“Nagadaku nga Kal-ang sa Ulot sang mga Klero kag sang mga Lego”

“NAGADAKU ang kal-ang sa ulot sang mga klero kag mga lego sa ebangheliko nga mga simbahan sa Amerika,” siling ni Robert K. Johnston, propesor sa teolohiya kag kultura. Sa Ministerial Formation, magasin sang World Council of Churches, ginsambit niya ang pila sang mga kabangdanan nga ginatunaan sining paglayuay: Bangod sang nagadaku nga mga pag-ipit sa pamilya, ginahingyo sang mga pastor ang iskedyul sa trabaho nga kaangay sang “pagbuslanay sang mga doktor kon talipuspusan sang semana.” Kon magsobra sa oras ang pagpangabudlay sang pastor, nagapaabot sia nga bayaran ini. Dugang pa, siling sang propesor, “samtang nagadugang ang pag-ipit may kaangtanan sa talaksan sang maayong pamatasan kag sang kasuguan,” ang teolohiko nga mga seminaryo nagapaandam sa ila nagagradwar nga mga estudyante nga likawan ang mga problema paagi sa “pagpakigsuod lamang sa tunga sang ila ‘grupo’ sang iban pa nga mga klero” kag pakig-angutan ang ila mga parokyano subong “mga kliyente.” Gani, indi makapakibot nga madamo nga parokyano ang nagatamod sa ila mga pastor subong katapo sang isa ka mataas nga klase nga indi makahangop sa mga kinahanglanon kag mga problema sang kinaandan nga sumilimba.

Ano nga sahi sang pastor ang makapadiutay sa kal-ang? Nasapwan sang isa ka pagtuon nga nag-analisar kon ngaa indi madinalag-on ang mga pastor sa ila ministeryo nga ang mga parokyano wala nagatamod sa akademiko nga ihibalo kag propesyonal nga mga kalantip sang pastor subong importante. Wala nagapangita ang mga katapo sang simbahan sing tuman kaalam, talunsay nga humalambal, ukon hanas nga administrador. Labaw sa tanan, luyag nila nga ang ila pastor mangin “diosnon nga tawo” nga nagabuhat sang iya ginabantala. Kon wala ina nga kinaiya, siling ni Propesor Johnston, “wala sing impormasyon nga mapaalinton ukon kalantip nga mapakita” ang makataytay sa kal-ang.

Ano ang ginasiling sang Biblia subong amo ang mga kinahanglanon para sa isa ka gulang sa kongregasyon? “Busa ang manugtatap dapat nga disalabdungon, bana sang isa ka asawa, mahaganhaganon sa mga batasan, maligdong sing hunahuna, mahim-ong, maabiabihon, kalipikado sa pagpanudlo, indi palahubog, dimakiawayon, kundi makatarunganon, dimabinangigon, dimahigugmaon sa kuwarta, isa ka lalaki nga nagadumala sang iya kaugalingon nga panimalay sa maayo nga paagi, may mga anak nga nagapasakop sing bug-os nga pagkaserioso . . . Dugang pa dapat man nga may maayo sia nga testimonya gikan sa mga tawo sa guwa, agod indi sia mahulog sa kahuluy-an kag sa siod sang Yawa.”​—⁠1 Timoteo 3:​2-4, 7.