Isa Ka Masanag nga Palaabuton para sa Aton mga Kabataan

KUTOB sang matapos ang Inaway Kalibutanon II, ang mga gobierno sa kalibutan naghimo kag naglagda sing madamo nga kasugtanan agod amligan ang mga sibilyan sa tion sang inaway. Lakip sa sini amo ang mga kasugtanan nga nagatugot nga makalab-ot ang suplay sang bulong kag pagkaon sa mga kabataan. Ang internasyonal nga mga kasugtanan nagasaad sa pag-amlig sa kabataan gikan sa paghingalit sa sekso, pagpaantos, kag kasingki. Ginadumilian man sang mga kasugtanan ang pagpasoldado sa kay bisan sin-o nga kubos sa 15 anyos.

Ginatawag sang The State of the World’s Children 1996, isa ka report sang United Nations Childrens’s Fund, ining mga kasuguan subong “tunay nga mga tanda” kag nagdugang: “Mahimo gid nga ang mga politiko nga nakahibalo nga may mga talaksan nga mahimo man sila mahukman amo man ang magabinagbinag sa sinang mga talaksan sa ila mga pagtuon.”

Sa pagkamatuod, nahibaluan man sang mga politiko nga ang internasyonal nga komunidad masami nga kulang sing ikasarang kag kabubut-on sa pagpatuman sing mga kasuguan. Busa ginabaton sang report nga “bangod sa kasangkaron nga ginsikway ining mga prinsipio, mahapos lang sikwayon ang nagaluntad nga listahan sang internasyonal nga kasuguan.”

Nian yara ang butang tuhoy sa kuwarta. Sang 1993, nagluntad ang mga inaway sa 79 ka pungsod. Sisentay singko sa sini ang imol nga mga pungsod. Diin nagkuha ining imol nga mga pungsod sing mga armas nga ila gingamit sa pagpakig-away? Sa kalabanan halin sa manggaranon nga mga pungsod. Kag sin-o ang lima ka nagapanguna sa pagpadala sing mga armas sa imol nga mga pungsod? Ang lima ka permanente nga mga katapo sang United Nations Security Council!

Yadtong Nagaulikid

Sa pagkamatuod, may mga hanuot nga nagaulikid tuhoy sa kahimtangan sang mga kabataan sa inaway. Mahigugmaon nga ginabuligan sang mga indibiduwal kag mga organisasyon ang lamharon nga mga biktima sang inaway. Halimbawa, ginhimo ini sang mga Saksi ni Jehova, nga wala nagapakigbahin sa inaway. Apang agod madula ang pagbiktima sang mga kabataan sa inaway kinahanglan gid nga dulaon mismo ang inaway, isa ka palaabuton nga daw indi posible. Bangod sang malawig nga rekord sang katawhan tuhoy sa kagarot kag inaway, madamo ang nagahinakop nga indi gid mapaluntad sang tawo ang bug-os kalibutan nga paghidait. Tuhoy sini, husto sila.

Ang mga tawo nagahinakop man nga ang Dios indi gid magapasilabot sa mga hilikuton sang mga pungsod ukon magapaluntad sing dayon nga paghidait sa duta. Tuhoy sini, sayop sila.

Ang aton Manunuga, si Jehova nga Dios, hanuot nga nagaulikid tuhoy sa mga butang nga nagakatabo sa duta. Sa iya Pulong, ang Biblia, si Jehova namangkot: “Nagakalipay bala ako sa kamatayon sang isa nga malauton . . . kag indi nga sia magatalikod gikan sa iya mga dalanon kag padayon nga magkabuhi?” Ang Dios maathag nga nagasabat: “Wala ako nagakalipay sa kamatayon sang isa.”​—⁠Ezequiel 18:​23, 32.

Binagbinaga ini: Kon ang aton maawaon nga Manunuga nagahandum nga bisan ang malauton nga mga adulto maghinulsol kag magkalipay sa kabuhi, pat-od gid nga luyag niya nga mabuhi ang mga kabataan kag magkalipay sa kabuhi! Apang, indi pagtugutan sang Dios nga magpadayon ang mga malauton. “Ang mga malauton pagautdon,” saad sang Pulong sang Dios. “Kay sa diutay pa nga tion, kag ang malauton wala na.”​—⁠Salmo 37:⁠9, 10.

Si Jesucristo, nga himpit nga nagpabanaag sa personalidad sang iya langitnon nga Amay, nagahigugma sa mga kabataan kag nagsiling nga “ang Ginharian sang mga langit natigana sa mga katulad nila.” (Mateo 19:14) Ang paghalad sa kabataan sa mga dios sang inaway ginakangil-aran ni Jehova nga Dios kag sang iya Anak, si Jesucristo.​—⁠Ipaanggid ang Deuteronomio 18:​10, 12.

Ang Saad Sang Dios nga Isa ka Masanag nga Palaabuton

Gintugutan sang Dios ang mga inaway kag pag-antos sa sulod sang mga siglo agod nga ang kamatuoran nga ginsiling ni manalagna Jeremias matuman tubtob sa walay katubtuban: “Nahibaluan ko, O Jehova, nga wala sa tawo ang iya dalanon. Wala sa tawo nga nagalakat bisan ang pagmando sang iya mga tikang.” (Jeremias 10:⁠23) Sa indi madugay, saad sang Biblia, ibindikar ni Jehova ang iya bug-os uniberso nga pagkasoberano paagi sa “pagpauntat sa inaway tubtob sa ukbong sang duta.” (Salmo 46:9) Ginatagna man sa Biblia ang tion nga “salsalon [sang mga tawo] ang ila mga espada nga mga punta sang arado kag ang ila mga bangkaw nga mga galab nga inughagbas. Ang pungsod indi magabayaw sing espada batok sa pungsod, kag indi na sila magtuon sing inaway.”​—⁠Isaias 2:⁠4.

Ano ang matabo sa sadtong napatay sa inaway? May paglaum pa bala para sa ila? Si Jesus nagsaad sing pagkabanhaw sang mga patay padulong sa isa ka wala sing inaway nga duta, nga nagasiling: “Ang oras magaabot nga ang tanan nga yara sa handumanan nga lulubngan . . . magaguwa.” (Juan 5:⁠28, 29) Sing kaanggid, si apostol Pablo may pagsalig nga nagsiling: “May pagkabanhaw sang mga matarong kag dimatarong.”​—⁠Binuhatan 24:⁠15.

Ang mga saad sang Dios pat-od gid nga matuman. May gahom sia kag determinado nga himuon ang tanan nga iya gintuyo. (Isaias 55:11) Sang magsiling si Jehova nga dulaon niya ang inaway, himuon niya ini. Sang magsaad sia nga banhawon yadtong mga napatay, tumanon niya ini. Subong sang ginsiling ni anghel Gabriel, “wala sing kapahayagan nga imposible sa Dios.”​—⁠Lucas 1:⁠37.

[Retrato sa pahina 10]

Kon wala na ang inaway, ang tanan nga kabataan makatigayon sing malipayon nga kabuhi