Ang Pagtamod sang Biblia

Ang Relihioso nga Paghiusa sa Pag-asawahay—Kon Ngaa Importante

ANG isa ka pamilya nagapungko agod manihapon. Samtang nagabungat sing pangamuyo ang amay, ang iloy nagapangamuyo sing mahipos sa lain nga dios. Sa isa pa ka pamilya ang asawa nagasimba sa isa ka simbahan, apang ang iya bana nagatambong sa isa ka sinagoga. May mga pamilya nga ginatudluan sang isa ka ginikanan ang kabataan tuhoy kay Santa Claus, samtang ginasugiran naman sila sang isa pa tuhoy sa Hanukkah.

Suno sa karon lang nga mga pagtuon, ini nga mga danyag nangin kinaandan samtang mas madamo nga tawo ang nagaminyo sa guwa sang ila relihion. Ginapakita sang isa ka surbe nga sa Estados Unidos, 21 porsiento sang mga Katoliko ang nagaminyo karon sa guwa sang ila relihion; sa mga Mormon ang kadamuon 30 porsiento; sa mga Muslim, 40 porsiento; kag sa mga Judiyo, kapin sa 50 porsiento. Bangod sang siniglo nga relihiosong pagdinumtanay, ginatamod sang iban ang pagminyo sa mga tawo nga tuhay sing relihion subong isa ka kadalag-an batok sa pagkapanatiko. Ang isa ka kolumnista sa pamantalaan nagsulat: “Ang bisan ano nga sahi sang pagminyo sang mga tawo nga magkatuhay sing relihion dapat ikalipay.” Amo bala ini ang pagtamod sang Biblia?

Dapat talupangdon nga wala ginasakdag sang Biblia ang pagpasulabi sa rasa ukon etniko nga grupo. Ginapadaku sang Pulong sang Dios ang indi pagpasulabi sa rasa. Si apostol Pedro maathag nga nagpamulong tuhoy sini nga punto: “Pat-od nga nahantop ko nga ang Dios wala sing ginapasulabi, apang sa tagsa ka pungsod ang tawo nga nagakahadlok sa iya kag nagahimo sing pagkamatarong kalahamut-an sa iya.” (Binuhatan 10:34, 35) Sa sini man nga tion, ginatudlo sang Biblia nga ang matuod nga sumilimba ni Jehova dapat magminyo “lamang sa Ginuo.” (1 Corinto 7:39) Ngaa?

Ang Katuyuan Sang Pag-asawahay

Gintuyo sang Dios ang pag-asawahay nga mangin suod gid. (Genesis 2:24) Sa pagtukod sang kahimusan sa pag-asawahay, indi lamang ang pag-upuray ang ginhunahuna sang Dios. Sang ginhatag ni Jehova sa nahaunang mag-asawa ang hilikuton nga saguron ang mga kabataan kag atipanon ang ila dutan-on nga puluy-an, ginpakita niya nga dapat sila magkaupod nga magpangabudlay sing suod sa pagtuman sang iya kabubut-on. (Genesis 1:28) Paagi sa pagbuligay nga alagaron ang Dios sa sini nga bahin, ang lalaki kag babayi magaagom, indi lamang sing pag-updanay, kundi sing suod kag mapinadayunon nga pagsosyohanay.—Ipaanggid ang Malaquias 2:14.

Ginpatuhuyan ni Jesus ini nga pagsosyohanay sang ginsiling niya ang bantog nga pinamulong: “Indi na sila duha, kundi isa ka unod. Busa, ang gintingob sang Dios dili pagbulagon sang tawo.” (Mateo 19:6) Gingamit ni Jesus ang nagapaanggid nga lenguahe sa pagpaanggid sang pag-asawahay sa gota nga nagatabid sa duha ka ginakargahan nga mga sapat sa pagguyod ukon sa pagsaylo sing pareho nga lulan. Handurawa lamang ang kahuol sa duha ka nagotahan nga sapat nga nagabutungay sa magkatuhay nga direksion! Sing kaanggid, mahimo nga ginapabug-atan sang mga nagaminyo sa guwa sang matuod nga relihion ang ila kaugalingon sa pagkabuhi suno sa mga prinsipio sang Biblia samtang nagapamatok ang tiayon. Sing nagakaigo, ang Biblia nagasiling: “Dili kamo magpagota sing sampihakan upod sa mga dimatinuuhon.”—2 Corinto 6:14.

