Ang Pagtamod sang Biblia

Ano ang Balaan nga Espiritu sang Dios?

“karon sang nabawtismuhan ang tanan nga katawhan, si jesus ginbawtismuhan man kag, samtang nagapangamuyo sia, ang langit nagbukas kag ang balaan nga espiritu sa dagway nga lawasnon subong sang salampati nagkunsad sa iya, kag nagguwa ang tingog gikan sa langit: ‘ikaw ang akon anak, ang hinigugma; sa imo nahamuot ako.’ ”—Lucas 3:21, 22.

SA isa ka pamulongpulong sa isa ka grupo sang mga pilosopo sa dumaan nga Gresya, gintawag ni apostol Pablo ang Dios subong ang “Ginuo sang langit kag duta.” Amo ini ang Dios, siling ni Pablo, “nga naghimo sang kalibutan kag sang tanan nga butang sa sini” kag “nagahatag sa tanan nga persona sing kabuhi kag sing ginhawa kag sing tanan nga butang.” (Binuhatan 17:24-28) Paano ginhimo sang Dios ini tanan? Paagi sa iya balaan nga espiritu, ukon aktibo nga puwersa.

Ginpaathag man sang Biblia nga ang Dios may “bugana dinamiko nga kusog, kag gamhanan.” (Isaias 40:26) Huo, gintuga sang Dios ang bug-os nga uniberso, nga nagapakita sang iya dinamiko nga kusog kag gahom.

Nagapanghikot nga Puwersa

Indi sibu isiling nga ang balaan nga espiritu amo ang gahom sang Dios. Ini bangod ang puwersa sarang magpabilin, ukon diaktibo nga magpuyo, sa isa ka tawo ukon isa ka butang, subong sang puwersa nga yara sa puno apang wala ginagamit nga baterya. Apang, ginapaathag sang Kasulatan ang espiritu sang Dios subong nga nagapanghikot, kaangay sang koryente nga nagalatay halin sa ginagamit nga baterya. (Genesis 1:2) Sa amo, ang balaan nga espiritu amo ang iya buhi nga kusog, ang iya aktibo nga puwersa.

Kon kaisa ang Biblia nagahambal tuhoy sa balaan nga espiritu nga nagahimo sang isa ka hilikuton ukon yara sa lain nga duog gikan sa Dios. (Mateo 28:19, 20; Lucas 3:21, 22; Binuhatan 8:39; 13:4; 15:28, 29) Ang iban nga nakabasa sini nga dinalan naghangop nga ang balaan nga espiritu may kaugalingon nga personalidad nga tuhay sa Dios. Ngaa gingamit ini nga tinaga sa Kasulatan? Ang balaan nga espiritu bala isa ka tuhay nga persona sangsa Dios?

Ang Labing Gamhanan nga Dios nagaluntad sing tuhay gid sa iya pisikal nga mga tinuga. Isa sia ka espiritu, indi makit-an sang aton limitado nga panulok. (Juan 4:24) Ang Biblia nagasiling nga si Jehova nga Dios nagapuyo sa mga langit kag gikan didto ginatan-aw niya ang katawhan. (Salmo 33:13, 14) Mahangpan ini. Ang Manunuga mas daku gid sangsa mga butang nga iya ginhimo. Sia ang ila agalon, ginamaniobra ini, ginaporma ini, kag ginakontrol.—Genesis 1:1.

Gikan sa iya dikitaon nga ginapuy-an, sarang mapahanabo sang Dios ang mga butang bisan san-o kag bisan diin. Sa amo, indi kinahanglan nga didto sia sa isa ka duog diin nagapanghikot ang iya aktibo nga puwersa. Sarang niya mapadala ang iya espiritu sa paghimo sang isa ka hilikuton. (Salmo 104:30) Mahimo nga madali ini mahangpan sang mga tawo sa moderno nga tion nga nagapaandar sing mga galamiton sa sulod sang puluy-an paagi sa wireless nga remote control. Sa karon nahibaluan naton ang puwersa sang dikitaon nga mga puwersa subong sang elektrisidad ukon sang mga infrared wave. Sing kaanggid, paagi sa iya dikitaon nga balaan nga puwersa, ukon espiritu, mahimo sang Dios ang bisan ano nga ginatuyo niya nga himuon, nga wala nagasaylo sa lainlain nga duog.—Isaias 55:11.

