Ang Pagtamod sang Biblia
Ang Balor sang Pag-isahanon
SANG isa ka okasyon “nagtaklad [si Jesus] sa bukid sing pahain agod mangamuyo. Bisan gab-i na, isahanon lamang sia didto.” (Mateo 14:23) Sang isa pa ka okasyon, “sang adlaw na, nagguwa sia kag nagkadto sa baw-ing nga duog.” (Lucas 4:42) Ining mga kasulatan nagapakita nga nangita kag ginpabaloran ni Jesucristo ang pila ka tion sang pag-isahanon.
Ang Biblia nagahatag sing iban pa nga huwaran sang mga tawo nga, kaangay ni Jesus, nagpabalor sang pag-isahanon. Ang salmista nagpamalandong samtang nagabantay sing isahanon sa kagab-ihon tuhoy sa pagkahalangdon sang iya Dakung Manunuga. Kag tuhoy kay Jesucristo, pagkabati gid niya sing balita tuhoy sa kamatayon ni Juan Bautista, nagkadto sia sa “baw-ing nga duog agod mag-isahanon.”—Mateo 14:13; Salmo 63:6.
Sa karon, bangod sang kagamo kag kagarot sang moderno nga pagkabuhi, ang pag-isahanon, natabuan man ukon ginhungod, indi isa ka butang nga ginapakaimportante gid. Madumduman mo bala kon san-o ang katapusan nga tion nga nag-isahanon ikaw? Ang isa ka lamharon minyo nga babayi nagsiling: “Wala pa gid ako mag-isahanon sa akon kabuhi.”
Apang kinahanglanon gid bala ang pag-isahanon? Kon amo, paano magamit ang malinong nga mga tion nga mangin mapuslanon kag makapaladya? Kag ano ang papel sang pagkabalanse kon nagapangita sing higayon nga mag-isahanon?
Pag-isahanon—Ngaa Importante?
Ang Biblia nagasugid sa aton nga ang tawo anay sang Dios, si Isaac, nag-isahanon “sa latagon sa kahapunanon.” Ngaa? “Agod magpamalandong,” siling sini. (Genesis 24:63) Suno sa isa ka diksionaryo, ang pagpamalandong amo ang “paghunahuna sing maayo ukon matawhay.” “Nagapahangop [ini] sing isa ka hanuot kag malawig nga tion sang pagkonsentrar.” Para kay Isaac, nga buot na sadto magpas-an sing mabug-at nga mga responsabilidad, yadtong wala sing tublag nga pagpamalandong nakabulig sa iya nga makapamensar sing maathag, tadlungon ang iya panghunahuna, kag tulutimbangon ang mas importante nga mga butang.
Ang isa ka eksperto sa kapagros sang hunahuna nagsiling nga tubtob nga ‘ang pag-isahanon ginahuptan sing nagakaigo, nagabulig ini agod matadlong ang aton hunahuna, kag makakonsentrar sing mas maayo.’ Madamo ang makapamatuod nga makapapagsik ini, makapabakod, kag maayo.
Lakip sa maayo nga mga resulta sang pagpamalandong amo ang masangkad nga panghunahuna kag pagkakalmado, mga kinaiya nga mapuslanon sa mahalungon nga panghambal kag mga buhat, nga nagaresulta man sa maayo nga mga kaangtanan sa tawo. Halimbawa, ang isa ka tawo nga makahibalo magpamalandong makahibalo man kon san-o dapat maghipos. Sa baylo nga maghambal sing padasudaso, ginabinagbinag niya sing abanse ang mahimo nga epekto sang iya mga pulong. “Nakakita ka bala sing tawo nga dasudaso sa iya mga pulong?” pamangkot sang gin-inspirar nga manunulat sang Biblia. Nagpadayon sia sa pagsiling: “May labi pa nga paglaum sa isa nga buangbuang sangsa iya.” (Hulubaton 29:20) Ano ang remedyo sa sining walay patugsiling nga paggamit sang dila? Ang Biblia nagasiling: “Ang tagipusuon sang matarong nagapamalandong agod makasabat.”—Hulubaton 15:28; ipaanggid ang Salmo 49:3.