Maayo Pa nga Pag-asawahay

Ang paghiusa sa matuod nga pagsimba makapabakod sing daku sa pag-asawahay. Ang isa ka manunulat nagkomento: “Ang pagsimba sing tingob isa sang daku nga mga kinaiya sang maayo, malipayon nga mga pamilya.” Ang Manugwali 4:9, 10 nagasiling: “Ang duha maayo pa sa isa, bangod may maayo sila nga padya tungod sang ila lakas nga pagpangabudlay. Kay kon ang isa sa ila mapukan, ang isa magabayaw sang iya kaupod.”

Kon ginasentro nila ang ila kabuhi sa ila pagsimba, ang isa ka Cristianong mag-asawa nahiusa indi lamang sa pisikal kundi sa espirituwal man. Samtang nagapangamuyo sila sing magkaupod, nagatuon sang Pulong sang Dios sing magkaupod, nagatipon upod sa mga masigka-Cristiano, kag nagasugid sang ila pagtuo sa iban, nagahimo sila sing espirituwal nga higot nga nagapasuod sing labi sang ila pag-asawahay. Ang isa ka Cristianong babayi nagkomento: “Ang matuod nga pagsimba isa ka dalanon sang kabuhi. Indi ko mahanduraw nga pilion nga pamanahon ang isa nga indi pareho sing basihan kon sin-o kag kon ano ako.”—Ipaanggid ang Marcos 3:35.

Ang mga nagaminyo “sa Ginuo” makapaabot nga ginailog sang ila mga tiayon ang paggawi ni Jesus. Dapat tamdon sang Cristianong mga bana ang ila mga asawa subong sang mahigugmaon nga pagtamod ni Jesus sa kongregasyon. Dapat tamdon sang Cristianong mga asawa ang ila mga bana nga may pagtahod. (1 Corinto 11:3; Efeso 5:25, 29, 33) Ginahimo ini sang mga Cristiano bangod sang handum nga indi lamang pahamut-an ang ila mga tiayon kundi pahamut-an ang Dios, nga magapapanabat sa mga magtiayon kon paano nila ginatamod ang kada isa.—Malaquias 2:13, 14; 1 Pedro 3:1-7.

Ang pagsunod sa pareho nga hubon sang mga pagtuluuhan nagabulig man sa Cristianong mga mag-asawa nga lubaron sing mahidaiton ang mga di-paghangpanay. Ginalaygayan sang Biblia ang mga Cristiano nga magpabilin nga natuon, “indi sa personal nga interes sang [ila] kaugalingon lamang nga mga butang, kundi sa personal man nga interes sang iban.” (Filipos 2:4) Walay sapayan sang personal nga mga luyag, ang mga tiayon nga nahiusa sa pagtuo nagadangop sa Pulong sang Dios subong ang awtoridad nila nga duha sa paglubad sa bisan ano man nga di-paghangpanay. (2 Timoteo 3:16, 17) Sa sining paagi ginasunod nila ang laygay sang Biblia para sa mga Cristiano nga mangin ‘isa sing painuino.’—1 Corinto 1:10; 2 Corinto 13:11; Filipos 4:2.