Sang panahon sang Biblia mahimo mabudlay mahangpan ini nga ideya. Ang paglaragway sa balaan nga espiritu subong tuhay nga puwersa pat-od nga makabulig sa mga bumalasa nga mahangpon kon paano ginagamit sang Dios ang iya gahom bisan nga wala sia sa duog nga nagapanghikot ini. Kon ginapatuhuyan sang Biblia ang balaan nga espiritu nga nagahimo sini ukon sina, nagakahulugan ini nga ginpadala ukon ginhatag sang Dios ang iya gahom sa mga tawo ukon mga butang agod himuon ang iya kabubut-on.

Ang Lainlain nga mga Pagpanghikot Sang Balaan nga Espiritu

Gingamit ni Jehova ang balaan nga espiritu sa pagtuga sa may kabuhi kag wala sing kabuhi nga mga butang. (Salmo 33:6) Gingamit man ini sang Dios sa paglaglag sa masingki kag dimahinulsulon nga kaliwatan sang katawhan paagi sa anaw. (Genesis 6:1-22) Ini man nga aktibo nga puwersa ang gingamit sang Dios agod sayluhon ang hamili nga kabuhi sang iya Anak sa taguangkon sang Judiyo nga ulay nga si Maria.—Lucas 1:35.

Kon kaisa, ginahatagan sang espiritu sing gahom ang mga lalaki agod maghambal sing masidla kag sing maisugon sa atubangan sang mga kaaway, sa masami sa atubangan sing katalagman sa ila kabuhi. (Miqueas 3:8) Kag may madamo nga hitabo sa Biblia, ilabi na may kaangtanan sa tagna, diin ang mga lalaki kag mga babayi ginhatagan sing pinasahi nga paghantop ukon paghangop paagi sini nga puwersa. Sanglit wala sing tawo ang sibu nga makatagna sang yara sa palaabuton, isa ini ka talalupangdon nga pagpanghikot sang espiritu.—2 Pedro 1:20, 21.

Ang espiritu sarang man makahatag sa mga indibiduwal sing milagruso nga mga gahom. Halimbawa, paagi sining puwersa, nakontrol ni Jesus ang puwersa sang kinaugali, nagpaayo sing mga balatian, kag nagbanhaw pa gani sing patay. (Lucas 4:18-21; 8:22-26, 49-56; 9:11) Ang espiritu man ang gingamit sa pag-organisar kag pagpahulag sa una nga mga Cristiano sa pag-alagad subong mga saksi sang Dios sa bug-os nga duta.—Binuhatan 1:8; 2:1-47; Roma 15:18, 19; 1 Corinto 12:4-11.

Ang Gahom Sang Dios Gingamit Tungod sa Aton

Posible bala sa tawhanon nga mga alagad sang Dios karon nga makatigayon sining walay latid nga ginahalinan sang enerhiya? Huo! Ginahatagan sang Dios sang balaan nga espiritu ang iya katawhan agod buligan sila nga mahangpan kag mahimo ang iya kabubut-on. Ginahatag niya ang iya espiritu sa sadtong sinsero, mapinangamuyuon nga nagapangabay, may matarong nga motibo, kag nagasunod sang iya mga ginapatuman. (1 Corinto 2:10-16) Ina nga espiritu makasangkap sa dihimpit nga katawhan sing “gahom nga labaw sa kinaandan,” nga nagabulig sa ila sa pag-alagad sa Dios sing matutom walay sapayan sing mga balagbag. Sing pat-od, nian, ginahandum sang tanan mahinadlukon sa Dios nga katawhan nga makabaton kag mahuptan ang espiritu sang Dios.—2 Corinto 4:7; Lucas 11:13; Binuhatan 15:8; Efeso 4:30.

Sa indi madugay gamiton sang Dios ining dinamiko nga puwersa sa pagdula sa inhustisya kag pag-antos sa sining malaut nga kalibutan, sa amo ginahimaya ang iya daku kag balaan nga ngalan. Ang balaan nga espiritu makaapektar sing maayo sa bug-os nga kalibutan, kag ang mga bunga sini makit-an sang tanan, nga nagahimaya sa Manunuga sini.—Galacia 5:22, 23; Bugna 21:3, 4.