Magpatubo sang Inyo Kaugalingon nga mga Tugdo

SANG KORESPONSAL SANG MAGMATA! SA HAWAII

INDI ka bala makakita kon kaisa sing preska, indi huyos, kag masustansia nga mga ulutanon sa inyo lokal nga tiendahan? Bueno, indi na magpangita pa! Paagi sa diutay nga tion kag panikasog, mahimo gid ikaw makapatubo sing mga ulutanon sa imo mismo balay ukon apartment. Paano? Paagi sa pagpatubo sing mga tugdo!

Mahapos kaayo patubuon ang mga tugdo nga bisan ang bata makahimo sini. Diutay lamang nga espasyo ang kinahanglan sini, indi na magkutkot, indi na maghilamon, kag indi na magkabalaka tuhoy sa mga kemikal. Labaw sa tanan, mahimo mo makaon ang imo patubas sing apat ukon lima ka adlaw lamang sa tapos ini magtubo! Apang indi lamang kahapusan ang ginahatag sini.

Una, ang mga tugdo masustansia​—⁠ayhan masustansia pa sa kinaandan nga mga balatong ukon mga uyas. Ang The Beansprout Book, ni Gay Courter nagasiling: “Samtang ang mga uyas nagatugdo, ang bitamina nga sustansia sini nagadugang man. Ang una nga mga salingsing sang soya (sa kada 100 gramos [mga 4 ka onsas] sang uyas) may 108 miligramos lamang nga Bitamina C suno sa isa ka pagtuon nga ginhimo sa Unibersidad sang Pennsylvania. Apang pagkatapos sang 72 ka oras ang Bitamina C sini naglab-ot sa 706 miligramos!”

Ang mga tugdo makinot man. Sa katunayan, ayhan may yara ka na sang tanan nga kagamitan nga imo kinahanglanon.

Pagplastar

Una, kinahanglan mo ang isa ka suludlan. Mahimo magamit ang isa ka daku nga kristal ukon plastik nga garapon, indi metal nga kaldero, kristal ukon porsilana nga yahong, ukon ang isa ka madalom nga pinggan. Mahimo gani gamiton ang manabaw nga pinggan, ginahapnig ang isa ka anib sang mga uyas sa ulot sang duha ka sampaw sang basa nga katsa ukon mga paper towel agod indi magmala. Ano man nga suludlan ang imo pilion, pat-ura nga hustuhan ang kadakuon sini agod makapanugdo ang mga uyas kag sa gihapon may lugar ang hangin sa pagsirkular sa palibot sini. Nasapwan ko nga maayo gamiton ang isa ka kristal nga garapon para sa magagmay nga mga uyas kaangay sang alfalfa. Ang mas daku nga mga uyas, kaangay sang monggo mahimo nga mas maayo patubuon sa madalom nga pinggan ukon kolon. Ginahatag sini ang kinahanglanon nga ekstra nga espasyo kag ginaamligan ang tugdo gikan sa pagkadunot ukon pag-aslom.

Kinahanglan mo man ang takop para sa imo suludlan. Ang plastik nga salaan, isa ka panid nga katsa, ukon bisan ang daan naylon nga medyas mahimo gamiton. Kinahanglan lamang ang isa ka mahunit nga lastiko ukon higot agod mataklob ini sa baba sang suludlan. Siempre, bangod ang mga uyas dapat bunlawan sa dimagkubos duha ka beses kada adlaw, kinahanglan mo man ang tubig kag ayhan isa ka salaan agod maipisan sing tubig ang suludlan.

Sa katapusan, kinahanglan mo ang mga uyas. Halos bisan ano nga ginakaon nga uyas mahimo mapatugdo. (Apang, nagahalong ako nga likawan ang mga uyas nga napadapatan sing mga kemikal.) Ang labing maayo nga mga uyas nga gamiton para sa mga bag-uhan amo ang monggo ukon mga uyas sang alfalfa. Mahapos ini patugduon kag manamit kaayo! Tuguti ako karon sa pagsugid sa imo kon paano ini himuon.

