Natak-an Ka Bala sa Imo Trabaho?

MAHIMO gid nga nagatrabaho ikaw sa sulod sang mga walo ka oras kada adlaw. Malawig ina nga tion kag daku nga bahin sang kabuhi nga isakripisyo sa pagkataka! Apang, madamo nga trabaho sa ika-20 nga siglo ang makatalaka kag indi masyado mapabugal sang mamumugon.

Gani makabenepisyo gid ikaw kon himuon mo nga makawiwili ang imo trabaho. Matigayon mo ang daku nga kalipay sa imo trabaho, kag matun-an mo ang sekreto kon paano mangin makawiwili ang bisan ano nga trabaho mo sa ulihi. Gani, aton usisaon ang pila ka paagi sa paghimo sini.

Maghulag Sing Mapagsik

Ang pila ka awtoridad nagarekomendar nga magtrabaho ikaw subong nga daw naluyagan mo ini. Kon himuon mo ini, mahimo gid nga maluyagan mo ang imo trabaho sa ulihi.

‘Apang wala gid ako sing gana sa akon trabaho!’ mahimo isiling mo. Ayhan ang imo trabaho nagalakip sing isa ka estrikto nga rutina, subong sang assembly-line nga trabaho. Ukon mahimo nga nagaobra ikaw sa imo trabaho sa sulod na sang madamo nga tuig amo nga sa banta mo imposible nga mawili pa ikaw sa sini. Apang, ang simple nga mga taktika subong sang pagyuhum kag pagtindog sing matadlong mahimo makabulig sa imo nga mangin mas mapagsik sa imo trabaho.

Mahimo man makabulig kon bug-os mo nga isentro ang imo igtalupangod sa imo ginahimo. Indi magtrabaho subong nga daw isa ikaw ka makina, kon sa aton pa, kag samtang nagatrabaho indi pagpamensara ang tigpalanyaga, ang Sabado kag Domingo nga wala sing trabaho, ukon ang isa pa ka trabaho nga dapat himuon. Masami nga maalamon nga magkonsentrar sing bug-os sa ginaobra nga trabaho. Ang resulta? Mahimo nga maluyagan mo ang trabaho, kag nian ang tion daw madasig nga nagalipas.

Amo sini ang kinaandan nga nagakatabo kon ginahugod mo ang imo kaugalingon sa isa ka hilikuton nga imo gid naluyagan. Mahimo mo matigayon ang amo man nga resulta paagi sa pagpilit sa imo kaugalingon nga hatagan sing bug-os nga atension ang trabaho nga wala mo maluyagan.

Himua ang Imo Labi nga Masarangan

Ang paghimo sang imo labi nga masarangan makabulig sa imo nga malipay ka sa imo trabaho. Sa pagkamatuod, ini nga laygay nagasumpakil sa bantog nga ideya nga kon masapwan mo nga indi makawiwili ang imo trabaho, dapat mo himuon ini sa pinakakubos nga panikasog kon posible. Apang ang pagpabaya, pagpabuyanbuyan, kag pagpakahapos mahimo gid nga makapaluya sa imo kag makadugang sing kahuol kag kalapyo. Sa pila ka kaso ang tawo nga pirme nagapauli halin sa trabaho nga napiutan, nahul-an, kag kapoy mahimo gid nga mag-antos bangod wala makatrabaho sing maukod.

Suno sa Biblia, ang pagtrabaho sing lakas sa isa ka proyekto nagahimo pa gani sa tion sang pagliwaliwa nga labi ka makalilipay. “Wala na sing maayo pa sa tawo sangsa magkaon sia kag mag-inom kag magkalipay ang iya kalag sa kaayuhan sang iya kinabudlayan.” (Manugwali 2:24) Para sa iban, daw isa ini ka kinaraan nga hulubaton, apang ginaaplikar sang iban ining wala nagabag-o nga prinsipio. Sa pagkamatuod, nagaugyon sila nga “wala na sing maayo pa” sangsa magkalipay sila sa bunga sang ila lakas nga pagpangabudlay. Ang libro nga The Joy of Working nagsiling: “Ang trabaho nga ginhimo sing maayo nagahatag sing kaayawan.”

Gani, himua ang labi mo nga masarangan sa trabaho, kag mahimo nga magapagsik ikaw. Himua ang labi pa sangsa ginakinahanglan lamang, kag mangin malipayon ikaw. Himua anay ang importante nga mga hilikuton, kag labi ikaw nga malipayon sa imo pagpahuway sa tigpalanyaga kag sa Sabado kag Domingo sangsa tawo nga kapoy bangod sang pagpabuyanbuyan.​—⁠Ipaanggid ang Ester 10:2; Roma 12:11; 2 Timoteo 2:​15.

