Isa ka Tumalagsahon nga Patyo

SANG KORESPONSAL SANG MAGMATA! SA ECUADOR

SA BANWA sang Ibarra, aminhan sang Quito, ang kapital nga siudad sang Ecuador, may isa ka pinasahi nga patyo​—⁠el cementerio de los pobres (ang Patyo Sang mga Imol). Ngaa tumalagsahon ini? Ang ginpinta nga mga larawan sa pader sa guwa amo ang ginpadakuan nga mga bersion sang mga larawan nga direkta nga ginkuha sa mga publikasyon sang Watch Tower Society!a Ang larawan sa tunga isa ka paglaragway kay apostol Juan, nga ginkuha sa pahina 7 sang libro nga Revelation—Its Grand Climax At Hand! Sa ibabaw ni Juan, sa Espanyol, amo ang teksto: “Ang Ginharian sang Dios nagakahulugan sing pagkamatarong kag paghidait kag kalipay. Roma 14:17.” Sa wala amo ang mga pulong sang Mateo 11:28: “Kari sa akon, kamo tanan nga ginabudlayan kag ginabug-atan, kag papahuwayon ko kamo,” nga ginkuha sa New World Translation. Pat-od gid nga ining pader sang patyo nagatuytoy sa mga tawo sa Pulong sang Dios.

[Footnote]