Mga Manugpahidait Ukon mga Manugpaaway?
“INDI dapat magpakigbahin sa inaway ang isa ka Cristiano.” Ginatingob sina nga dinalan ang pagtamod sang dumaan nga mga Cristiano sa inaway, siling nanday Thoko kag Malusi Mpulwana sa Echoes, magasin nga ginbalhag sang World Council of Churches (WCC). “Sa tapos [lamang] nakig-alyansa ang Cristianong Simbahan sa pulitika,” dugang nila, nga ang simbahan nag-ugyon nga “batunon ang pagkakinahanglanon sang inaway.” Ang resulta? Ang pagsakdag sang Cristiandad sa inaway sa tanan nga dag-on nangin tuman kalaut nga sa tapos sang ikaduhang inaway kalibutanon, ang United Church of Christ sa Japan nagbatyag nga kinahanglan magpadala sing opisyal nga “Pagkumpisar Sang Salabton sa Inaway Kalibutanon II.”
Sa karon, mga 50 ka tuig sa tapos sang inaway, ang maawayon nga tindog sang Cristiandad nagbalhin diutay. “Kon mamangkot kita kon bala subong mga Cristiano nagsiling gid kita sing malig-on kag kumbinsido nga Indi sa pagpakamatarong sang inaway kag Huo sa gugma ni Cristo,” siling ni Dr. Roger Williamson, nga nagapangabudlay para sa Church of England, “maathag nga kita . . . madamo pa sing dapat ikumpisar.” Bisan pa nga gindeklarar sang WCC sang 1948 nga ang “inaway subong paagi sa paglubad sa sinuay wala nahisanto sa panudlo kag halimbawa sang aton Ginuong Jesucristo,” ang mga simbahan sang Cristiandad, siling ni Williamson, masami nga nagaamot sa “pagkapanatiko, pagkadimatinuguton, paglimite sa tawhanon nga kahilwayan kag pagpalala sa mga inaway.” Indi katingalahan nga nagahinakop sia nga “ang relihion . . . masami nga nagapalala sa baylo nga nagatapos sang inaway.”
Ang inaway nga nagbahinbahin sang anay Yugoslavia isa ka nagakaigo nga halimbawa. Walay sapayan sang tinuig na nga inhustisya kag kapintas, nabudlayan gid ang mga simbahan nga maghiusa nahanungod sa inaway sa sina nga pungsod. Ngaa? Nagasiling si Dr. Williamson nga walay sapayan sang ila kuntani Cristianong higot, ang Serbian kag Croatian nga klero nabahinbahin subong sang mga pulitiko sang ila pungsod. Bisan diin, ang klero sang Cristiandad, Katoliko man, Ortodokso, ukon Protestante, indi mga manugpahidait kundi “mga pari nga may ginadampigan.” Bisan kapin na sa 300 ka simbahan ang miembro sang WCC, ginabaton ni Dr. Williamson nga “mabudlay makakita sing mga simbahan nga nagapaluntad sang . . . paghidait.”
Mabudlay, huo. Apang indi kaangay sang miembro nga mga simbahan sang WCC, nga nagahambal lang tuhoy sa liwat nga paghangpanay, may isa ka relihion nga nagmadinalag-on sa pagpahiusa sa mga miembro anay sang lainlain nga mga relihion kag nagabulig sa ila nga mangin matuod nga mga Cristiano. Sa karon, ginapahulag sang ila gugma sa Dios kag sang ila handum nga “makighidait sa tanan nga tawo,” sa 233 ka kadutaan ang kapin sa 5.8 ka milyon nga mga Saksi ni Jehova nagadumili sa pagpakigbahin sa mga inaway sang mga pungsod—ayhan sa Asia, Latin nga Amerika, Natung-an nga Sidlangan, Naaminhan nga Ireland, Rwanda, ukon sa anay Yugoslavia. (Hebreo 12:14; Mateo 22:36-38) Sa baylo, ginatuman nila ang tagna sang Biblia paagi sa ‘pagsalsal sang ila mga espada nga mga punta sang arado’ kag ‘indi na magtuon sang inaway.’—Miqueas 4:3.
[Mga Laragway sa pahina 31]
Pila sang mga Saksi ni Jehova sa Aprika ang ginsakit sing tama bangod sang ila neutralidad ukon nangin mga refugee