kinahanglanon nga mga pagbag-o. Ang pagbasa sing Salmo 51 mahimo gid makabulig sa imo agod himuon ini nga pagpangamuyo sa Dios.

Pagpanugid sa Imo mga Ginikanan

Apang, kapin pa ang ginakinahanglan, sangsa pagtu-ad lamang sa Dios. Obligasyon mo man nga sugiran ang imo mga ginikanan. Ginsugo sila sang Dios nga padakuon ikaw “sa disiplina kag panghunahuna ni Jehova.” (Efeso 6:4) Mahimo lamang nila ini kon mahibaluan nila ang imo mga problema. Sa liwat, ang pagpanugid sa imo mga ginikanan mahimo nga indi mahapos ukon makalilipay. Apang pagkatapos sang ila una nga reaksion, pat-od nga kontrolon nila ang ila mga balatyagon. Mahimo nga mahamuot pa gani sila nga nagsalig ikaw sa ila sing lubos amo nga ginsugid mo sa ila ang imo problema. Ang parabola ni Jesus tuhoy sa buhaha nga anak nagasugid tuhoy sa isa ka pamatan-on nga lalaki nga nakahimo sing seksuwal nga imoralidad. Apang sang nagtu-ad sia sang ulihi, ginbaton sia sang iya amay! (Lucas 15:​11-24) Walay duhaduha nga pagabuligan man ikaw sang imo mga ginikanan. Ti, palangga nila gihapon ikaw.

Matuod, mahimo mahadlok ikaw nga masaklaw mo ang imo mga ginikanan. Apang indi ang pagtu-ad sing sala ang nagasaklaw sa imo mga ginikanan; kundi ang paghimo sing sala! Ang pagtu-ad amo ang una nga tikang agod maumpawan ina nga pagkasaklaw. Si Ann, nga ginsambit kaina, nagpanugid sa iya mga ginikanan kag nakatigayon sang ulihi sing daku nga kaumpawan.⁠b

Ang isa pa ka upang sa pagtu-ad amo ang kahuya. Ang matutom nga manunulat nga si Esdras indi ang mismo nga nakahimo sing sala, apang sang ginsugid niya ang kasal-anan sang iya mga masigka-Judiyo, sia nagsiling: “Nagapalamula ako kag nahuya sa pagbayaw sang akon nawong sa imo, O akon Dios.” (Esdras 9:6) Sa pagkamatuod, nagakaigo lamang ang mahuya kon nakahimo ikaw sing sala. Ginapakita sini nga nagapanghikot pa ang imo konsiensia. Kag sa ulihi inang pagbatyag sing kahuya magaugdaw. Amo sini ang ginsiling ni Andrew: “Mabudlay gid kag makahuluya ang magtu-ad sing sala. Apang ang pagkahibalo nga si Jehova magapatawad sa akon sa daku nga paagi makapaumpaw.”

Pagpalapit sa mga Gulang

Kon isa ikaw ka Cristiano, indi ang pagpanugid mo sa imo mga ginikanan ang katapusan nga butang. Si Andrew nagasiling: “Nahibaluan ko nga dapat ko isugid ang akon problema sa mga gulang sang kongregasyon. Daw ano ka makapaumpaw mahibaluan nga handa sila sa pagbulig sa akon!” Huo, ang mga pamatan-on sa tunga sang mga Saksi ni Jehova sarang kag dapat magpalapit sa mga gulang sang kongregasyon para sa bulig kag pagpalig-on. Apang ngaa indi mahimo nga magpangamuyo ka na lang kay Jehova? Bangod gintugyanan ni Jehova ang mga gulang sing salabton sa “pagbantay sang inyo mga kalag.” (Hebreo 13:17) Mabuligan nila ikaw nga malikawan ang paghimo liwat sing sala.​—⁠Ipaanggid ang Santiago 5:​14-16.

