Gindayaw sang Ruso nga mga Peryodista ang mga Saksi ni Jehova
ANG mga pasilidad sang sanga talatapan sang mga Saksi ni Jehova sa Rusya gindedikar sang Hunyo 21, 1997. Ang pasilidad may pito ka dalayunan, isa ka daku nga Kingdom Hall, isa ka hulot kalan-an, kag isa ka daku nga tinukod para sa mga opisina kag bodega. Nahamtang ini mga 40 kilometros sa aminhan-katundan sang St. Petersburg, sa minuro sang Solnechnoye.
Ang dedikasyon nakabaton sing lapnag nga publisidad paagi sa mga dyurnalista nga gin-agda sa pagtambong. Ang isa sa ila nagsulat sa Literaturnaya gazeta sa Moscow, isa ka peryodiko nga may sirkulasyon nga 250,000: “Ang una nga impresyon sang isa nga makakita sini amo, Yari ang isa ka halimbawa sang de-kalidad nga tinukod!”—Tan-awa ang mga retrato sa pahina 16 kag 17.
Ang manunulat, si Sergey Sergiyenko, nagpaathag: “Ang tanan nga buluhaton diri ginhimo mismo sang mga tumuluo: Ang pagtukod ginhimo sang mga Pinlandes, Sweko, Olandes, Norwego, kag Aleman. Matinlo nga tisa nga mga dalan; gingaraban sing hilamon nga mga ugsaran; mga tinukod nga may matahom, tisa nga atop, dalagku nga mga bintana, kag kristal nga mga ganhaan—amo ini ang administratibo nga sentro para sa Ruso nga rehiyonal nga relihiosong organisasyon sang mga Saksi ni Jehova.”
Ang mga dyurnalista halin sa Moscow, nga mga 650 kilometros ang kalayuon gikan sa bagatnan-sidlangan sang sanga, gin-agda sa dedikasyon kag ginhatagan sing transportasyon. Gingiyahan sila sa pagpamasyar sa mga pasilidad, kag pagkatapos sadto, ginhimo ang pamangkot-kag-sabat nga sesyon, nga sa sini nga tion ginserbe ang pamahaw. Pasad sa iya mga obserbasyon, si G. Sergiyenko nagsulat:
“Ang mga Saksi, suno sa hulubaton, maugdang kag dimapakunukunuhon . . .Sa liwat nga pagprase sa bantog nga Ruso nga hulubaton, ‘Ang mga Saksi nagapuyo sa [ila puluy-an] subong nga daw sa sabak ni Jehova.’ . . . Pirme mabuot sa tanan nga tawo, ang mga Saksi ni Jehova, siempre pa, nagapakita sing pinasahi nga pag-ulikid sa ila kaugalingon nga mga kauturan.”
Ang artikulo nga ginsulat ni S. Dmitriyev nagguwa sa Moskovskaya Pravda, isa ka peryodiko nga may sirkulasyon nga halos 400,000. Sa iya artikulo nga natig-uluhan “Mahimo Kamo Makatukod Sang Inyo Kaugalingon nga Kalibutan Paagi Lamang sa Inyo mga Kamot,” ang manunulat nagpaathag:
“Pagkatapos makilala sing legal ang relihioso nga organisasyon sang mga Saksi sa Rusya [sang 1991], nag-utwas ang pamangkot may kaangtanan sa pagtukod sa ila kaugalingon nga mga ulong-talatapan. Nagapangita sila anay sing lugar malapit sa Moscow sang wala ginapaabot nila nga nabalitaan nga ang teritoryo sang anay kampo sang mga pamatan-on malapit sa St. Pete[rsburg] ginabaligya. Ang lote ginbakal, kag nagsugod sila sa pagpatindog. . . .
“Sang nagligad nga isa ka tuig kag tunga, sang Enero 1, 1996, ang sentro sa minuro sang Solnechnoye nangin opisyal nga sanga sang relihioso nga organisasyon. Sang tungatunga sang Hunyo, isa ka grupo sang mga dyurnalista sa Moscow ang nakahigayon, paagi sa paghinguyang sing pila ka tion sa St. Pete[rsburg], nga hibaluon, Sin-o bala ining mga Saksi ni Jehova?”
