Kon Ngaa Madamo ang Nagadumili sang Dugo

SA ISA ka importante nga desisyon, ginpapanabat sang korte sa Ontario ang Canadian Red Cross bangod natapikan sing HIV ang duha ka tawo nga gintayunan sing dugo—⁠sila nga duha nakabaton sing mahigko nga dugo gikan sa isa lang ka tawo. “Kon ang isa ka makahalalit nga butang subong sang mahigko nga dugo nagabutang sa katalagman sang kabuhi sang gintayunan,” siling ni Hukom Stephen Borins, “kinahanglan nga maghulag gilayon.”

Sang dekada 1980, mga 1,200 ka taga-Canada ang natapikan sang HIV, kag 12,000 pa ang natapikan sang hepatitis C⁠—⁠ang tanan bangod sang mahigko nga dugo kag mga produkto sa dugo. Agod buhinan ang kadamuon sang mga nalatnan, ang mga nagadonar ginausisa sing mas maayo. Apang indi tanan sang nagadonar ang nagasugid sing bunayag sang ila mga binuhatan sa sekso. Halimbawa, ginpakita sang isa ka surbe sa Estados Unidos nga 1 sa 50 sang nagdonar ang wala manugid sang peligruso nga mga buhat, subong sang homoseksuwal nga buhat ukon ang paghulid sa pampam.

Ang dugang pa nga problema amo ang kamatuoran nga ang pag-usisa sa dugo indi sigurado. Suno sa New Scientist nga magasin, “kon ang isa ka tawo maghatag sing dugo sing kubos sa tatlo ka semana nga natapikan sia sing HIV, ang karon nga mga pag-usisa indi makamutik sang mga kagaw. Ang mga pagtilaw sa dugo indi makamutik sang hepatitis C sa kapin sa duha ka bulan sugod sang pagkaimpeksion.”

Sining ulihi nga mga tinuig, may talalupangdon nga pagnubo sa kadamuon sang mga taga-Canada nga handa sa paghatag​—⁠ukon sa pagbaton​—⁠sing dugo. Ang kolumnista sa pamantalaan nga si Paul Schratz nagsulat: “Bangod sang pagnubo sang interes nga magdonar, kag pagdamo sang indi makadonar, salamat sa Dios nga ginpangunahan sang mga Saksi ni Jehova ang pagpanalawsaw sa mga tal-us sa dugo.”

Sing makawiwili, ang The Toronto Star nagreport nga sang nagligad nga tuig, 40 ka tawo ang “nagsulod sa ospital kag nagpakunokuno subong mga Saksi ni Jehova bangod indi nila luyag nga magpatayon sing dugo.” Ginapakita sang surbe nga mga 90 porsiento sang mga taga-Canada ang maluyag sing pila ka tal-us sa gindonar nga dugo. Busa, ang paggamit sing dugo indi na isa ka relihioso nga hulusayon lamang.