Indi pagdayai ang imo kaugalingon paagi sa pagsiling nga mabuligan mo ang imo kaugalingon. Kon matuod nga malig-on ikaw sa paghimo sina, nakahimo ka bala sing sala? Sing maathag, kinahanglan mo ang bulig sang iban nga tawo. Maisugon nga ginhimo ini ni Andrew. Ang iya panugda? “Ginapalig-on ko ang bisan sin-o nga nakahimo sing daku nga sala, ukon nagahimo sini, nga buksan ang iya tagipusuon kay Jehova kag sa isa sang iya mga manugbantay.”

Apang paano ikaw magpalapit sa isa ka gulang? Pilia ang isa nga imo ginasaligan. Makasugod ikaw paagi sa pagsiling: “May luyag ako nga isugid” ukon “May problema ako” ukon bisan sing “May problema ako kag kinahanglan ko ang imo bulig.” Ang imo pagkabunayag kag pagkaprangka matuod nga magapakita sang imo paghinulsol kag handum nga magbag-o.

‘Nahadlok Ako nga Madisfellowship’

Kamusta ina nga posibilidad? Matuod nga bangod sang paghimo sing serioso nga sala posible nga madisfellowship ang isa, apang indi sa gilayon. Ang pagdisfellowship ginahimo sa mga wala nagahinulsol​—⁠nga matig-a nga nagadumili nga magbag-o. Ang Hulubaton 28:​13 nagasiling: “Ang nagatabon sang iya mga kasal-anan indi magmadinalag-on, apang ang bisan sin-o nga nagatu-ad kag nagabiya pagakaluoyan.” Ang katunayan nga nagpalapit ikaw sa mga gulang agod mangayo sing bulig pamatuod sang imo handum nga magbag-o. Ang mga gulang mga manug-ayo, indi mga manugsilot. Obligasyon nila nga pakig-angutan ang katawhan sang Dios sing maluluy-on kag matinahuron. Luyag nila kamo buligan nga “tadlungon ang imo mga banas.”​—⁠Hebreo 12:⁠13.

Sa pagkamatuod, kon may nadalahig nga paglimbong ukon madugay nga pagbuhat sing daku nga sala, ang makapakumbinsi nga “mga buhat nga takus sang pagpatawad” mahimo nga indi bastante. (Binuhatan 26:20) Kon kaisa nagaresulta ini sa pagdisfellowship. Kag bisan kon mahinulsulon pa ang nakahimo sing sala, ang mga gulang obligado nga magpatuman sing pila ka porma sang pagdisiplina. Dapat ka bala maakig ukon maugot bangod sang ila desisyon? Sa Hebreo 12:​5, 6, si Pablo nagasugo: “Anak ko, indi pagpakadiutaya ang disiplina gikan kay Jehova, ukon mapunaw kon sabdungon ka niya; kay ang ginahigugma ni Jehova ginadisiplina niya; sa katunayan, ginahampak niya ang tagsa nga ginabaton niya subong anak.” Ano man nga pagdisiplina ang imo mabaton, kabiga ini subong pamatuod nga ginahigugma ikaw sang Dios. Dumduma, ang matuod nga paghinulsol magapasag-uli sa imo sa isa ka nagakaigo nga kaangtanan upod sa aton maluluy-on nga Amay, si Jehova nga Dios.

Nagakinahanglan sing kaisog ang pagbaton sang imo mga kasal-anan. Apang sa paghimo sini, matadlong mo ang mga butang indi lamang upod sa imo mga ginikanan kundi kay Jehova nga Dios mismo. Indi pagtuguti ang kahadlok, bugal, ukon kahuya nga mag-upang sa imo sa pagpangayo sing bulig. Dumduma: Si Jehova “magapatawad sa daku nga paagi.”​—⁠Isaias 55:⁠7.

[Mga footnote]

[Blurb sa pahina 27]

‘Ginapalig-on ko ang tanan nga nakasala nga buksan ang ila mga tagipusuon kay Jehova.’​—⁠Andrew

[Retrato sa pahina 26]

Ang pagtu-ad sa imo mga ginikanan makadul-ong sa kaumpawan sa espirituwal nga pag-ayo