Pagkaganyat kag Pagkapareho Sing Prinsipio

Matuod, indi lamang ang pagkapareho sing pagtuo ang binagbinagon sa isa ka relasyon. Ang pagkaganyat sang duha isa man nga dapat binagbinagon. (Ambahanon ni Solomon 3:5; 4:7, 9; 5:10) Apang agod magdugay ang pag-asawahay, ang magkapareho nga mga prinsipio kinahanglanon. Suno sa libro nga Are You the One for Me? “ang mga mag-asawa nga pareho sing mga prinsipio mas daku ang tsansa nga mangin malipayon, nahiusa, kag mapinadayunon ang relasyon.”

Sing makapasubo, mahatagan lamang sing igtalupangod sang mga tawo nga naganyat sa isa kag isa ang daku nga mga kinatuhayan pagkatapos sang kasal. Sa pagpaanggid, handurawa ang pagbakal sing balay bangod lamang naluyagan mo ang hitsura sini. Apang, pagkatapos lamang nga makasaylo ka nga mahibaluan mo nga ang pundasyon indi gali malig-on. Bangod indi malig-on ang pundasyon, ang tanan nga matahom nga bahin sang balay mangin walay pulos. Sing kaanggid, ang isa mahimo maganyat sa isa ka tawo nga tuhay sing pagtuo nga daw magkabagay—apang pagkatapos sang kasal ang relasyon mahimo nga may daku gali nga diperensia.

Binagbinaga ang pila ka mabudlay nga mga problema nga mahimo magautwas sa ulihi sa magkatuhay sing relihion nga mga pag-asawahay: Diin magasimba ang pamilya? Anong relihioso nga paghanas ang batunon sang kabataan? Diin nga relihion ang suportahan sa pinansial sang pamilya? Magainsister bala ang isa ka tiayon nga saulugon ang relihioso nga mga kinabatasan kag selebrasyon nga ginakabig sang isa pa nga pagano? (Isaias 52:11) Ang tagsa ka pag-asawahay nagakinahanglan sa kada isa nga maghimo sing makatarunganon nga mga pagpasibu; apang, ang pagkompromiso sa mga prinsipio sang Biblia—bisan agod amligan ang pag-asawahay—indi kalahamut-an sa Dios.—Ipaanggid ang Deuteronomio 7:3, 4; Nehemias 13:26, 27.

Agod mahuptan ang kalinong sa pag-asawahay, ang pila ka mag-asawa sa nabahinbahin sa relihion nga mga pag-asawahay nagabuhat sang ila mga pagtuluuhan sing hilway. Apang, sing makapasubo, ang pagsimba sing hilway nagatuga sing espirituwal nga pagkawalay-unod sa pag-asawahay. Ang isa ka Cristiano nga babayi nga nagminyo sa lalaki nga indi pareho sa iya relihion nagsaysay: “Bisan pa 40 ka tuig na kami nga nag-asawahay, indi pa ako kilala sing maayo sang akon bana.” Ang Dios naman ang sentro sang pag-asawahay sang mag-asawa nga nagasimba “sa espiritu kag kamatuoran.” Subong sang mabinalaybayon nga ginasiling sang Biblia, “ang lubid nga tatlo ka dupli indi gilayon mabugto.”—Juan 4:23, 24; Manugwali 4:12.

Kamusta Naman ang mga Kabataan?

Ang iban nga nagahunahuna sa pagminyo sa isa nga tuhay sing relihion mahimo maghunahuna nga tudluan nila ang ila mga kabataan sang duha ka relihion kag pabay-an ang mga kabataan sa pagpili. Matuod, ang mga ginikanan lunsay may legal kag moral nga kinamatarong sa paghatag sing relihioso nga paghanas, kag sa ulihi, ang mga kabataan ang magahimo sang ila kaugalingon nga desisyon.a

Ginatudluan sang Biblia ang mga kabataan nga tumanon ang duha ka ginikanan nga “may paghiusa sa Ginuo.” (Efeso 6:1) Ang Hulubaton 6:20 nagasiling sini sa sining paagi: “Tumana, O anak ko, ang sugo sang imo amay, kag indi pag-isikway ang kasuguan sang imo iloy.” Sa baylo nga madayag sa magkatuhay nga mga doktrina, ang mga kabataan nga ginpadaku sang duha ka ginikanan nga pareho sing pagtuluuhan nahiusa sa ginatawag sang Biblia nga “isa ka Ginuo, isa ka pagtuo, isa ka bawtismo.”—Efeso 4:5; Deuteronomio 11:19.

