Ang Himpit nga Panglawas Isa Lamang Bala Ka Damgo?
NAKAAGI ka na bala sing grabe nga balatian ukon sing delikado nga operasyon? Kon nakaagi ka na, mahimo gid nga mas daku karon ang pag-apresyar mo sa kabuhi. Apang bisan ano man ang imo pisikal nga kahimtangan, nagapati ka bala nga posible matigayon ang himpit nga panglawas? Mahimo nga daw indi ini realistiko bangod lapnag ang makapaluya nga mga balatian subong sang kanser ukon balatian sa tagipusuon. Sa pagkamatuod, kalabanan sa aton nagamasakit sa tion kag tion. Apang, indi isa ka damgo lamang ang mapagros nga panglawas.
Gintuga ang tawo agod mag-agom sing ekselente nga kapagros indi agod manikasog batok sa balatian kag kamatayon. Busa, agod dulaon ang balatian kag kamatayon, gin-aman ni Jehova ang sadsaran para sa himpit nga panglawas kag dayon nga kabuhi paagi sa halad nga gawad ni Cristo Jesus. “Ginhigugma gid sang Dios ang kalibutan sa bagay nga ginhatag niya ang iya bugtong nga Anak, agod nga ang bisan sin-o nga magpakita sing pagtuo sa iya indi mawala kundi may kabuhi nga walay katapusan.” (Juan 3:16) Ang mga mabuhi sing dayon sa bag-ong kalibutan nga ginsaad sang Dios indi manikasog batok sa maluya nga lawas ukon katigulangon. Kon amo sina, ano ang matabo sa mga balatian?
Kaumpawan Gikan sa Balatian
Ang paagi kon paano gin-ayo ni Jesucristo ang mga may balatian isa ka sulundan. Tuhoy sa sina nga mga pagpang-ayo ginsiling ini: “Ang mga bulag nakakita liwat, kag ang mga piang nagalakat, ang mga aruon nagtinlo kag ang mga bungol nakabati, kag ang mga minatay ginabanhaw, kag ang mga imol ginawalihan sing maayong balita.” (Mateo 11:3-5) Huo, ang tanan nga may balatian nga nagpalapit kay Jesus “nag-ayo.” (Mateo 14:36) Subong resulta, “natingala ang kadam-an sang nakita nila ang mga apa nga nagahambal kag ang mga piang nga nagalakat kag ang mga bulag nga nakakita, kag ginhimaya nila ang Dios sang Israel.”—Mateo 15:31.
Sa pagkamatuod, bisan pa wala sing bisan sin-o karon nga makapang-ayo kaangay sini, makasalig kita nga sa idalom sang paggahom sang Dios ang katawhan mangin himpit, naayo gikan sa tanan nga balatian sa hunahuna kag sa lawas. Ang saad sang Dios narekord sa Bugna 21:3, 4: “Yari karon! Ang kayangkayang sang Dios upod sa mga tawo, kag magapuyo sia kaupod nila, kag sila mangin iya katawhan. Kag ang Dios gid magaupod sa ila. Kag pahiran niya ang tagsa ka luha sa mga mata nila, kag wala na sing kamatayon, ukon kalisod ukon paghibi ukon kasakit pa. Ang nahaunang mga butang nagtaliwan.”
Handurawa ang isa ka kalibutan diin indi na kinahanglan ang pabrika sing bulong ukon ang mga ospital, mga pag-opera, ukon ang terapiya! Dugang pa, sa ipasag-uli nga Paraiso, wala na sing kapung-aw kag mga balatian sa hunahuna. Mangin kalahamut-an gid ang kabuhi; kag walay katubtuban ang kalipay. Sa pagkamatuod, ipasag-uli sang walay latid nga gahom sang Dios ang kapagsik sang lawas, kag dulaon sang mga benepisyo sang gawad ang makapaluya nga epekto sang sala. “Wala sing pumuluyo nga magasiling: ‘Nagamasakit ako.’ ”—Isaias 33:24.
Daw ano katahom nga paglaum—ang makaagom sing himpit nga pisikal kag espirituwal nga kapagros sa idalom sang Ginharian sang Dios! Samtang ginahuptan mo ang isa ka balanse kag makapaayo sa lawas nga estilo sang pagkabuhi karon, paabuta ang mga pagpakamaayo sa bag-ong kalibutan sang Dios. Kabay nga si Jehova ‘magabusog sang imo kabuhi sing maayo nga mga butang, kag kabay nga ang imo pagkapamatan-on padayon nga ginabag-o kaangay sang agila’!—Salmo 103:5.