Kon Paano Ko Nalandas ang Pag-ang-ang

Panugiron ni Sven Sievers

NAGAANG-ANG ako maghambal kutob sa akon pagkabata. Sa paghinumdom, ginapasalamatan ko ang pamaagi sang akon mga ginikanan sa pag-atubang sa problema. Kon mag-ang-ang gani ako, pirme nila gintinguhaan nga pamatian sing maayo ang luyag ko ihambal sa baylo nga tadlungon ang akon panghambal. Suno sa mga terapista sa paghambal, ang mga ginikanan nga pirme nagasapak sang pag-ang-ang sang ila anak mahimo nga magapalubha sang diperensya.⁠a

Ang akon iloy nangin isa sang mga Saksi ni Jehova sadtong tatlo ka tuig ang akon edad. Sang nagtin-edyer ako namat-od ako nga sundon ang iya halimbawa kag nabuligan sa pagtuon sing maid-id sa Biblia. Sang Hulyo 24, 1982, nabawtismuhan ako subong isa ka dedikado nga alagad sang Dios sa kombension sa Neumünster, Alemanya. Sang ulihi, nagsaylo ako sa South Africa, diin ginpadayon ko ang pagpakigbahin sa publiko nga pagbantala nga hilikuton, nga sa sini ginasugo ang tanan matuod nga mga Cristiano nga makigbahin. (Mateo 28:​19, 20) Ayhan mamangkot ka, paano ko nalandas ang akon pag-ang-ang?

Mga Padya Sang Positibo nga Panimuot

Ginabaton ko nga kon kaisa nabudlayan ako nga mangin positibo sing panimuot, apang natukiban ko nga daku gid nga bulig ang mangin positibo. Ang katunayan amo nga sa bisan paano pirme ako makapaalinton. Kon indi man paagi sa hambal, nagapaalinton ako paagi sa pagsulat sing mga mensahe ukon paagi lamang sa pagpakita sa iban sang literatura sa Biblia. Bangod sang positibo nga panimuot, nalandas ko ang kabudlayan sang pagsugod sing isa ka paghambalanay. Ginatinguhaan ko nga huptan nga tuman ka simple ang akon introduksion. Sa pamuno sang isa ka paghambalanay, ginapahambal ko ang tagbalay kon mahimo. Ang mga tawo maluyag maghambal, kag nagahatag ini sa akon sing kahigayunan nga mahibaluan ang ila panghunahuna. Nian, ginapadayon ko ang paghambalanay paagi sa mga butang nga nagawili sa ila, ginapadaku ang mensahe sang Biblia. Ang pagkonsentrar sa ginahambal nila nakabulig sa akon nga kalimtan ang akon problema sa paghambal, kag indi na tanto ang akon pag-ang-ang.

Ang positibo nga panimuot nakabulig man sa akon nga magkomento sa Cristianong mga miting. Natukiban ko nga sa akon labi nga pagpakigbahin sa mga paghambalanay sa Biblia, labi nga nagakaanad sa akon ang tumalambong kag ang konduktor kag nagapamati sa akon ginasiling sa baylo nga sa kon paano ko ini ginasiling.

Agod maagom ang kalipay sang kadalag-an, dapat ako pirme maninguha. Nagapugong ini sa akon nga kaluuyan ang akon kaugalingon kag mangin makinaugalingon. Ang paglandas sa pagkaluoy sa kaugalingon isa ka dalayon nga pagpakig-away. May hulubaton nga kon ang isa ka tawo mahulog sa kabayo, importante para sa iya nga makasakay liwat sa kabayo agod indi sia madulaan sing kompiansa sa kaugalingon. Gani kon kinahanglan ko nga mag-untat sa paghambal sa tion sang komento bangod indi ko na masarangan nga magpadayon tungod sa akon pag-ang-ang, ginatinguhaan ko nga makabalik liwat sa kabayo, kon sa aton pa, paagi sa pagkomento sa masunod gid nga kahigayunan.