Pagpatubo sang Imo Kaugalingon nga mga Tugdo

UNA NGA ADLAW: Una, bunlawi sing maayo ang mga uyas. Dayon, sudli sing tubig ang imo suludlan tubtob nga malapawan sini ang mga uyas ukon monggo sing mga 5 sentimetros. Hulumi ang mga uyas sa dimagkubos walo tubtob napulo ka oras. Mahimo nimo ibutang ang hululuman nga uyas antes magtulog. Pagkatapos sang walo tubtob napulo ka oras, ang mga uyas magabulto kag ang mga panit magalitik. Handa na ini nga magtugdo.

IKADUHA NGA ADLAW: Sa aga, kuhaa ang takop kag ipisan ang tubig sa suludlan. (Sanglit may mga bitamina ang tubig, masami ko nga ginabunyag ini sa akon mga tanom.) Karon, sudli liwat sing tubig ang suludlan. Lugua ini sing pila ka beses, kag patuwara, agod maula ang sobra nga tubig. Sulitsulita ang pagsulod sing tubig sa suludlan, ginabunlawan kag ginaipisan sing tubig ang mga uyas sing tatlo ka beses. Kon ginsaylo mo ang hinuluman nga mga uyas sa manabaw nga pinggan, inanay nga bubui sing tubig ang ibabaw sang katsa, kag ipisan ini sing tubig paagi sa pagpahilay sang pinggan. Sa ulihi, liwata ang pagbunlaw agod nga ang mga uyas mabunlawan sing maayo sing duha ka beses kada adlaw.

IKATLO NGA ADLAW: Sa karon, mahimo na nimo makita ang pagpanugdo sang imo uyas. Padayuna ang pagbunlaw sini duha ka beses kada adlaw.

IKAP-AT NGA ADLAW: Mahimo mo na makaon ang mga tugdo! Mahimo mo mapatubo sing medyo mataas ang tugdo sang monggo nga indi magpait ang sabor sini. Pat-ura lamang nga padayon mo nga ginabunlawan ang tugdo sing duha ka beses kada adlaw. Mahimo mo man ibulad sa adlaw ang mga tugdo sa sulod sang mga isa ka oras kag dayon isulod ini sa repridyeretor. Ang magagmay nga mga dahon matahom nga magabuluberde​—⁠makagalana gid!

Sa tapos magmadinalag-on, mahimo nga luyag mo tilawan ang iban pa nga sahi sang mga lamigas ukon uyas. Magkatuhay ang sabor kag kalawigon sang pagpanugdo sang kada isa. Halimbawa, mahimo mo tilawan nga magpatugdo sing napuy-asan nga mga liso sang sunflower. Mas manamit kaunon ining mga tugdo sa sulod sang duha ka adlaw, kon mga tunga-sa-pulgada lamang ang kalabaon sini. Kon mas malaba pa sa sina ang ila pagtubo, mahimo magapait ang sabor sini.

Kon Paano Lutuon ang mga Tugdo

Kalabanan nga mga tugdo sarang makaon nga hilaw sa mga ensalada, mga sandwich, ukon sa bisan anong linuto nga ginagamitan sing mga monggo ukon mga uyas. Apang, ang mga tugdo sang monggo mahimo mapausbungan sa sulod sang 10 tubtob 15 minutos antes mo ini kaunon. Ukon mahimo mo ini gisahon sa diutay lamang nga mantika, ahos, kag asin. Manamit gid ini nga linuto! Ang mga tugdo sang trigo kag rye matam-is kaayo kag maayo ini nga panakot sa mga tinapay kag mga muffin.

Sa amo ang pagpatubo sing mga tugdo isa ka maayo kag makinot nga kalingawan. Mahimo masapwan mo gid nga makakulunyag kag makapaladya ang paghimo sini. Ti, madali ikaw magmadinalag-on kag ang mga resulta manamit kaayo!​—⁠Gin-amot.

[Picture Credit Line sa pahina 22]

Japanese Stencil Designs

[Retrato sa pahina 23]

UNA NGA ADLAW: Magkuha sing mga uyas kag hulumi ini sa tubig sa sulod sang walo tubtob napulo ka oras

[Retrato sa mga pahina 24, 25]

IKADUHA KAG IKATLO NGA ADLAW: Bunlawi sing maayo ang mga uyas sing duha ka beses kada adlaw

[Retrato sa pahina 24]

IKAP-AT NGA ADLAW: Ang mga tugdo (makita diri sa kilid, sa idalom sang katsa) mahimo na makaon!