Ang Imo Panit—Kaangay sa “Pader sang Siudad”
Ang mga pumuluyo sang dumaan nga mga siudad nagpatindog sang mga pader bilang pangamlig batok sa mga nagasalakay. Ang pader nangin pamakod nga nagapugong sa kaaway kag nangin palalipdan sang mga manugpangapin sa siudad. Ang imo lawas nasangkapan man sang nagaamlig nga “pader”—ang imo panit. Paano ka ginaamligan sang imo panit gikan sa mga manugsalakay?
Madamo ang mga mikrobyo kag di-makita nga mga organismo sa ibabaw sang imo panit, ang pila sini ginatunaan sang impeksion kag balatian. Ang imo panit maathag nga indi lamang panagang. Daw ginatabog man sini ang mga manugsalakay paagi sa paghimo sing kontra-mikrobyo nga mga protina, ukon mga peptide, nga nagapanghikot subong mga manugpangapin. Ang iban sini pirme nagaguardia. Ang iban naman nagagua kon mahalitan ang panit.
Ang una nga duha ka grupo sang kontra-mikrobyo nga mga peptide nga nadiskobrehan, nga ginatawag mga definsin kag cathelicidin, mga manugpangapin nga nakahanda sa pagpanghikot kon kinahanglan. Ining duha ka grupo ginapagua sang mga selula sa naibabaw nga bahin sang panit kon may samad ukon nagbanog ini. Ginapatay sini ang mga manugsalakay paagi sa pagtuhoktuhok sa putos nga mga selula sini.
Sang tuig 2001 ang isa ka grupo sang mga manugpanalawsaw sa University of Tübingen, Alemanya, nakadiskobre sang isa pa ka sahi sang kontra-mikrobyo nga protina, nga ginatawag dermicidin, nga aktibo sa tanan nga tion. Indi kaangay sang nahinambitan nga duha ka grupo, ang dermicidin ginahimo sang wala-samad nga panit, sa mga glandula sang balhas. Indi pa nahibaluan kon paano nagapanghikot ini nga protina. Apang ang katunayan nga ang balhas isa ka proteksion kontra sa balatian nagapaathag kon ngaa mas madali maimpeksion sa panit kag ma-eczema ang mga tawo nga sobra magtinlo sang ila panit.
Kaangay sang dumaan nga pader sang siudad, ang aton panit isa ka pader batok sa nagasalakay nga mga kaaway. Pat-od nga magaugyon ka sa salmista nga nagsiling: “O GINUO, daw ano kadamo sang imo mga binuhatan! Sa kaalam ginhimo mo sila tanan.”—Salmo 104:24.