Para sa Cristiano, ang malinong nga pagpamalandong kon nagaisahanon isa ka importante nga butang sa pagtubo sa espirituwal nga pagkahamtong. Nagakaigo gid ang pinamulong ni apostol Pablo: “Painoinohi ining mga butang; ukuri ini, agod ang imo pag-uswag makit-an sang tanan nga tawo.”—1 Timoteo 4:15.
Gamita ang Pag-isahanon Agod Magsuod Pa sa Dios
Ang isa ka Ingles nga awtor nagsiling: “Ang pag-isahanon nagatugot sa aton nga magdangop sa Dios sa pangamuyo kag mabatian niya.” Kon kaisa, nabatyagan ni Jesus ang kinahanglanon nga magpalayo sa iya mga isigkatawo kag magpangamuyo sa Dios nga nagaisahanon. Ang isa ka halimbawa sini ginalaragway sa Biblia: “Temprano sa kaagahon, samtang madulom pa, nagbangon sia kag nagguwa kag nagkadto sa baw-ing nga duog, kag didto nagpangamuyo sia.”—Marcos 1:35.
Sulitsulit nga ginapatuhuyan sang mga Salmo ang pagpamalandong may kaangtanan sa Dios. Nagapatuhoy kay Jehova, si Hari David nagsiling: “Nagapamalandong ako sa imo.” Kaanggid man sini ang mga pinamulong ni Asaf: “Pamalandungan ko gid ang tanan mo nga binuhatan, kag painoinohan ang imo mga pagpakig-angot.” (Salmo 63:6; 77:12) Busa, ang pagpamalandong sa mga kinaiya kag mga pagpakig-angot sang Dios nagadala sing madamo nga padya. Nagapauswag ini sang apresasyon sa Dios, nagabulig sa isa nga magsuod pa sa iya.—Santiago 4:8.
Ang Pagkahaganhagan Kinahanglanon
Sa pagkamatuod, ang pag-isahanon dapat himuon sing haganhagan. Ang pag-isahanon mahimo ilaragway subong isa ka makapaladya nga duog nga pamasyaran apang isa ka makatalagam nga duog nga teneran. Ang sobra nga pagpain sang kaugalingon nagasumpakil sa sadsaran nga mga kinahanglanon sang tawo sa pagpakig-upod, pagpakig-angot, kag pagpahayag sing gugma. Dugang pa, ang pagpain sang kaugalingon kaangay sa isa ka duta nga ginatubuan sang gamhon sang kabuangan kag kakagod. Ang hulubaton sa Biblia nagapaandam: “Ang isa nga nagapain sang iya kaugalingon magapangita sang iya makagod nga handum; magapamatok sia sa tanan praktikal nga kaalam.” (Hulubaton 18:1) Agod mangin timbang sa pagpangita sing higayon nga mag-isahanon, dapat naton kilalahon ang katalagman sang pagpain sang kaugalingon.
Kaangay ni Jesus kag sang iban pa espirituwal nga mga tawo sang panahon sang Biblia, ginapakabahandi sang mga Cristiano karon ang ila tion sang pag-isahanon. Matuod, bangod sang madamo kaayo nga responsabilidad kag ginakabalak-an, mabudlay makakita sing tion kag higayon nga makapamalandong sing isahanon. Apang, kaangay sang tanan nga butang nga may matuod nga balor, dapat naton baklon “ang nagakaigo nga tion.” (Efeso 5:15, 16) Nian, kaangay sa salmista, makasiling kita: “Kabay nga ang mga pulong sang akon baba kag ang pagpamalandong sang akon tagipusuon mangin kalahamut-an sa imo, O Jehova.”—Salmo 19:14.