Matuod Gid nga “sa Ginuo”

Kon ang magkapareho nga mga prinsipio isa ka yabi sa madinalag-on nga pag-asawahay, maalamon bala nga magminyo kay bisan sin-o lang nga nagapangangkon nga Cristiano? Ang Biblia nagasabat: “Sia nga nagasiling nga nagapabilin sia nga nahiusa upod [kay Jesus] yara man mismo sa idalom sang obligasyon nga magpadayon sa paglakat subong sang paglakat sinang isa.” (1 Juan 2:6) Kon amo, ang Cristiano nga nagahunahuna sa pagminyo magapangita sing masigka-Cristiano nga nagapanikasog gid nga sundon si Jesus. Ang subong sini nga palaabuton nga tiayon dapat nagdedikar sang iya kabuhi sa Dios kag nabawtismuhan na. Ginailog niya ang mahigugmaon nga personalidad ni Jesus kag ang iya makugi nga pagbantala sing Ginharian sang Dios. Kaangay ni Jesus, ginasentro niya ang iya kabuhi sa paghimo sang kabubut-on sang Dios.—Mateo 6:33; 16:24; Lucas 8:1; Juan 18:37.

Paagi sa mapailubon nga paghulat sa nagakabagay nga kaupod sa sulod sang pamilya sang mga sumilimba sang Dios, ang mga nagahunahuna sa pagminyo nagapahamtang sing isa ka sulundan nga unahon ang Dios sa ila kabuhi. Ini nga sulundan magaamot sa ulihi sa mas malipayon, mas makaalayaw nga pag-asawahay.—Manugwali 7:8; Isaias 48:17, 18.

[Footnote]

[Kahon sa pahina 20]

Bulig Para sa Nabahinbahin sa Relihion nga mga Pamilya

Bangod sang nanuhaytuhay nga mga rason madamong mag-asawa sa karon ang nabahinbahin sa relihion. Ang pila ka indibiduwal mahimo nga nagpili sing tiayon nga tuhay ang relihion. Apang madamong mag-asawa ang nagsugod nga magkapareho sing relihion kag sang ulihi nabahinbahin sa relihion sang ginpili sang isa ka tiayon ang lain nga porma sang pagsimba. May iban pa nga mga sirkunstansia nga mahimo nagpaluntad sing relihioso nga pagbinahinbahin sa pamilya. Apang, walay sapayan sang mga kabangdanan, ang sumpaanay sa pag-asawahay indi dapat pagbugtuon ukon pagpakadiutayon bangod lamang nga indi maghisugtanay ang mga magtiayon tuhoy sa pagpili sing relihion. Ginapadunggan sang Biblia ang pagkabalaan kag pagkapermanente sang pag-asawahay, bisan pa nga ang mga tiayon wala nahiusa sa pagsimba. (1 Pedro 3:1, 2) Si apostol Pablo nagsulat: “Kon ang bisan sin-o nga utod nga lalaki may ditumuluo nga asawa, apang nagapasugot sa pagpuyo upod sa iya, dili niya sia pagbayaan.” (1 Corinto 7:12) Kon ginaaplikar, ang mga prinsipio nga masapwan sa Biblia makabulig kay bisan sin-o nga mag-asawa nga maagom ang kalinong sa isa ka mahigugmaon kag matinahuron nga relasyon.—Efeso 5:28-33; Colosas 3:12-14; Tito 2:4, 5; 1 Pedro 3:7-9.