Kon Paano Makabulig ang Iban

Kon kinahanglan ko nga magtelepono ukon magpangabay sing impormasyon sa mga estranghero, ginapasalamatan ko ang mataktikanhon nga bulig. Apang ang iban nga mga tawo nagasobra sa ila handum nga makabulig, kag ginatrato nila ako kaangay sa isa ka bata nga indi makasarang sa paghimo sing mga desisyon.

Ginapasalamatan ko man ang bulig sang akon mahigugmaon nga asawa, si Tracy. Antes sia mag-alagad subong akon “baba,” ginahambalan namon sing detalyado ang sitwasyon kag nahibaluan niya ang luyag ko nga himuon. (Ipaanggid ang Exodo 4:​10, 14, 15.) Sa sinang paagi, ginapakitaan niya ako sing pagtahod subong bana niya, kag ginapabatyag niya sa akon nga kontrolado ko gihapon ang akon kabuhi.

Ang isa pa nga nakabulig sing daku amo ang Teokratikong Eskwelahan sa Pagministro. Sa sining semanal nga miting, ang mga estudyante nagapakigbahin sa publiko nga pagbasa sang Biblia kag sa paghatag sing malip-ot nga mga pamulongpulong sa mga topiko sa Biblia. Nakibot ako nga mahibaluan nga sa masami makabasa kag makahambal gali ako sing maayo sa atubangan sang tumalambong. Kon wala ako magpalista sa eskwelahan, ayhan wala ko gid mahibalui ini nga ikasarang.

Kon may mga asaynment ako sa Teokratikong Eskwelahan sa Pagministro, makapalig-on labi na kon ang instruktor magakonsentrar sa ginasiling ko kag indi sa kon paano ko ini ginasiling. Nabuligan ako sing daku sang Theocratic Ministry School Guidebook,⁠b walay sapayan nga ang pila ka bahin sini nga libro mas daku gid nga hangkat sa mga nagaang-ang sa paghambal sangsa mga normal maghambal. Halimbawa, kon kaisa, bangod sang madamo nga pag-ang-ang, indi ko matapos ang akon pamulongpulong sa gintalana nga tion. Apang, makapalig-on gid sa akon kon ang instruktor nagakonsentrar sa mga punto nga masarangan ko nga mapangabudlayan.

Daku Pa nga Pribilehiyo sa Pag-alagad

Sang nagligad, may pribilehiyo ako nga mangin manugbasa sang isa ka Cristianong publikasyon nga amon ginatun-an sa amon mga miting. May pribilehiyo man ako nga dumalahan ang pagtinuon kon wala sing iban pa nga kalipikado nga ministro ang nakatambong, kag sa karon ginahimo ko ini sing regular. Bisan nga ginakulbaan sa primero, nabatyagan ko ang bulig sang Dios agod matuman ini nga mga asaynment.

Apang, sa sulod sang madamo nga tinuig, ang akon mga kahigayunan nga makabasa ukon makatudlo gikan sa plataporma sang kongregasyon diutay lamang. Halangpunon ini, kay kon kaisa madugay ko mapabutyag ang akon kaugalingon sa paagi nga mahangpan sang tumalambong. Gani ginagamit ko ang akon bug-os nga kusog sa pagtuman sa iban pa nga mga hilikuton. Sang primero, nangin kabulig ako sa pag-atipan sa suplay nga Lalantawan kag Magmata! nga mga magasin sang kongregasyon. Nian, sang matangdo ako subong isa ka ministeryal nga alagad, gin-atipan ko ang mga suplay nga Biblia, libro, kag iban pa nga literatura. Sang ulihi, gintangdo ako sa pag-usisa sa mga kard sang teritoryo nga ginagamit sa amon publiko nga pagpanaksi nga hilikuton. Ang pagkonsentrar sa sining mga asaynment, nagatinguha nga mangabudlay sing makugi, naghatag sa akon sing daku nga kalipay.

