Wala Amay nga mga Pamilya—Isa ka Tanda sang mga Tion
ANO ang masiling mo nga labing talalupangdon nga problema sa katilingban karon? Halos 80 porsiento sang mga ginsurbe sang Gallup sa Estados Unidos, ang nagapati nga ini amo “ang pisikal nga pagkawala sing amay sa balay.” Suno sa Gallup, kapin sa 27 milyones ka kabataan sa Estados Unidos ang nagakabuhi nga nahilayo sa ila biolohiko nga mga amay, kag ina nga kadamuon madasig nga nagadugang. Ang isa ka report sang United Nations Children’s Fund nagasiling nga mga 50 porsiento sang puti nga kabataan nga natawo sa Estados Unidos sugod sang 1980 ang “magahinguyang sang pila ka bahin sang ila pagkabata sa solo-sing-ginikanan nga pamilya. Para sa itom nga mga kabataan ang proporsion mga 80%.” Busa ginatawag sang USA Today ang Estados Unidos nga “nagapanguna sa bug-os kalibutan sa mga pamilya nga wala sing mga amay.”
Apang, ang isa ka artikulo sa The Atlantic Monthly nagsiling: “Ang pagdugang sang kagamo sa pamilya indi pinasahi sa Amerikano nga katilingban. Makita ini sa halos tanan mainuswagon nga mga pungsod, lakip ang Japan.” Kag bisan pa mabudlay matigayon ang mga estadistika, madamong imol nga pungsod ang daw nagaatubang sing amo man nga problema. Suno sa magasin nga World Watch, “ang mga kalalakin-an [sa imol nga mga pungsod] masunson nga nagabiya sang ila mga asawa kag mga kabataan bangod sang nagadugang nga mga pag-ipit sa pangabuhi.” Sa katunayan, ginpakita sang surbe sa isa ka pungsod sa Caribeano nga 22 porsiento lamang sang mga amay nga may otso-anyos nga kabataan ang aktuwal nga nagapuyo upod sa ila kabataan.
Ang wala amay nga kabataan kinaandan na bisan pa sang panahon sang Biblia. (Deuteronomio 27:19; Salmo 94:6) Apang, sadto anay, ang panguna nga rason kon ngaa nangin wala amay ang mga kabataan amo ang pagkapatay sang ila amay. “Sa karon,” siling sang manunulat nga si David Blankenhorn, “ang panguna nga rason kon ngaa wala sing amay amo ang pagbiya sang amay.” Sa pagkamatuod, subong sang makita naton, ang pagdamo sang mga kabataan nga wala sing amay nagapamatuod nga ang madamo nga tawo karon wala sing “kinaugali nga pagpalangga.” Suno sa Biblia, isa lamang ini sa dugang pa nga pamatuod nga nagakabuhi na kita sa “katapusan nga mga adlaw.”—2 Timoteo 3:1-3.
Apang, para sa lamharon nga mga kabataan, ang pagkadula sang isa ka amay sa ila kabuhi isa ka personal nga trahedya. Ginasugdan sini ang isa ka siklo sang kasakit kag kasubo nga may madugay nga mga resulta. Busa, sa sining serye binagbinagon naton ini nga siklo, indi agod mahanusbo ang mga bumalasa, kundi agod maghatag sing impormasyon nga makabulig sa mga pamilya nga mapadulog ining malaglagon nga huyog.