Sa baylo nga magpaindis-indis sa iban, tinguhai nga labawan ang imo kaugalingon. (Galacia 6:⁠4) Magpahamtang sing bag-o nga mga talaksan, bag-o nga mga tulumuron. Panikasugi nga himuon ang mas maayo pa. Ang isa ka babayi, nga ang trabaho amo ang pagpanahi pirme nga ginakabig sang iban nga makatalaka kaayo, naghimo sing kalingawan paagi sa pag-oras sa iya kaugalingon. Ginabantayan niya ang iya hinimuan kada oras, kag ginatinguhaan nga dugangan ini. Naluyagan gid niya ang iya trabaho bangod nagatinguha sia nga mangin produktibo tubtob sa iya masarangan.​—⁠Hulubaton 31:⁠31.

“Punihi” ang Imo Trabaho

Si Dr. Dennis T. Jaffe kag si Dr. Cynthia D. Scott nagarekomendar: “Hunahunaa ang imo trabaho subong isa ka wala sing unod nga balay. Nagsulod ka kag gintan-aw ang porma kag pagkahuman sini. Nian napukaw ang imo pagkamapahituon. Ginbinagbinag mo kon ano ang isulod, punihan, kag himuon ang balay nga mangin imo puluy-an. May kaugalingon ka nga estilo.”

Ang kalabanan nga trabaho ginahatag sa imo nga may balayan sang mga pagsulundan kag mga panuytoy. Ang paghimo sang ginapaabot sa imo kaangay gid sang pagpuyo sa isa ka balay nga wala sing unod. Wala ini sing personalidad. Apang kon idugang mo ang imo personal nga estilo, ang imo trabaho mangin mas makawiwili. Wala sing duha ka tawo nga “makapuni” sa isa ka trabaho sa pareho nga paagi. Ang isa ka serbidor makasaulo sang mga order sang suki nga mga kustomer. Ang isa naman mahimo nga mainayuhon kag matinahuron. Lunsay sila nagakalipay sa ila trabaho bangod maukod sila sa ila ginahimo.

Padayon nga Magtuon

Ang isa pa ka paagi agod malipay ikaw sa trabaho amo ang pagtuon. Ginapaathag sang libro nga Tension Turnaround nga samtang nagadaku kita, nagadugang ang ikasarang sang aton utok sa pagproseso sing impormasyon. Amo sini ang rason kon ngaa ang mga butang nga nagapakunyag sa aton sang una nagapataka sa aton karon. Ang solusyon amo ang pagpaayaw sa aton utok sa bag-o nga impormasyon paagi sa pagtuon sing bag-o nga mga butang.

Bangod sang dugang mo nga pagtuon tuhoy sa imo trabaho mahimo nga sa ulihi hatagan ikaw sing mas maayo nga trabaho. Apang bisan indi ina matabo, ang pagtuon mismo magahimo sang imo trabaho nga mas makawiwili kag makaalayaw. Ang mga awtor nga sanday Charles Cameron kag Suzanne Elusorr nagpatalupangod: “Wala lamang ginadugangan sang pagtuon ang imo pagsalig paagi sa pagpauswag sang imo mga ikasarang, nagaapektar man ini sa imo kabilugan nga panimuot tuhoy sa kabuhi: nga ang mga problema sarang malubad, ang mga kabudlayan mahimo malandas, ang kahadlok mahimo mapahaganhagan, kag nga madamo pa nga butang ang posible sangsa ginahunahuna mo.”

‘Apang,’ mahimo ikaw mamatok, ‘madugay ko na nahibaluan ang tanan nga dapat mahibaluan tuhoy sa akon trabaho!’ Sa sining kahimtangan, mahimo bala ikaw makatuon sing mga butang nga sing indi direkta may kaangtanan sa imo trabaho? Halimbawa, mahimo ikaw mamat-od nga magtuon sing dugang tuhoy sa pagpakig-angot sa iban nga tawo ukon tuhoy sa inyo kagamitan. Ayhan matun-an mo kon paano magsulat sing mas maayo nga memo sa opisina ukon kon paano magdumala sing mas maayo nga miting. Mahimo mo matun-an ang labing epektibo nga mga paagi sa pagpakig-angot sa mga superbisor.