Sa nagligad nga walo ka tuig, nangin isa man ako ka bug-os tion nga ebanghelisador kaupod ni Tracy. Ginpakamaayo gid ako ni Jehova sa sini man nga bahin. Sa katunayan, kon kaisa ginapamangkot ko ang akon kaugalingon kon bala ginagamit ni Jehova ang akon kaluyahon nga nagaang-ang sa paghambal. Sa lima ka tawo nga pribilehiyo ko nga mabuligan nga mangin dedikado nga mga Cristiano, ang duha ang-ang maghambal.

Madumduman ko pa sing malipayon ang adlaw nga gintangdo ako sa pag-alagad subong isa ka gulang sa kongregasyon. Bisan pa nga limitado lamang ang akon ikasarang sa pagtudlo gikan sa plataporma, ginatinguhaan ko nga magkonsentrar nga buligan ang iban sing personal. Ang paghambal sing ang-ang wala maglatid sa akon ikasarang nga makapanalawsaw sa Kasulatan agod buligan ang mga katapo sang kongregasyon nga may mabug-at nga mga problema.

Sa sulod sang nagligad nga lima ka tuig, naagda ako sa paghatag sing madamong bahin sa pagpamulongpulong. Luwas sa paghatag sing pamulongpulong sa Teokratikong Eskwelahan sa Pagministro, nasarangan ko ang paghatag sing malip-ot nga mga pahibalo sa iban nga mga miting. Sing hinayhinay ang akon pagkatalunsay sa paghambal nag-uswag. Apang pagkatapos sina naglukmat ang akon pag-ang-ang sa paghambal. Nabalaka ako nga basi ‘indi na ako paghatagan sing dugang pa nga asaynment,’ apang sa akon kakibot, ang akon ngalan yara gihapon sa masunod nga iskedyul! Ang nagadumala nga manugtatap sang amon kongregasyon nagsiling nga kon mabudlayan gani ako sa pagpadayon sang akon bahin, tulukon ko lang sia kag magasaka sia sa plataporma kag buslan niya ako. Nagamit ko ining mahigugmaon nga bulig sing makaisa ukon makaduha, apang wala na ini matabo sining ulihi nga binulan. Sang nag-uswag ang akon panghambal, ginhatagan ako sing mas malawig nga mga bahin, lakip na ang mga pamulongpulong publiko. Narealisar ko lang sing bug-os ang akon pag-uswag sang ginhatagan ako sing bahin sa duha ka demonstrasyon sa isa ka sirkito nga asambleya sang mga Saksi ni Jehova sining karon lang.

Sing prangka, indi ko gid mahangpan kon ngaa nag-uswag ang akon panghambal. Isa pa, basi magalala ini liwat sa ulihi. Sa katunayan, bisan nga daw nag-uswag gid ako sa paghambal sa plataporma, nagaang-ang gihapon ako kon nagapakighambal sing personal sa mga tawo. Gani indi ini isa ka sugilanon sang kadalag-an sa kahulugan nga nalandas ko ang pag-ang-ang. Kon mag-ang-ang ako, ginapanikasugan ko nga pahanumdumon ang akon kaugalingon nga dapat ko batunon ang akon mga limitasyon kag ‘mangin maugdang sa paglakat kaupod sa Dios.’​—⁠Miqueas 6:⁠8.

Ano man ang mahanabo sa palaabuton, padayon ako nga magatinguha, nakahibalo nga sa nagapakari nga bag-ong kalibutan sang Dios, ang pag-ang-ang bug-os na nga madula. “Ang dila sang mga ang-ang,” siling sang Biblia, “mangin maabtik sa pagpamulong sing maathag nga mga butang.” Nagasalig ako nga matuman ini sa literal subong man sa espirituwal nga kahulugan kag bisan ang “apa magasinggit sa kalipay.”​—⁠Isaias 32:​4; 35:⁠6.

[Mga footnote]

[Laragway sa pahina 26]

Upod sa akon asawa, si Tracy