“Ang Pinakamalipayon nga Adlaw sa Amon Kabuhi”
ANG kasal isa ka makalilipay nga okasyon. Madamong mag-asawa ang nagsiling: “Amo yadto ang pinakamalipayon nga adlaw sa amon kabuhi.” Apang mahimo man ini mangin isa sang pinakamabudlay. Ang kalaslon kag ang ila mga pamilya mahimo magbatyag sing tuman nga kahuol kag kalapyo bangod sang tanan nga butang nga dapat desisyunan kag handaan, kag subong man sang madamo nga tawo nga atubangon sang kalaslon sa sina nga adlaw.
Ang kasal amo ang pamuno sang bag-o nga pagkabuhi para sa mag-asawa. Apang indi lamang sila ang apektado sa sini. Sanglit ang pagminyo sang isa ka anak ukon isa ka utod masami nga nagakahulugan nga ang isa nga hinigugma nagatukod sing isa ka panimalay, masami nga nanuhaytuhay ang mabatyagan sang pamilya.
Nagkalainlain ang mga kinabatasan sa kasal sa mga pungsod, kag indi posible nga binagbinagon ang tanan sini diri. Ini nga artikulo magasentro sa kon ano ang nangin kinabatasan na sa Nakatundan kag sa kaanggid nga mga lugar. Didto, ang pagpakasal mahimo nga mangin tuman ka mahal. Ang iban nagagasto sing daku nga kantidad sa adlaw sang kasal, pati na ang pag-arkila sing isa ka tilipunan ukon restawran para hiwatan sang kasal kag para sa punsion. Ginabulubanta nga sa Italya ang kasarangan nga bili sang pagpakasal kapin sa $10,000. Sa Japan, subong sa iban pa nga duog, ang bili mahimo nga kapin pa sa sini. Sa masami indi ang nobya kag nobyo ang nagabayad sa mga balayran. Ang mga ginikanan nila ang nagabayad.
Ang mga kasal daku nga negosyo. Ginapasayod sang madamo nga kompanya ang ideya tuhoy sa “himpit” nga kasal, diin wala sing butang nga kulang. Kay man, ginapahangop nila, “ini amo ang pinakamalipayon nga adlaw sa inyo kabuhi!” Sa amo, nagatanyag sila sing madamo nga produkto kag serbisyo nga “kinahanglanon” agod mangin “himpit” ang adlaw nga importante gid sa inyo. Mahimo nga may mga imbitasyon nga gintuyo sa tagsa ka tawo, ang imo “ginahandum gid” nga trahe de boda, mga trahe para sa mga abay, kag mga tuxedo ukon kaanggid nga mga panapton para sa pinili nga mga abyan nga lalaki sang nobyo. Nian, may mga bulak man, limousine, ayhan isa ka restawran diin hiwaton ang punsion, retratista, banda, kag iban pa nga mga butang. Ang listahan sang tanan nga mahimo maluyagan sang kalaslon, kag ang listahan man sang mga galastuhan, mahimo magpabalaka sa mga amay.
Sa madamo nga katilingban ginahatagan sing daku nga importansia ang pagsunod sa tradisyon. May napat-od na nga paagi kon ano ang dapat himuon, kag ginapaabot nga dapat sundon ini sang nobya kag nobyo. Huo, madamo nga butang ang dapat dumdumon, apang malip-ot lamang ang tion sa pag-organisar sini tanan.
Makakulunyag bala ini ukon makapaluya sing buot? Ano man ang imo sabat, ang paghunahuna sa tanan nga mahimo nadalahig sa isa ka kasal nagapautwas sing pila ka pamangkot. Ano ang kahulugan sang pagpakasal karon? Kinahanglan gid bala ini tanan agod makapakasal sing “nagakaigo”? Paano malandas ang madamong kinaandan kag emosyonal nga kabudlayan?
Walay sapayan sang tanan nga kahuol, nahimo sing madinalag-on sang madamo ang mga detalye sa kasal kag nagkalipay sila sa okasyon. Ang ila mga eksperiensia mahimo makabulig sa iban nga nagahanda para sa sini man nga okasyon. Subong man, may mga prinsipio sa Biblia nga makabulig kon nagahimo sing mga plano para sa kasal, agod ini nga adlaw mangin makalilipay, masadya, kag makapalig-on sa tanan.