Paano mo matun-an ining mga butang? Ayhan ang inyo kompanya nagahatag sing mga lektura nga mahimo mo panginpuslan. Ukon mahimo nga may mga libro sa librarya nga imo ginakinahanglan. Apang indi pagpasapayani ang daw indi mamutikan nga tuburan sang impormasyon. Mahimo ikaw makatuon paagi sa pag-obserbar sa nagatrabaho nga mga tawo kag pagtalupangod sang ila maayo nga mga kinaiya kag mga kaluyahon. Mahimo ikaw makatuon gikan sa imo mga sayop, kag gikan sa imo man mga kadalag-an, paagi sa pag-analisar sa imo ginhimo nga husto. Ang imo matun-an gikan sa imo mismo mga eksperiensia kag gikan sa pag-obserbar sa iban makatudlo sa imo sing mga butang nga mahimo indi gid nimo mabasa sa mga libro ukon mabatian sa klase.

Pila ka Katapusan nga Panugda

May isa pa ka butang nga mahimo hunahunaon mo sa imo trabaho. Mahimo kabigon mo nga nagakadapat ikaw sa mas maayo​—⁠nga natigayon sang iban ang tanan nga kahigayunan kag nga wala gid ikaw mahatagan sing kahigayunan nga himuon ang trabaho nga imo gid naluyagan. Mahimo ikaw makigsugilanon pirme sa iban nga nagaugyon sa imo, kag mahimo ikaw makumbinsi nga ini tanan matuod.

Apang mahimo nga indi ini matuod. Madamong tawo nga nagakalipay sa ila trabaho ang nakatuon sa paghimo sini. Ang isa ka tawo nga nalipay sa pagdesinyo sa mga balay mahimo man malipay sa pagmaneho sa bus. Ngaa? Bangod ang iya pagkamapahituon sa trabaho nagahatag sa iya sing kalipay kag kaayawan.

Gani indi maghunahuna sing negatibo nga mga butang nga nagapasubo sang mga adlaw sang pagtrabaho kon ipaanggid sa Sabado kag Domingo. Indi pag-uyangi ang tion sa paghinumdom sang imo nagligad nga mga kapaslawan, nga nagahunahuna kon ano ang malain nga matabo sa masunod, kag nagakabalaka tuhoy sa ginahunahuna sang iban sa imo. Talupangda ang obra sa imo atubangan. Hatagi ini sing bu-os nga igtalupangod. Ukuri ini subong sang himuon mo sa imo paborito nga hilikuton. Himua ang imo labing masarangan, kag magkalipay sa imo maayo nga hinimuan.

[Kahon sa pahina 11]

Indi Pagpatumbayai ang Imo Trabaho

Ang Biblia nagasiling sa Hulubaton 27:​23, 24: “Magmaukod ka sa paghibalo sang kahimtangan sang imo mga panong. Bantayi sing maayo ang imo panong sang kasapatan; kay ang manggad indi mangin dayon, ukon ang purongpurong sa tanan nga kaliwatan.” Ano ang kahulugan sini? Nagakahulugan ini nga ang manggad kag ang pagkaprominente (isa ka purongpurong), kon matigayon gid man, masami nga umalagi lamang. Busa, ang isa ka manugbantay sing karnero sang panahon sang Biblia nagpakita sing kaalam kon naghatag sia sing maukod nga atension sa pag-atipan sang iya mga karnero, kon sayuron, ‘sa pagbantay sing maayo sa iya panong sang kasapatan.’ Subong ginapakita sang masunod nga tatlo ka bersikulo, ang resulta amo ang materyal nga kalig-unan para sa trabahador kag sa iya pamilya.​—⁠Hulubaton 27:​25-27. Kamusta sa karon? Masami nga ang tulumuron sang mga tawo amo ang pagtigayon sing manggad ukon prominente nga posisyon, nga ginalauman nila, makabulig sa ila nga bayaan ang ila presente nga trabaho. Ang pila may realistiko nga mga plano; ang iban nagadamgo lamang. Sa bisan ano nga kahimtangan indi maalamon nga pakalainon ukon pasapayanan ang presente nga palangabuhian sang isa. Ini, kag mahimo padayon nga mangin, ang labing masaligan nga palangabuhian. Mas maalamon para sa isa ka tawo nga magbantay sa iya “panong sang kasapatan,” bug-os nga nagabantay sa iya masaligan nga patag sang palangitan-an. Ang paghimo niya sini mahimo gid nga magaresulta sa kalig-unan sa materyal sa karon kag sa palaabuton.