Ano ang sabat ni G. Dmitriyev? “Mga tawo, kaangay sang bisan sin-o nga mga tawo.” Apang, tuhay sila, subong sa ginsiling niya sa konklusion sang iya artikulo: “May paghidait sa tunga nila, paghidait sa palibot. Isa lamang bala ini ka damgo? Huo. Apang nagaluntad ini.”
Isa pa ka dyurnalista sa Moscow, si Maksim Yerofeyev, ang nagsulat para sa Sobesednik, isa ka peryodiko nga may sirkulasyon nga kapin sa 300,000, nagsiling: “Ang tanan nga relasyon sa sining diutay nga komunidad napasad sa masunod nga prinsipio: Wala sing isa nga ginapilit sa pagpangabudlay, apang ang tanan nagapangabudlay.”
Pagkatapos ilaragway ang hulot sang manughituhog sang Komite sang Sanga, nga si Vasily Kalin, si G. Yerofeyev nagsiling: “Luyag makita sang wala sing pagsalig nga kaupod namon nga mga reporter ang iban pa nga mga hulot. Ang kadakuon kag kasangkapan sang iban pa nga hulot sang mga residente wala man sing kinatuhayan sa maugdang nga pag-areglo sa hulot ni Vasily Kalin.”
Isa pa ka reporter, si Anastasiya Nemets, ang nagsulat sing artikulo “Ang Pagkabuhi nga May Kalinong sa Kaugalingon.” Ang subtitulo sa sadtong artikulo sa Vechernyaya Moskva amo ang “Amo Ini ang Ginatun-an Sang mga Tawo sa Tumalagsahon nga Minuro sa Guwa Sang St. Pete[rsburg].”
Nagalaragway sang lokasyon kag dagway sang mga pasilidad sang sanga, sia nagsulat: “Sa palibot, may mga kagulangan kag mga kahilamnan. Malapit lang ang Gulpo sang Finland. Yari diri ang matahom nga mga puluy-an nga gintukod sa Europeanhon nga estilo, ang nasilhigan sing matinlo, tisa nga mga dalan, kag ang maduagon nga kabulakan.
“Ang komersial nga mga kompanya nagapatindog sing subong sini nga diutay nga mga siudad para sa ‘manggaranon nga mga Ruso.’ Apang, kubos nga mga tawo ang nagapuyo sa sining minuro . . . Masulhay sila nga nagakabuhi, kag labi gid ka importante, nagakabuhi sila subong mga mag-abyan. May yara lamang mga 350 ka tawo diri, halin sa tanan nga pamusod sang duta; ang isa makabati sing lainlain nga mga hambal—halin sa Espanyol kag Portugues pakadto sa Olandes kag Sweko.
“Isa gid ini ka nalikupan nga komunidad: Ang minuro may kaugalingon nga pabrika kag mga duog kalay-uhan, diin posible matigayon ang tanan nga kinahanglanon sang madamo sing hambal nga pamilya; may kaugalingon pa gani sila nga klinika.”
Sa pagkamatuod, ang dedikasyon isa ka makalilipay nga okasyon nga gintambungan sang 1,492 halin sa 42 ka pungsod sa Solnechnoye. Ang madamo sang nagtambong didto mga tigulang nga nag-alagad sa sulod sang madamo nga tinuig sang ang pagbantala nga hilikuton gindumilian anay. Mahanduraw bala ninyo ang daku nga kahayanghag kag kalipay sining dumaan nga mga alagad samtang nagalagaw sila sa matahom nga mga pasilidad nga nahamtang sa sining daw hardin, 6.9 ektarya nga lugar? Halangpunon lamang nga magahunahuna sila nga sila nagadamgo lamang.
[Kapsion sa pahina 24]
Mga dyurnalista nga nagalagaw sa mga pasilidad sang sanga
Ginserbe ang pamahaw sa pamangkot kag sabat nga sesyon