Pagsugal—Ginakakunyagan Gid sa Bug-os nga kalibutan
SI John, nga nagdaku sa Scotland, nagdamgo gid nga magdaug sa loterya. “Nagabakal ako sing tiket para sa loterya kada semana,” siling niya. “Barato lamang ini, apang ini nga tiket naghatag sa akon sing paglaum nga matigayon ang tanan nga luyag ko.”
Si Kazushige, nga nagapuyo sa Japan, maluyagon sa karera sang kabayo. “Nasadyahan gid ako magpatad sa karera sang kabayo upod sa akon mga abyan, kag kon kaisa kadaku sang ginadaug ko,” hinumdom niya.
“Bingo ang akon paborito nga hampang,” siling ni Linda, nga nagapuyo sa Australia. “Mga $30 ang ginagasto ko sa sini nga bisyo kada semana, apang luyag ko gid magdaug.”
Gintamod nanday John, Kazushige, kag Linda ang pagsugal subong isa ka indi makahalit nga porma sang kalingawan. Ginatos ka milyon ka tawo sa bug-os nga kalibutan ang may subong man sini nga pagtamod. Ginpakita sang surbe sang Gallup sang 1999 nga dos tersia sang mga Amerikano ang nagauyon sa sugal. Sang 1998, ang Amerikano nga mga sugarol naggasto sing mga $50 bilyones sa legal nga sugal—labaw pa sangsa tingob nga gingasto nila sa sine, narekord nga musika, pagtan-aw sing mga hampang, mga kalingawan kag pasilidad nga may partikular nga tema, kag mga hampang sa video.
Suno sa isa ka pag-usisa sining karon lang, sa sulod sang isa ka tuig, kapin sa 80 porsiento sang populasyon sang Australia ang nakasugal sa di-magkubos sing makaisa, kag 40 porsiento ang nagasugal kada semana. Sa promedyo, kapin sa $400 (U.S.) ang ginagasto kada tuig sa sugal sang mga adulto sa sina nga pungsod, halos doble sang kantidad nga ginagasto sang mga Europeo ukon mga Amerikano, sa amo mga Australiano ang labing mahuyugon nga mga sugarol sa kalibutan.
Madamo nga Hapones ang nagiyan sa pachinko, kaangay sang pinball nga hampang, kag nagagasto sila sing mga bilyones kada tuig sa pagpatad sa sini nga hampang. Sa Brazil, sa di-magkubos $4 bilyones ang ginagasto kada tuig sa sugal, ang kalabanan sini sa mga tiket sa loterya. Apang indi lamang mga Braziliano ang maluyagon sa loterya. Ginbanabana kasan-o lang sang magasin nga Public Gaming International nga may “306 ka loterya sa 102 ka pungsod.” Sa pagkamatuod ang pagsugal ginakakunyagan gid sa bug-os nga kalibutan—kakunyag nga siling sang iban nagadala sing dalagku nga mga benepisyo.
Si Sharon Sharp, tiglawas sang Public Gaming Research Institute, nagsiling nga sa Estados Unidos kutob sang 1964 tubtob 1999, “mga $125 bilyones sang pangbadyet nga dolyares sang estado [ang naghalin sa loterya], ang pinakadaku nga bahin sini nga kinitaan natigayon sugod sang 1993.” Ang daku nga bahin sini nga kuwarta gintigana para sa mga programa sa edukasyon sang publiko, mga parke sang estado, kag pagpauswag sa pangpubliko nga halampangan nga mga pasilidad. Ang sugal isa man ka nagapanguna nga industriya nga nagahatag sing trabaho sa madamo, kag sa Australia lamang, nagahatag ini sing trabaho sa mga 100,000 ka tawo sa kapin sa 7,000 ka negosyo.
Sa amo, ang mga sumalakdag sang sugal nagapangatarungan nga wala labot nga nagahatag ini sing kalingawan, ang legal nga sugal nagahatag sing mga trabaho, ginahalinan sang buhis, kag nagapatin-ad sa nagausmod nga lokal nga ekonomiya.
Busa, madamo nga tawo ang nagapamangkot, ‘Ano ang malain sa pagsugal?’ Ang sabat sa sining pamangkot, nga binagbinagon sa masunod nga mga artikulo, mahimo gid nga magapabag-o sang imo pagtamod sa pagsugal.
[Retrato sa pahina 3]
John
[Retrato sa pahina 3]
Kazushige
[Retrato sa pahina 3]
Linda